12 shlokas
- 1
जनमेजय उवाच
ते तथा पुरुषव्याघ्रा निहत्य बकराक्षसम्
अत ऊर्ध्वं ततो ब्रह्मन्किम् अकुर्वत पाण्डवाः
janamejaya uvāca
te tathā puruṣavyāghrā nihatya bakarākṣasam
ata ūrdhvaṃ tato brahmankim akurvata pāṇḍavāḥ
- 2
वैशंपायन उवाच
तत्रैव न्यवसन्राजन्निहत्य बकराक्षसम्
अधीयानाः परं ब्रह्म ब्राह्मणस्य निवेशने
vaiśaṃpāyana uvāca
tatraiva nyavasanrājannihatya bakarākṣasam
adhīyānāḥ paraṃ brahma brāhmaṇasya niveśane
- 3
ततः कतिपयाहस्य ब्राह्मणः संशितव्रतः
प्रतिश्रयार्थं तद्वेश्म ब्राह्मणस्याजगाम ह
tataḥ katipayāhasya brāhmaṇaḥ saṃśitavrataḥ
pratiśrayārthaṃ tadveśma brāhmaṇasyājagāma ha
- 4
स सम्यक्पूजयित्वा तं विद्वान्विप्रर्षभस्तदा
ददौ प्रतिश्रयं तस्मै सदा सर्वातिथिव्रती
sa samyakpūjayitvā taṃ vidvānviprarṣabhastadā
dadau pratiśrayaṃ tasmai sadā sarvātithivratī
- 5
ततस्ते पाण्डवाः सर्वे सह कुन्त्या नरर्षभाः
उपासांचक्रिरे विप्रं कथयानं कथास्तदा
tataste pāṇḍavāḥ sarve saha kuntyā nararṣabhāḥ
upāsāṃcakrire vipraṃ kathayānaṃ kathāstadā
- 6
कथयामास देशान्स तीर्थानि विविधानि च
राज्ञां च विविधाश्चर्याः पुराणि विविधानि च
kathayāmāsa deśānsa tīrthāni vividhāni ca
rājñāṃ ca vividhāścaryāḥ purāṇi vividhāni ca
- 7
स तत्राकथयद्विप्रः कथान्ते जनमेजय
पाञ्चालेष्वद्भुताकारं याज्ञसेन्याः स्वयंवरम्
sa tatrākathayadvipraḥ kathānte janamejaya
pāñcāleṣvadbhutākāraṃ yājñasenyāḥ svayaṃvaram
- 8
धृष्टद्युम्नस्य चोत्पत्तिम् उत्पत्तिं च शिखण्डिनः
अयोनिजत्वं कृष्णाया द्रुपदस्य महामखे
dhṛṣṭadyumnasya cotpattim utpattiṃ ca śikhaṇḍinaḥ
ayonijatvaṃ kṛṣṇāyā drupadasya mahāmakhe
- 9
तद् अद्भुततमं श्रुत्वा लोके तस्य महात्मनः
विस्तरेणैव पप्रच्छुः कथां तां पुरुषर्षभाः
tad adbhutatamaṃ śrutvā loke tasya mahātmanaḥ
vistareṇaiva papracchuḥ kathāṃ tāṃ puruṣarṣabhāḥ
- 10
कथं द्रुपदपुत्रस्य धृष्टद्युम्नस्य पावकात्
वेदिमध्याच्च कृष्णायाः संभवः कथम् अद्भुतः
kathaṃ drupadaputrasya dhṛṣṭadyumnasya pāvakāt
vedimadhyācca kṛṣṇāyāḥ saṃbhavaḥ katham adbhutaḥ
- 11
कथं द्रोणान्महेष्वासात्सर्वाण्यस्त्राण्यशिक्षत
धृष्टद्युम्नो महेष्वासः कथं द्रोणस्य मृत्युदः
कथं प्रियसखायौ तौ भिन्नौ कस्य कृतेन च
kathaṃ droṇānmaheṣvāsātsarvāṇyastrāṇyaśikṣata
dhṛṣṭadyumno maheṣvāsaḥ kathaṃ droṇasya mṛtyudaḥ
kathaṃ priyasakhāyau tau bhinnau kasya kṛtena ca
- 12
एवं तैश्चोदितो राजन्स विप्रः पुरुषर्षभैः
कथयामास तत्सर्वं द्रौपदीसंभवं तदा
evaṃ taiścodito rājansa vipraḥ puruṣarṣabhaiḥ
kathayāmāsa tatsarvaṃ draupadīsaṃbhavaṃ tadā

