19 shlokas
- 1
वैशंपायन उवाच
पाण्डवैः सह संयोगं गतस्य द्रुपदस्य तु
न बभूव भयं किंचिद्देवेभ्यो ऽपि कथंचन
एवं विवाहं कृत्वा ते वीरा द्रुपदवेश्मनि
ऊषुः सर्वे यथा पुण्यं कृतवन्तो ऽन्तरिक्षगाः
vaiśaṃpāyana uvāca
pāṇḍavaiḥ saha saṃyogaṃ gatasya drupadasya tu
na babhūva bhayaṃ kiṃciddevebhyo 'pi kathaṃcana
evaṃ vivāhaṃ kṛtvā te vīrā drupadaveśmani
ūṣuḥ sarve yathā puṇyaṃ kṛtavanto 'ntarikṣagāḥ
- 2
कुन्तीम् आसाद्य ता नार्यो द्रुपदस्य महात्मनः
नाम संकीर्तयन्त्यस्ताः पादौ जग्मुः स्वमूर्धभिः
kuntīm āsādya tā nāryo drupadasya mahātmanaḥ
nāma saṃkīrtayantyastāḥ pādau jagmuḥ svamūrdhabhiḥ
- 3
कृष्णा च क्षौमसंवीता कृतकौतुकमङ्गला
कृताभिवादना श्वश्र्वास्तस्थौ प्रह्वा कृताञ्जलिः
kṛṣṇā ca kṣaumasaṃvītā kṛtakautukamaṅgalā
kṛtābhivādanā śvaśrvāstasthau prahvā kṛtāñjaliḥ
- 4
रूपलक्षणसम्पन्नां शीलाचारसमन्विताम्
द्रौपदीम् अवदत्प्रेम्णा पृथाशीर्वचनं स्नुषाम्
rūpalakṣaṇasampannāṃ śīlācārasamanvitām
draupadīm avadatpremṇā pṛthāśīrvacanaṃ snuṣām
- 5
यथेन्द्राणी हरिहये स्वाहा चैव विभावसौ
रोहिणी च यथा सोमे दमयन्ती यथा नले
yathendrāṇī harihaye svāhā caiva vibhāvasau
rohiṇī ca yathā some damayantī yathā nale
- 6
यथा वैश्रवणे भद्रा वसिष्ठे चाप्यरुन्धती
यथा दाशरथौ सीता यथा रुद्रे नगात्मजा
लोपामुद्रा यथागस्त्ये यथा रामे च जानकी
यथा नारायणे लक्ष्मीस्तथा त्वं भव भर्तृषु
वाग्देवी चतुरानने
गिरिजा गिरिशे यद्वद् उषा भानौ यथा स्थिरा
स्थिरा च वल्लभा च त्वम्
yathā vaiśravaṇe bhadrā vasiṣṭhe cāpyarundhatī
yathā dāśarathau sītā yathā rudre nagātmajā
lopāmudrā yathāgastye yathā rāme ca jānakī
yathā nārāyaṇe lakṣmīstathā tvaṃ bhava bhartṛṣu
vāgdevī caturānane
girijā giriśe yadvad uṣā bhānau yathā sthirā
sthirā ca vallabhā ca tvam
- 7
जीवसूर्वीरसूर्भद्रे बहुसौख्यसमन्विता
सुभगा भोगसम्पन्ना यज्ञपत्नी स्वनुव्रता
jīvasūrvīrasūrbhadre bahusaukhyasamanvitā
subhagā bhogasampannā yajñapatnī svanuvratā
- 8
अतिथीन् आगतान्साधून्बालान्वृद्धान्गुरूंस्तथा
पूजयन्त्या यथान्यायं शश्वद्गच्छन्तु ते समाः
atithīn āgatānsādhūnbālānvṛddhāngurūṃstathā
pūjayantyā yathānyāyaṃ śaśvadgacchantu te samāḥ
- 9
कुरुजाङ्गलमुख्येषु राष्ट्रेषु नगरेषु च
अनु त्वम् अभिषिच्यस्व नृपतिं धर्मवत्सलम्
kurujāṅgalamukhyeṣu rāṣṭreṣu nagareṣu ca
anu tvam abhiṣicyasva nṛpatiṃ dharmavatsalam
- 10
पतिभिर्निर्जिताम् उर्वीं विक्रमेण महाबलैः
कुरु ब्राह्मणसात्सर्वाम् अश्वमेधे महाक्रतौ
patibhirnirjitām urvīṃ vikrameṇa mahābalaiḥ
kuru brāhmaṇasātsarvām aśvamedhe mahākratau
- 11
पृथिव्यां यानि रत्नानि गुणवन्ति गुणान्विते
तान्याप्नुहि त्वं कल्याणि सुखिनी शरदां शतम्
pṛthivyāṃ yāni ratnāni guṇavanti guṇānvite
tānyāpnuhi tvaṃ kalyāṇi sukhinī śaradāṃ śatam
- 12
यथा च त्वाभिनन्दामि वध्वद्य क्षौमसंवृताम्
तथा भूयो ऽभिनन्दिष्ये सूतपुत्रां गुणान्विताम्
yathā ca tvābhinandāmi vadhvadya kṣaumasaṃvṛtām
tathā bhūyo 'bhinandiṣye sūtaputrāṃ guṇānvitām
- 13
ततस्तु कृतदारेभ्यः पाण्डुभ्यः प्राहिणोद्धरिः
मुक्तावैडूर्यचित्राणि हैमान्याभरणानि च
tatastu kṛtadārebhyaḥ pāṇḍubhyaḥ prāhiṇoddhariḥ
muktāvaiḍūryacitrāṇi haimānyābharaṇāni ca
- 14
वासांसि च महार्हाणि नानादेश्यानि माधवः
कम्बलाजिनरत्नानि स्पर्शवन्ति शुभानि च
vāsāṃsi ca mahārhāṇi nānādeśyāni mādhavaḥ
kambalājinaratnāni sparśavanti śubhāni ca
- 15
शयनासनयानानि विविधानि महान्ति च
वैडूर्यवज्रचित्राणि शतशो भाजनानि च
śayanāsanayānāni vividhāni mahānti ca
vaiḍūryavajracitrāṇi śataśo bhājanāni ca
- 16
रूपयौवनदाक्षिण्यैर् उपेताश्च स्वलंकृताः
राकाशशाङ्कवदनाः पद्मिनीजातिसंभवाः
पद्मगन्धाः पद्ममुखाः पद्मपत्रनिभेक्षणाः
मुक्तायुक्तसुकर्णाश्च सप्तबिन्दुललाटिकाः
पीवरस्तनभारार्ताः शङ्खकण्ठ्यः सुनासिकाः
कृष्णदीर्घसुकेशिन्यो मुष्टिग्राह्यसुमध्यमाः
भृङ्गालिरोमलतिका ह्यावर्तनिभनाभिकाः
विपुलश्रोणिफलका रम्भास्तम्भोरुयुग्मकाः
प्रेष्याः सम्प्रददौ कृष्णो नानादेश्याः सहस्रशः
rūpayauvanadākṣiṇyair upetāśca svalaṃkṛtāḥ
rākāśaśāṅkavadanāḥ padminījātisaṃbhavāḥ
padmagandhāḥ padmamukhāḥ padmapatranibhekṣaṇāḥ
muktāyuktasukarṇāśca saptabindulalāṭikāḥ
pīvarastanabhārārtāḥ śaṅkhakaṇṭhyaḥ sunāsikāḥ
kṛṣṇadīrghasukeśinyo muṣṭigrāhyasumadhyamāḥ
bhṛṅgāliromalatikā hyāvartanibhanābhikāḥ
vipulaśroṇiphalakā rambhāstambhoruyugmakāḥ
preṣyāḥ sampradadau kṛṣṇo nānādeśyāḥ sahasraśaḥ
- 17
गजान्विनीतान्भद्रांश्च सदश्वांश्च स्वलंकृतान्
रथांश्च दान्तान्सौवर्णैः शुभैः पट्टैर् अलंकृतान्
gajānvinītānbhadrāṃśca sadaśvāṃśca svalaṃkṛtān
rathāṃśca dāntānsauvarṇaiḥ śubhaiḥ paṭṭair alaṃkṛtān
- 18
कोटिशश्च सुवर्णं स तेषाम् अकृतकं तथा
वीतीकृतम् अमेयात्मा प्राहिणोन्मधुसूदनः
koṭiśaśca suvarṇaṃ sa teṣām akṛtakaṃ tathā
vītīkṛtam ameyātmā prāhiṇonmadhusūdanaḥ
- 19
तत्सर्वं प्रतिजग्राह धर्मराजो युधिष्ठिरः
मुदा परमया युक्तो गोविन्दप्रियकाम्यया
tatsarvaṃ pratijagrāha dharmarājo yudhiṣṭhiraḥ
mudā paramayā yukto govindapriyakāmyayā

