22 shlokas
- 1
धृष्टद्युम्न उवाच
दुर्योधनो दुर्विषहो दुर्मुखो दुष्प्रधर्षणः
विविंशतिर्विकर्णश्च सहो दुःशासनः समः
dhṛṣṭadyumna uvāca
duryodhano durviṣaho durmukho duṣpradharṣaṇaḥ
viviṃśatirvikarṇaśca saho duḥśāsanaḥ samaḥ
- 2
युयुत्सुर्वातवेगश्च भीमवेगधरस्तथा
उग्रायुधो बलाकी च कनकायुर्विरोचनः
yuyutsurvātavegaśca bhīmavegadharastathā
ugrāyudho balākī ca kanakāyurvirocanaḥ
- 3
सुकुण्डलश्चित्रसेनः सुवर्चाः कनकध्वजः
नन्दको बाहुशाली च कुण्डजो विकटस्तथा
विन्दश्चाप्यनुविन्दश्च सजीवी विकलः करी
sukuṇḍalaścitrasenaḥ suvarcāḥ kanakadhvajaḥ
nandako bāhuśālī ca kuṇḍajo vikaṭastathā
vindaścāpyanuvindaśca sajīvī vikalaḥ karī
- 4
एते चान्ये च बहवो धार्तराष्ट्रा महाबलाः
कर्णेन सहिता वीरास्त्वदर्थं समुपागताः
शतसंख्या महात्मानः प्रथिताः क्षत्रियर्षभाः
ete cānye ca bahavo dhārtarāṣṭrā mahābalāḥ
karṇena sahitā vīrāstvadarthaṃ samupāgatāḥ
śatasaṃkhyā mahātmānaḥ prathitāḥ kṣatriyarṣabhāḥ
- 5
शकुनिश्च बलश्चैव वृषको ऽथ बृहद्बलः
एते गान्धारराजस्य सुताः सर्वे समागताः
śakuniśca balaścaiva vṛṣako 'tha bṛhadbalaḥ
ete gāndhārarājasya sutāḥ sarve samāgatāḥ
- 6
अश्वत्थामा च भोजश्च सर्वशस्त्रभृतां वरौ
समवेतौ महात्मानौ त्वदर्थे समलंकृतौ
aśvatthāmā ca bhojaśca sarvaśastrabhṛtāṃ varau
samavetau mahātmānau tvadarthe samalaṃkṛtau
- 7
बृहन्तो मणिमांश्चैव दण्डधारश्च वीर्यवान्
सहदेवो जयत्सेनो मेघसंधिश्च मागधः
bṛhanto maṇimāṃścaiva daṇḍadhāraśca vīryavān
sahadevo jayatseno meghasaṃdhiśca māgadhaḥ
- 8
विराटः सह पुत्राभ्यां शङ्खेनैवोत्तरेण च
वार्धक्षेमिः सुवर्चाश्च सेनाबिन्दुश्च पार्थिवः
virāṭaḥ saha putrābhyāṃ śaṅkhenaivottareṇa ca
vārdhakṣemiḥ suvarcāśca senābinduśca pārthivaḥ
- 9
अभिभूः सह पुत्रेण सुदाम्ना च सुवर्चसा
सुमित्रः सुकुमारश्च वृकः सत्यधृतिस्तथा
abhibhūḥ saha putreṇa sudāmnā ca suvarcasā
sumitraḥ sukumāraśca vṛkaḥ satyadhṛtistathā
- 10
सूर्यध्वजो रोचमानो नीलश्चित्रायुधस्तथा
अंशुमांश्चेकितानश्च श्रेणिमांश्च महाबलः
sūryadhvajo rocamāno nīlaścitrāyudhastathā
aṃśumāṃścekitānaśca śreṇimāṃśca mahābalaḥ
- 11
समुद्रसेनपुत्रश्च चन्द्रसेनः प्रतापवान्
जलसंधः पितापुत्रौ सुदण्डो दण्ड एव च
samudrasenaputraśca candrasenaḥ pratāpavān
jalasaṃdhaḥ pitāputrau sudaṇḍo daṇḍa eva ca
- 12
पौण्ड्रको वासुदेवश्च भगदत्तश्च वीर्यवान्
कलिङ्गस्ताम्रलिप्तश्च पत्तनाधिपतिस्तथा
pauṇḍrako vāsudevaśca bhagadattaśca vīryavān
kaliṅgastāmraliptaśca pattanādhipatistathā
- 13
मद्रराजस्तथा शल्यः सहपुत्रो महारथः
रुक्माङ्गदेन वीरेण तथा रुक्मरथेन च
madrarājastathā śalyaḥ sahaputro mahārathaḥ
rukmāṅgadena vīreṇa tathā rukmarathena ca
- 14
कौरव्यः सोमदत्तश्च पुत्राश्चास्य महारथाः
समवेतास्त्रयः शूरा भूरिर्भूरिश्रवाः शलः
kauravyaḥ somadattaśca putrāścāsya mahārathāḥ
samavetāstrayaḥ śūrā bhūrirbhūriśravāḥ śalaḥ
- 15
सुदक्षिणश्च काम्बोजो दृढधन्वा च कौरवः
बृहद्बलः सुषेणश्च शिबिर् औशीनरस्तथा
पटच्चरनिहन्ता च कारूषाधिपतिस्तथा
पाण्ड्यकेरलचोलेन्द्रास्त्रयस्त्रेताग्नयो यथा
आसनेषु विराजन्ते आशाम् आगस्त्यम् आश्रिताः
sudakṣiṇaśca kāmbojo dṛḍhadhanvā ca kauravaḥ
bṛhadbalaḥ suṣeṇaśca śibir auśīnarastathā
paṭaccaranihantā ca kārūṣādhipatistathā
pāṇḍyakeralacolendrāstrayastretāgnayo yathā
āsaneṣu virājante āśām āgastyam āśritāḥ
- 16
संकर्षणो वासुदेवो रौक्मिणेयश्च वीर्यवान्
साम्बश्च चारुदेष्णश्च सारणो ऽथ गदस्तथा
saṃkarṣaṇo vāsudevo raukmiṇeyaśca vīryavān
sāmbaśca cārudeṣṇaśca sāraṇo 'tha gadastathā
- 17
अक्रूरः सात्यकिश्चैव उद्धवश्च महाबलः
कृतवर्मा च हार्दिक्यः पृथुर्विपृथुर् एव च
akrūraḥ sātyakiścaiva uddhavaśca mahābalaḥ
kṛtavarmā ca hārdikyaḥ pṛthurvipṛthur eva ca
- 18
विडूरथश्च कङ्कश्च समीकः सारमेजयः
ये चान्ये यादवास्तथा
आगतास्तव हेतोश्च कृष्णे जानीहि सत्वरम्
कृतवर्मा च हार्दिक्यः
शङ्कुश्च सगवेषणः
आशावहो ऽनिरुद्धश्च
वीरो वातपतिश्चैव झिल्ली पिण्डारकस्तथा
उशीनरश्च विक्रान्तो वृष्णयस्ते प्रकीर्तिताः
viḍūrathaśca kaṅkaśca samīkaḥ sāramejayaḥ
ye cānye yādavāstathā
āgatāstava hetośca kṛṣṇe jānīhi satvaram
kṛtavarmā ca hārdikyaḥ
śaṅkuśca sagaveṣaṇaḥ
āśāvaho 'niruddhaśca
vīro vātapatiścaiva jhillī piṇḍārakastathā
uśīnaraśca vikrānto vṛṣṇayaste prakīrtitāḥ
- 19
भगीरथो बृहत्क्षत्रः सैन्धवश्च जयद्रथः
बृहद्रथो बाह्लिकश्च श्रुतायुश्च महारथः
bhagīratho bṛhatkṣatraḥ saindhavaśca jayadrathaḥ
bṛhadratho bāhlikaśca śrutāyuśca mahārathaḥ
- 20
उलूकः कैतवो राजा चित्राङ्गदशुभाङ्गदौ
वत्सराजश्च धृतिमान्कोसलाधिपतिस्तथा
कर्णश्च सह पुत्रेण वृषसेनेन वीर्यवान्
बृहद्बलश्च बलवान्राजा चैवाथ दुर्जयः
दमघोषात्मजश्चैव शिशुपालो महाबलः
चेदीनाम् अधिपो वीरो बलवान् अन्तकोपमः
प्राच्योदीच्याः प्रतीच्याश्च दाक्षिणात्याः क्षितीश्वराः
शिशुपालश्च विक्रान्तो जरासंधस्तथैव च
ulūkaḥ kaitavo rājā citrāṅgadaśubhāṅgadau
vatsarājaśca dhṛtimānkosalādhipatistathā
karṇaśca saha putreṇa vṛṣasenena vīryavān
bṛhadbalaśca balavānrājā caivātha durjayaḥ
damaghoṣātmajaścaiva śiśupālo mahābalaḥ
cedīnām adhipo vīro balavān antakopamaḥ
prācyodīcyāḥ pratīcyāśca dākṣiṇātyāḥ kṣitīśvarāḥ
śiśupālaśca vikrānto jarāsaṃdhastathaiva ca
- 21
एते चान्ये च बहवो नानाजनपदेश्वराः
त्वदर्थम् आगता भद्रे क्षत्रियाः प्रथिता भुवि
ete cānye ca bahavo nānājanapadeśvarāḥ
tvadartham āgatā bhadre kṣatriyāḥ prathitā bhuvi
- 22
एते वेत्स्यन्ति विक्रान्तास्त्वदर्थं लक्ष्यम् उत्तमम्
विध्येत य इमं लक्ष्यं वरयेथाः शुभे ऽद्य तम्
ete vetsyanti vikrāntāstvadarthaṃ lakṣyam uttamam
vidhyeta ya imaṃ lakṣyaṃ varayethāḥ śubhe 'dya tam

