13 shlokas
- 1
अर्जुन उवाच
अस्माकम् अनुरूपो वै यः स्याद्गन्धर्व वेदवित्
पुरोहितस्तम् आचक्ष्व सर्वं हि विदितं तव
arjuna uvāca
asmākam anurūpo vai yaḥ syādgandharva vedavit
purohitastam ācakṣva sarvaṃ hi viditaṃ tava
- 2
गन्धर्व उवाच
यवीयान्देवलस्यैष वने भ्राता तपस्यति
धौम्य उत्कोचके तीर्थे तं वृणुध्वं यदीच्छथ
gandharva uvāca
yavīyāndevalasyaiṣa vane bhrātā tapasyati
dhaumya utkocake tīrthe taṃ vṛṇudhvaṃ yadīcchatha
- 3
वैशंपायन उवाच
ततो ऽर्जुनो ऽस्त्रम् आग्नेयं प्रददौ तद्यथाविधि
गन्धर्वाय तदा प्रीतो वचनं चेदम् अब्रवीत्
vaiśaṃpāyana uvāca
tato 'rjuno 'stram āgneyaṃ pradadau tadyathāvidhi
gandharvāya tadā prīto vacanaṃ cedam abravīt
- 4
त्वय्येव तावत्तिष्ठन्तु हया गन्धर्वसत्तम
कर्मकाले ग्रहीष्यामि स्वस्ति ते ऽस्त्विति चाब्रवीत्
tvayyeva tāvattiṣṭhantu hayā gandharvasattama
karmakāle grahīṣyāmi svasti te 'stviti cābravīt
- 5
ते ऽन्योन्यम् अभिसंपूज्य गन्धर्वः पाण्डवाश्च ह
रम्याद्भागीरथीकच्छाद्यथाकामं प्रतस्थिरे
te 'nyonyam abhisaṃpūjya gandharvaḥ pāṇḍavāśca ha
ramyādbhāgīrathīkacchādyathākāmaṃ pratasthire
- 6
तत उत्कोचकं तीर्थं गत्वा धौम्याश्रमं तु ते
तं वव्रुः पाण्डवा धौम्यं पौरोहित्याय भारत
tata utkocakaṃ tīrthaṃ gatvā dhaumyāśramaṃ tu te
taṃ vavruḥ pāṇḍavā dhaumyaṃ paurohityāya bhārata
- 7
तान्धौम्यः प्रतिजग्राह सर्ववेदविदां वरः
पाद्येन फलमूलेन पौरोहित्येन चैव ह
tāndhaumyaḥ pratijagrāha sarvavedavidāṃ varaḥ
pādyena phalamūlena paurohityena caiva ha
- 8
ते तदाशंसिरे लब्धां श्रियं राज्यं च पाण्डवाः
तं ब्राह्मणं पुरस्कृत्य पाञ्चाल्याश्च स्वयंवरम्
te tadāśaṃsire labdhāṃ śriyaṃ rājyaṃ ca pāṇḍavāḥ
taṃ brāhmaṇaṃ puraskṛtya pāñcālyāśca svayaṃvaram
- 9
मातृषष्ठास्तु ते तेन गुरुणा संगतास्तदा
नाथवन्तम् इवात्मानं मेनिरे भरतर्षभाः
mātṛṣaṣṭhāstu te tena guruṇā saṃgatāstadā
nāthavantam ivātmānaṃ menire bharatarṣabhāḥ
- 10
स हि वेदार्थतत्त्वज्ञस्तेषां गुरुर् उदारधीः
तेन धर्मविदा पार्था याज्याः सर्वविदा कृताः
sa hi vedārthatattvajñasteṣāṃ gurur udāradhīḥ
tena dharmavidā pārthā yājyāḥ sarvavidā kṛtāḥ
- 11
वीरांस्तु स हि तान्मेने प्राप्तराज्यान्स्वधर्मतः
बुद्धिवीर्यबलोत्साहैर्युक्तान्देवान् इवापरान्
vīrāṃstu sa hi tānmene prāptarājyānsvadharmataḥ
buddhivīryabalotsāhairyuktāndevān ivāparān
- 12
कृतस्वस्त्ययनास्तेन ततस्ते मनुजाधिपाः
मेनिरे सहिता गन्तुं पाञ्चाल्यास्तं स्वयंवरम्
kṛtasvastyayanāstena tataste manujādhipāḥ
menire sahitā gantuṃ pāñcālyāstaṃ svayaṃvaram
- 13
वेदविच्चैव वाग्मी च धौम्यः श्रीमान्द्विजोत्तमः
तेजसा चैव बुद्ध्या च रूपेण यशसा श्रिया
मन्त्रैश्च विविधैर्धौम्यस्तुल्य आसीद्बृहस्पतेः
स चापि विप्रस्तान्मेने स्वभावाभ्यधिकान्भुवि
vedaviccaiva vāgmī ca dhaumyaḥ śrīmāndvijottamaḥ
tejasā caiva buddhyā ca rūpeṇa yaśasā śriyā
mantraiśca vividhairdhaumyastulya āsīdbṛhaspateḥ
sa cāpi viprastānmene svabhāvābhyadhikānbhuvi

