102 shlokas
- 1
जनमेजय उवाच
देवानां दानवानां च यक्षाणाम् अथ रक्षसाम्
सिंहव्याघ्रमृगाणां च पन्नगानां पतत्रिणाम्
अन्येषां चैव भूतानां सर्वेषां भगवन्न् अहम्
janamejaya uvāca
devānāṃ dānavānāṃ ca yakṣāṇām atha rakṣasām
siṃhavyāghramṛgāṇāṃ ca pannagānāṃ patatriṇām
anyeṣāṃ caiva bhūtānāṃ sarveṣāṃ bhagavann aham
- 2
श्रोतुम् इच्छामि तत्त्वेन मानुषेषु महात्मनाम्
जन्म कर्म च भूतानाम् एतेषाम् अनुपूर्वशः
śrotum icchāmi tattvena mānuṣeṣu mahātmanām
janma karma ca bhūtānām eteṣām anupūrvaśaḥ
- 3
वैशंपायन उवाच
मानुषेषु मनुष्येन्द्र सम्भूता ये दिवौकसः
प्रथमं दानवांश्चैव तांस्ते वक्ष्यामि सर्वशः
vaiśaṃpāyana uvāca
mānuṣeṣu manuṣyendra sambhūtā ye divaukasaḥ
prathamaṃ dānavāṃścaiva tāṃste vakṣyāmi sarvaśaḥ
- 4
विप्रचित्तिर् इति ख्यातो य आसीद्दानवर्षभः
जरासंध इति ख्यातः स आसीन्मनुजर्षभः
vipracittir iti khyāto ya āsīddānavarṣabhaḥ
jarāsaṃdha iti khyātaḥ sa āsīnmanujarṣabhaḥ
- 5
दितेः पुत्रस्तु यो राजन्हिरण्यकशिपुः स्मृतः
स जज्ञे मानुषे लोके शिशुपालो नरर्षभः
diteḥ putrastu yo rājanhiraṇyakaśipuḥ smṛtaḥ
sa jajñe mānuṣe loke śiśupālo nararṣabhaḥ
- 6
संह्राद इति विख्यातः प्रह्रादस्यानुजस्तु यः
स शल्य इति विख्यातो जज्ञे वाह्लीकपुंगवः
saṃhrāda iti vikhyātaḥ prahrādasyānujastu yaḥ
sa śalya iti vikhyāto jajñe vāhlīkapuṃgavaḥ
- 7
अनुह्रादस्तु तेजस्वी यो ऽभूत्ख्यातो जघन्यजः
धृष्टकेतुर् इति ख्यातः स आसीन्मनुजेश्वरः
anuhrādastu tejasvī yo 'bhūtkhyāto jaghanyajaḥ
dhṛṣṭaketur iti khyātaḥ sa āsīnmanujeśvaraḥ
- 8
यस्तु राजञ्शिबिर्नाम दैतेयः परिकीर्तितः
द्रुम इत्यभिविख्यातः स आसीद्भुवि पार्थिवः
yastu rājañśibirnāma daiteyaḥ parikīrtitaḥ
druma ityabhivikhyātaḥ sa āsīdbhuvi pārthivaḥ
- 9
बाष्कलो नाम यस्तेषाम् आसीद् असुरसत्तमः
भगदत्त इति ख्यातः स आसीन्मनुजेश्वरः
bāṣkalo nāma yasteṣām āsīd asurasattamaḥ
bhagadatta iti khyātaḥ sa āsīnmanujeśvaraḥ
- 10
अयःशिरा अश्वशिरा अयःशङ्कुश्च वीर्यवान्
तथा गगनमूर्धा च वेगवांश्चात्र पञ्चमः
ayaḥśirā aśvaśirā ayaḥśaṅkuśca vīryavān
tathā gaganamūrdhā ca vegavāṃścātra pañcamaḥ
- 11
पञ्चैते जज्ञिरे राजन्वीर्यवन्तो महासुराः
केकयेषु महात्मानः पार्थिवर्षभसत्तमाः
pañcaite jajñire rājanvīryavanto mahāsurāḥ
kekayeṣu mahātmānaḥ pārthivarṣabhasattamāḥ
- 12
केतुमान् इति विख्यातो यस्ततो ऽन्यः प्रतापवान्
अमितौजा इति ख्यातः पृथिव्यां सो ऽभवन्नृपः
ketumān iti vikhyāto yastato 'nyaḥ pratāpavān
amitaujā iti khyātaḥ pṛthivyāṃ so 'bhavannṛpaḥ
- 13
स्वर्भानुर् इति विख्यातः श्रीमान्यस्तु महासुरः
उग्रसेन इति ख्यात उग्रकर्मा नराधिपः
svarbhānur iti vikhyātaḥ śrīmānyastu mahāsuraḥ
ugrasena iti khyāta ugrakarmā narādhipaḥ
- 14
यस्त्वश्व इति विख्यातः श्रीमान् आसीन्महासुरः
अशोको नाम राजासीन्महावीर्यपराक्रमः
yastvaśva iti vikhyātaḥ śrīmān āsīnmahāsuraḥ
aśoko nāma rājāsīnmahāvīryaparākramaḥ
- 15
तस्माद् अवरजो यस्तु राजन्न् अश्वपतिः स्मृतः
दैतेयः सो ऽभवद्राजा हार्दिक्यो मनुजर्षभः
tasmād avarajo yastu rājann aśvapatiḥ smṛtaḥ
daiteyaḥ so 'bhavadrājā hārdikyo manujarṣabhaḥ
- 16
वृषपर्वेति विख्यातः श्रीमान्यस्तु महासुरः
दीर्घप्रज्ञ इति ख्यातः पृथिव्यां सो ऽभवन्नृपः
vṛṣaparveti vikhyātaḥ śrīmānyastu mahāsuraḥ
dīrghaprajña iti khyātaḥ pṛthivyāṃ so 'bhavannṛpaḥ
- 17
अजकस्त्वनुजो राजन्य आसीद्वृषपर्वणः
स मल्ल इति विख्यातः पृथिव्याम् अभवन्नृपः
ajakastvanujo rājanya āsīdvṛṣaparvaṇaḥ
sa malla iti vikhyātaḥ pṛthivyām abhavannṛpaḥ
- 18
अश्वग्रीव इति ख्यातः सत्त्ववान्यो महासुरः
रोचमान इति ख्यातः पृथिव्यां सो ऽभवन्नृपः
aśvagrīva iti khyātaḥ sattvavānyo mahāsuraḥ
rocamāna iti khyātaḥ pṛthivyāṃ so 'bhavannṛpaḥ
- 19
सूक्ष्मस्तु मतिमान्राजन्कीर्तिमान्यः प्रकीर्तितः
बृहन्त इति विख्यातः क्षितावासीत्स पार्थिवः
sūkṣmastu matimānrājankīrtimānyaḥ prakīrtitaḥ
bṛhanta iti vikhyātaḥ kṣitāvāsītsa pārthivaḥ
- 20
तुहुण्ड इति विख्यातो य आसीद् असुरोत्तमः
सेनाबिन्दुर् इति ख्यातः स बभूव नराधिपः
tuhuṇḍa iti vikhyāto ya āsīd asurottamaḥ
senābindur iti khyātaḥ sa babhūva narādhipaḥ
- 21
इसृपा नाम यस्तेषाम् असुराणां बलाधिकः
पापजिन्नाम राजासीद्भुवि विख्यातविक्रमः
isṛpā nāma yasteṣām asurāṇāṃ balādhikaḥ
pāpajinnāma rājāsīdbhuvi vikhyātavikramaḥ
- 22
एकचक्र इति ख्यात आसीद्यस्तु महासुरः
प्रतिविन्ध्य इति ख्यातो बभूव प्रथितः क्षितौ
ekacakra iti khyāta āsīdyastu mahāsuraḥ
prativindhya iti khyāto babhūva prathitaḥ kṣitau
- 23
विरूपाक्षस्तु दैतेयश्चित्रयोधी महासुरः
चित्रवर्मेति विख्यातः क्षितावासीत्स पार्थिवः
virūpākṣastu daiteyaścitrayodhī mahāsuraḥ
citravarmeti vikhyātaḥ kṣitāvāsītsa pārthivaḥ
- 24
हरस्त्वरिहरो वीर आसीद्यो दानवोत्तमः
सुवास्तुर् इति विख्यातः स जज्ञे मनुजर्षभः
harastvariharo vīra āsīdyo dānavottamaḥ
suvāstur iti vikhyātaḥ sa jajñe manujarṣabhaḥ
- 25
अहरस्तु महातेजाः शत्रुपक्षक्षयंकरः
बाह्लीको नाम राजा स बभूव प्रथितः क्षितौ
aharastu mahātejāḥ śatrupakṣakṣayaṃkaraḥ
bāhlīko nāma rājā sa babhūva prathitaḥ kṣitau
- 26
निचन्द्रश्चन्द्रवक्त्रश्च य आसीद् असुरोत्तमः
मुञ्जकेश इति ख्यातः श्रीमान् आसीत्स पार्थिवः
nicandraścandravaktraśca ya āsīd asurottamaḥ
muñjakeśa iti khyātaḥ śrīmān āsītsa pārthivaḥ
- 27
निकुम्भस्त्वजितः संख्ये महामतिर् अजायत
भूमौ भूमिपतिः श्रेष्ठो देवाधिप इति स्मृतः
nikumbhastvajitaḥ saṃkhye mahāmatir ajāyata
bhūmau bhūmipatiḥ śreṣṭho devādhipa iti smṛtaḥ
- 28
शरभो नाम यस्तेषां दैतेयानां महासुरः
पौरवो नाम राजर्षिः स बभूव नरेष्विह
कापथस्तु महावीर्यः श्रीमान्राजन्महासुरः
सुपार्श्व इति विख्यातः क्षितौ जज्ञे महीपतिः
क्रथस्तु राजन्राजर्षिः क्षितौ जज्ञे महासुरः
पार्वतेय इति ख्यातः काञ्चनाचलसंनिभः
śarabho nāma yasteṣāṃ daiteyānāṃ mahāsuraḥ
pauravo nāma rājarṣiḥ sa babhūva nareṣviha
kāpathastu mahāvīryaḥ śrīmānrājanmahāsuraḥ
supārśva iti vikhyātaḥ kṣitau jajñe mahīpatiḥ
krathastu rājanrājarṣiḥ kṣitau jajñe mahāsuraḥ
pārvateya iti khyātaḥ kāñcanācalasaṃnibhaḥ
- 29
द्वितीयः शलभस्तेषाम् असुराणां बभूव यः
प्रह्रादो नाम बाह्लीकः स बभूव नराधिपः
dvitīyaḥ śalabhasteṣām asurāṇāṃ babhūva yaḥ
prahrādo nāma bāhlīkaḥ sa babhūva narādhipaḥ
- 30
चन्द्रस्तु दितिजश्रेष्ठो लोके ताराधिपोपमः
चन्द्रवर्मेति विख्यातः काम्बोजानां नराधिपः
अर्क इत्यभिविख्यातो यस्तु दानवपुंगवः
ऋषिको नाम राजर्षिर्बभूव नृपसत्तमः
candrastu ditijaśreṣṭho loke tārādhipopamaḥ
candravarmeti vikhyātaḥ kāmbojānāṃ narādhipaḥ
arka ityabhivikhyāto yastu dānavapuṃgavaḥ
ṛṣiko nāma rājarṣirbabhūva nṛpasattamaḥ

