27 shlokas
- 1
नारद उवाच
उत्सवे वृत्तमात्रे तु त्रैलोक्याकाङ्क्षिणावुभौ
मन्त्रयित्वा ततः सेनां तावाज्ञापयतां तदा
nārada uvāca
utsave vṛttamātre tu trailokyākāṅkṣiṇāvubhau
mantrayitvā tataḥ senāṃ tāvājñāpayatāṃ tadā
- 2
सुहृद्भिर् अभ्यनुज्ञातौ दैत्यवृद्धैश्च मन्त्रिभिः
कृत्वा प्रास्थानिकं रात्रौ मघासु ययतुस्तदा
suhṛdbhir abhyanujñātau daityavṛddhaiśca mantribhiḥ
kṛtvā prāsthānikaṃ rātrau maghāsu yayatustadā
- 3
गदापट्टिशधारिण्या शूलमुद्गरहस्तया
प्रस्थितौ सहधर्मिण्या महत्या दैत्यसेनया
gadāpaṭṭiśadhāriṇyā śūlamudgarahastayā
prasthitau sahadharmiṇyā mahatyā daityasenayā
- 4
मङ्गलैः स्तुतिभिश्चापि विजयप्रतिसंहितैः
चारणैः स्तूयमानौ तु जग्मतुः परया मुदा
maṅgalaiḥ stutibhiścāpi vijayapratisaṃhitaiḥ
cāraṇaiḥ stūyamānau tu jagmatuḥ parayā mudā
- 5
तावन्तरिक्षम् उत्पत्य दैत्यौ कामगमावुभौ
देवानाम् एव भवनं जग्मतुर्युद्धदुर्मदौ
tāvantarikṣam utpatya daityau kāmagamāvubhau
devānām eva bhavanaṃ jagmaturyuddhadurmadau
- 6
तयोर् आगमनं ज्ञात्वा वरदानं च तत्प्रभोः
हित्वा त्रिविष्टपं जग्मुर्ब्रह्मलोकं ततः सुराः
tayor āgamanaṃ jñātvā varadānaṃ ca tatprabhoḥ
hitvā triviṣṭapaṃ jagmurbrahmalokaṃ tataḥ surāḥ
- 7
ताविन्द्रलोकं निर्जित्य यक्षरक्षोगणांस्तथा
खेचराण्यपि भूतानि जिग्यतुस्तीव्रविक्रमौ
tāvindralokaṃ nirjitya yakṣarakṣogaṇāṃstathā
khecarāṇyapi bhūtāni jigyatustīvravikramau
- 8
अन्तर्भूमिगतान्नागाञ्जित्वा तौ च महासुरौ
समुद्रवासिनः सर्वान्म्लेच्छजातीन्विजिग्यतुः
antarbhūmigatānnāgāñjitvā tau ca mahāsurau
samudravāsinaḥ sarvānmlecchajātīnvijigyatuḥ
- 9
ततः सर्वां महीं जेतुम् आरब्धावुग्रशासनौ
सैनिकांश्च समाहूय सुतीक्ष्णां वाचम् ऊचतुः
tataḥ sarvāṃ mahīṃ jetum ārabdhāvugraśāsanau
sainikāṃśca samāhūya sutīkṣṇāṃ vācam ūcatuḥ
- 10
राजर्षयो महायज्ञैर्हव्यकव्यैर्द्विजातयः
तेजो बलं च देवानां वर्धयन्ति श्रियं तथा
rājarṣayo mahāyajñairhavyakavyairdvijātayaḥ
tejo balaṃ ca devānāṃ vardhayanti śriyaṃ tathā
- 11
तेषाम् एवं प्रवृद्धानां सर्वेषाम् असुरद्विषाम्
सम्भूय सर्वैर् अस्माभिः कार्यः सर्वात्मना वधः
teṣām evaṃ pravṛddhānāṃ sarveṣām asuradviṣām
sambhūya sarvair asmābhiḥ kāryaḥ sarvātmanā vadhaḥ
- 12
एवं सर्वान्समादिश्य पूर्वतीरे महोदधेः
क्रूरां मतिं समास्थाय जग्मतुः सर्वतोमुखम्
evaṃ sarvānsamādiśya pūrvatīre mahodadheḥ
krūrāṃ matiṃ samāsthāya jagmatuḥ sarvatomukham
- 13
यज्ञैर्यजन्ते ये केचिद्याजयन्ति च ये द्विजाः
तान्सर्वान्प्रसभं दृष्ट्वा बलिनौ जघ्नतुस्तदा
yajñairyajante ye kecidyājayanti ca ye dvijāḥ
tānsarvānprasabhaṃ dṛṣṭvā balinau jaghnatustadā
- 14
आश्रमेष्वग्निहोत्राणि ऋषीणां भावितात्मनाम्
गृहीत्वा प्रक्षिपन्त्य् अप्सु विश्रब्धाः सैनिकास्तयोः
āśrameṣvagnihotrāṇi ṛṣīṇāṃ bhāvitātmanām
gṛhītvā prakṣipanty apsu viśrabdhāḥ sainikāstayoḥ
- 15
तपोधनैश्च ये शापाः क्रुद्धैर् उक्ता महात्मभिः
नाक्रामन्ति तयोस्ते ऽपि वरदानेन जृम्भतोः
tapodhanaiśca ye śāpāḥ kruddhair uktā mahātmabhiḥ
nākrāmanti tayoste 'pi varadānena jṛmbhatoḥ
- 16
नाक्रामन्ति यदा शापा बाणा मुक्ताः शिलास्विव
नियमांस्तदा परित्यज्य व्यद्रवन्त द्विजातयः
nākrāmanti yadā śāpā bāṇā muktāḥ śilāsviva
niyamāṃstadā parityajya vyadravanta dvijātayaḥ
- 17
पृथिव्यां ये तपःसिद्धा दान्ताः शमपरायणाः
तयोर्भयाद्दुद्रुवुस्ते वैनतेयाद् इवोरगाः
pṛthivyāṃ ye tapaḥsiddhā dāntāḥ śamaparāyaṇāḥ
tayorbhayāddudruvuste vainateyād ivoragāḥ
- 18
मथितैर् आश्रमैर्भग्नैर्विकीर्णकलशस्रुवैः
शून्यम् आसीज्जगत्सर्वं कालेनेव हतं यथा
mathitair āśramairbhagnairvikīrṇakalaśasruvaiḥ
śūnyam āsījjagatsarvaṃ kāleneva hataṃ yathā
- 19
राजर्षिभिर् अदृश्यद्भिर् ऋषिभिश्च महासुरौ
उभौ विनिश्चयं कृत्वा विकुर्वाते वधैषिणौ
rājarṣibhir adṛśyadbhir ṛṣibhiśca mahāsurau
ubhau viniścayaṃ kṛtvā vikurvāte vadhaiṣiṇau
- 20
प्रभिन्नकरटौ मत्तौ भूत्वा कुञ्जररूपिणौ
संलीनान् अपि दुर्गेषु निन्यतुर्यमसादनम्
prabhinnakaraṭau mattau bhūtvā kuñjararūpiṇau
saṃlīnān api durgeṣu ninyaturyamasādanam
- 21
सिंहौ भूत्वा पुनर्व्याघ्रौ पुनश्चान्तर्हितावुभौ
तैस्तैर् उपायैस्तौ क्रूराव् ऋषीन्दृष्ट्वा निजघ्नतुः
siṃhau bhūtvā punarvyāghrau punaścāntarhitāvubhau
taistair upāyaistau krūrāv ṛṣīndṛṣṭvā nijaghnatuḥ
- 22
निवृत्तयज्ञस्वाध्याया प्रणष्टनृपतिद्विजा
उत्सन्नोत्सवयज्ञा च बभूव वसुधा तदा
nivṛttayajñasvādhyāyā praṇaṣṭanṛpatidvijā
utsannotsavayajñā ca babhūva vasudhā tadā
- 23
हाहाभूता भयार्ता च निवृत्तविपणापणा
निवृत्तदेवकार्या च पुण्योद्वाहविवर्जिता
hāhābhūtā bhayārtā ca nivṛttavipaṇāpaṇā
nivṛttadevakāryā ca puṇyodvāhavivarjitā
- 24
निवृत्तकृषिगोरक्षा विध्वस्तनगराश्रमा
अस्थिकङ्कालसंकीर्णा भूर्बभूवोग्रदर्शना
nivṛttakṛṣigorakṣā vidhvastanagarāśramā
asthikaṅkālasaṃkīrṇā bhūrbabhūvogradarśanā
- 25
निवृत्तपितृकार्यं च निर्वषट्कारमङ्गलम्
जगत्प्रतिभयाकारं दुष्प्रेक्ष्यम् अभवत्तदा
nivṛttapitṛkāryaṃ ca nirvaṣaṭkāramaṅgalam
jagatpratibhayākāraṃ duṣprekṣyam abhavattadā
- 26
चन्द्रादित्यौ ग्रहास्तारा नक्षत्राणि दिवौकसः
जग्मुर्विषादं तत्कर्म दृष्ट्वा सुन्दोपसुन्दयोः
candrādityau grahāstārā nakṣatrāṇi divaukasaḥ
jagmurviṣādaṃ tatkarma dṛṣṭvā sundopasundayoḥ
- 27
एवं सर्वा दिशो दैत्यौ जित्वा क्रूरेण कर्मणा
निःसपत्नौ कुरुक्षेत्रे निवेशम् अभिचक्रतुः
evaṃ sarvā diśo daityau jitvā krūreṇa karmaṇā
niḥsapatnau kurukṣetre niveśam abhicakratuḥ

