20 shlokas
- 1
गन्धर्व उवाच
अथ तस्याम् अदृश्यायां नृपतिः काममोहितः
पातनः शत्रुसंघानां पपात धरणीतले
gandharva uvāca
atha tasyām adṛśyāyāṃ nṛpatiḥ kāmamohitaḥ
pātanaḥ śatrusaṃghānāṃ papāta dharaṇītale
- 2
तस्मिन्निपतिते भूमावथ सा चारुहासिनी
पुनः पीनायतश्रोणी दर्शयामास तं नृपम्
tasminnipatite bhūmāvatha sā cāruhāsinī
punaḥ pīnāyataśroṇī darśayāmāsa taṃ nṛpam
- 3
अथाबभाषे कल्याणी वाचा मधुरया नृपम्
तं कुरूणां कुलकरं कामाभिहतचेतसम्
उवाच मधुरं वाक्यं तपती प्रहसन्न् इव
athābabhāṣe kalyāṇī vācā madhurayā nṛpam
taṃ kurūṇāṃ kulakaraṃ kāmābhihatacetasam
uvāca madhuraṃ vākyaṃ tapatī prahasann iva
- 4
उत्तिष्ठोत्तिष्ठ भद्रं ते न त्वम् अर्हस्यरिंदम
मोहं नृपतिशार्दूल गन्तुम् आविष्कृतः क्षितौ
uttiṣṭhottiṣṭha bhadraṃ te na tvam arhasyariṃdama
mohaṃ nṛpatiśārdūla gantum āviṣkṛtaḥ kṣitau
- 5
एवम् उक्तो ऽथ नृपतिर्वाचा मधुरया तदा
ददर्श विपुलश्रोणीं ताम् एवाभिमुखे स्थिताम्
evam ukto 'tha nṛpatirvācā madhurayā tadā
dadarśa vipulaśroṇīṃ tām evābhimukhe sthitām
- 6
अथ ताम् असितापाङ्गीम् आबभाषे नराधिपः
मन्मथाग्निपरीतात्मा संदिग्धाक्षरया गिरा
atha tām asitāpāṅgīm ābabhāṣe narādhipaḥ
manmathāgniparītātmā saṃdigdhākṣarayā girā
- 7
साधु माम् असितापाङ्गे कामार्तं मत्तकाशिनि
भजस्व भजमानं मां प्राणा हि प्रजहन्ति माम्
sādhu mām asitāpāṅge kāmārtaṃ mattakāśini
bhajasva bhajamānaṃ māṃ prāṇā hi prajahanti mām
- 8
त्वदर्थं हि विशालाक्षि माम् अयं निशितैः शरैः
कामः कमलगर्भाभे प्रतिविध्यन्न शाम्यति
tvadarthaṃ hi viśālākṣi mām ayaṃ niśitaiḥ śaraiḥ
kāmaḥ kamalagarbhābhe pratividhyanna śāmyati
- 9
ग्रस्तम् एवम् अनाक्रन्दे भद्रे काममहाहिना
सा त्वं पीनायतश्रोणि पर्याप्नुहि शुभानने
grastam evam anākrande bhadre kāmamahāhinā
sā tvaṃ pīnāyataśroṇi paryāpnuhi śubhānane
- 10
त्वय्यधीना हि मे प्राणाः किंनरोद्गीतभाषिणि
चारुसर्वानवद्याङ्गि पद्मेन्दुसदृशानने
tvayyadhīnā hi me prāṇāḥ kiṃnarodgītabhāṣiṇi
cārusarvānavadyāṅgi padmendusadṛśānane
- 11
न ह्यहं त्वद् ऋते भीरु शक्ष्ये जीवितुम् आत्मना
कामः कमलपत्राक्षि प्रतिविध्यति माम् अयम्
तस्मात्कुरु विशालाक्षि मय्यनुक्रोशम् अङ्गने
na hyahaṃ tvad ṛte bhīru śakṣye jīvitum ātmanā
kāmaḥ kamalapatrākṣi pratividhyati mām ayam
tasmātkuru viśālākṣi mayyanukrośam aṅgane
- 12
भक्तं माम् असितापाङ्गे न परित्यक्तुम् अर्हसि
त्वं हि मां प्रीतियोगेन त्रातुम् अर्हसि भामिनि
त्वद्दर्शनकृतस्नेहं मनश्चलति मे भृशम्
न त्वां दृष्ट्वा पुनर् अन्यां द्रष्टुं कल्याणि रोचये
प्रसीद वशगो ऽहं ते भक्तं मां भज भाविनि
दृष्ट्वैव त्वां वरारोहे मन्मथो भृशम् अङ्गने
अन्तर्गतं विशालाक्षि विध्यति स्म पतत्रिभिः
मन्मथाग्निसमुद्भूतं दाहं कमललोचने
प्रीतिसंयोगयुक्ताभिर् अद्भिः प्रह्लादयस्व मे
पुष्पायुधं दुराधर्षं प्रचण्डशरकार्मुकम्
त्वद्दर्शनसमुद्भूतं विध्यन्तं दुःसहैः शरैः
उपशामय कल्याणि आत्मदानेन भाविनि
bhaktaṃ mām asitāpāṅge na parityaktum arhasi
tvaṃ hi māṃ prītiyogena trātum arhasi bhāmini
tvaddarśanakṛtasnehaṃ manaścalati me bhṛśam
na tvāṃ dṛṣṭvā punar anyāṃ draṣṭuṃ kalyāṇi rocaye
prasīda vaśago 'haṃ te bhaktaṃ māṃ bhaja bhāvini
dṛṣṭvaiva tvāṃ varārohe manmatho bhṛśam aṅgane
antargataṃ viśālākṣi vidhyati sma patatribhiḥ
manmathāgnisamudbhūtaṃ dāhaṃ kamalalocane
prītisaṃyogayuktābhir adbhiḥ prahlādayasva me
puṣpāyudhaṃ durādharṣaṃ pracaṇḍaśarakārmukam
tvaddarśanasamudbhūtaṃ vidhyantaṃ duḥsahaiḥ śaraiḥ
upaśāmaya kalyāṇi ātmadānena bhāvini
- 13
गान्धर्वेण च मां भीरु विवाहेनैहि सुन्दरि
विवाहानां हि रम्भोरु गान्धर्वः श्रेष्ठ उच्यते
gāndharveṇa ca māṃ bhīru vivāhenaihi sundari
vivāhānāṃ hi rambhoru gāndharvaḥ śreṣṭha ucyate
- 14
तपत्युवाच
नाहम् ईशात्मनो राजन्कन्या पितृमती ह्यहम्
मयि चेद् अस्ति ते प्रीतिर्याचस्व पितरं मम
tapatyuvāca
nāham īśātmano rājankanyā pitṛmatī hyaham
mayi ced asti te prītiryācasva pitaraṃ mama
- 15
यथा हि ते मया प्राणाः संगृहीता नरेश्वर
दर्शनाद् एव भूयस्त्वं तथा प्राणान्ममाहरः
yathā hi te mayā prāṇāḥ saṃgṛhītā nareśvara
darśanād eva bhūyastvaṃ tathā prāṇānmamāharaḥ
- 16
न चाहम् ईशा देहस्य तस्मान्नृपतिसत्तम
समीपं नोपगच्छामि न स्वतन्त्रा हि योषितः
na cāham īśā dehasya tasmānnṛpatisattama
samīpaṃ nopagacchāmi na svatantrā hi yoṣitaḥ
- 17
का हि सर्वेषु लोकेषु विश्रुताभिजनं नृपम्
कन्या नाभिलषेन्नाथं भर्तारं भक्तवत्सलम्
kā hi sarveṣu lokeṣu viśrutābhijanaṃ nṛpam
kanyā nābhilaṣennāthaṃ bhartāraṃ bhaktavatsalam
- 18
तस्माद् एवंगते काले याचस्व पितरं मम
आदित्यं प्रणिपातेन तपसा नियमेन च
tasmād evaṃgate kāle yācasva pitaraṃ mama
ādityaṃ praṇipātena tapasā niyamena ca
- 19
स चेत्कामयते दातुं तव माम् अरिमर्दन
भविष्याम्यथ ते राजन्सततं वशवर्तिनी
sa cetkāmayate dātuṃ tava mām arimardana
bhaviṣyāmyatha te rājansatataṃ vaśavartinī
- 20
अहं हि तपती नाम सावित्र्यवरजा सुता
अस्य लोकप्रदीपस्य सवितुः क्षत्रियर्षभ
ahaṃ hi tapatī nāma sāvitryavarajā sutā
asya lokapradīpasya savituḥ kṣatriyarṣabha

