20 shlokas
- 1
वैशंपायन उवाच
ततस्ते नरशार्दूला भ्रातरः पञ्च पाण्डवाः
ब्रह्मरूपधराः पार्था जटिला ब्रह्मचारिणः
प्रययुर्द्रौपदीं द्रष्टुं तं च देवमहोत्सवम्
vaiśaṃpāyana uvāca
tataste naraśārdūlā bhrātaraḥ pañca pāṇḍavāḥ
brahmarūpadharāḥ pārthā jaṭilā brahmacāriṇaḥ
prayayurdraupadīṃ draṣṭuṃ taṃ ca devamahotsavam
- 2
ते प्रयाता नरव्याघ्रा मात्रा सह परंतपाः
ब्राह्मणान्ददृशुर्मार्गे गच्छतः सगणान्बहून्
te prayātā naravyāghrā mātrā saha paraṃtapāḥ
brāhmaṇāndadṛśurmārge gacchataḥ sagaṇānbahūn
- 3
तान् ऊचुर्ब्राह्मणा राजन्पाण्डवान्ब्रह्मचारिणः
क्व भवन्तो गमिष्यन्ति कुतो वागच्छतेति ह
tān ūcurbrāhmaṇā rājanpāṇḍavānbrahmacāriṇaḥ
kva bhavanto gamiṣyanti kuto vāgacchateti ha
- 4
युधिष्ठिर उवाच
आगतान् एकचक्रायाः सोदर्यान्देवदर्शिनः
भवन्तो हि विजानन्तु सहितान्मातृचारिणः
yudhiṣṭhira uvāca
āgatān ekacakrāyāḥ sodaryāndevadarśinaḥ
bhavanto hi vijānantu sahitānmātṛcāriṇaḥ
- 5
ब्राह्मणा ऊचुः
गच्छताद्यैव पाञ्चालान्द्रुपदस्य निवेशनम्
स्वयंवरो महांस्तत्र भविता सुमहाधनः
brāhmaṇā ūcuḥ
gacchatādyaiva pāñcālāndrupadasya niveśanam
svayaṃvaro mahāṃstatra bhavitā sumahādhanaḥ
- 6
एकसार्थं प्रयाताः स्मो वयम् अप्यत्र गामिनः
तत्र ह्यद्भुतसंकाशो भविता सुमहोत्सवः
ekasārthaṃ prayātāḥ smo vayam apyatra gāminaḥ
tatra hyadbhutasaṃkāśo bhavitā sumahotsavaḥ
- 7
यज्ञसेनस्य दुहिता द्रुपदस्य महात्मनः
वेदीमध्यात्समुत्पन्ना पद्मपत्रनिभेक्षणा
yajñasenasya duhitā drupadasya mahātmanaḥ
vedīmadhyātsamutpannā padmapatranibhekṣaṇā
- 8
दर्शनीयानवद्याङ्गी सुकुमारी मनस्विनी
धृष्टद्युम्नस्य भगिनी द्रोणशत्रोः प्रतापिनः
darśanīyānavadyāṅgī sukumārī manasvinī
dhṛṣṭadyumnasya bhaginī droṇaśatroḥ pratāpinaḥ
- 9
यो जातः कवची खड्गी सशरः सशरासनः
सुसमिद्धे महाबाहुः पावके पावकप्रभः
यस्मिन्संजायमाने च वाग् उवाचाशरीरिणी
एष शिष्यश्च मृत्युश्च भरद्वाजस्य जायते
yo jātaḥ kavacī khaḍgī saśaraḥ saśarāsanaḥ
susamiddhe mahābāhuḥ pāvake pāvakaprabhaḥ
yasminsaṃjāyamāne ca vāg uvācāśarīriṇī
eṣa śiṣyaśca mṛtyuśca bharadvājasya jāyate
- 10
स्वसा तस्यानवद्याङ्गी द्रौपदी तनुमध्यमा
नीलोत्पलसमो गन्धो यस्याः क्रोशात्प्रवायति
svasā tasyānavadyāṅgī draupadī tanumadhyamā
nīlotpalasamo gandho yasyāḥ krośātpravāyati
- 11
तां यज्ञसेनस्य सुतां स्वयंवरकृतक्षणाम्
गच्छामहे वयं द्रष्टुं तं च देवमहोत्सवम्
tāṃ yajñasenasya sutāṃ svayaṃvarakṛtakṣaṇām
gacchāmahe vayaṃ draṣṭuṃ taṃ ca devamahotsavam
- 12
राजानो राजपुत्राश्च यज्वानो भूरिदक्षिणाः
स्वाध्यायवन्तः शुचयो महात्मानो यतव्रताः
rājāno rājaputrāśca yajvāno bhūridakṣiṇāḥ
svādhyāyavantaḥ śucayo mahātmāno yatavratāḥ
- 13
तरुणा दर्शनीयाश्च नानादेशसमागताः
महारथाः कृतास्त्राश्च समुपैष्यन्ति भूमिपाः
taruṇā darśanīyāśca nānādeśasamāgatāḥ
mahārathāḥ kṛtāstrāśca samupaiṣyanti bhūmipāḥ
- 14
ते तत्र विविधान्दायान्विजयार्थं नरेश्वराः
प्रदास्यन्ति धनं गाश्च भक्ष्यं भोज्यं च सर्वशः
te tatra vividhāndāyānvijayārthaṃ nareśvarāḥ
pradāsyanti dhanaṃ gāśca bhakṣyaṃ bhojyaṃ ca sarvaśaḥ
- 15
प्रतिगृह्य च तत्सर्वं दृष्ट्वा चैव स्वयंवरम्
अनुभूयोत्सवं चैव गमिष्यामो यथेप्सितम्
pratigṛhya ca tatsarvaṃ dṛṣṭvā caiva svayaṃvaram
anubhūyotsavaṃ caiva gamiṣyāmo yathepsitam
- 16
नटा वैतालिकाश्चैव नर्तकाः सूतमागधाः
नियोधकाश्च देशेभ्यः समेष्यन्ति महाबलाः
naṭā vaitālikāścaiva nartakāḥ sūtamāgadhāḥ
niyodhakāśca deśebhyaḥ sameṣyanti mahābalāḥ
- 17
एवं कौतूहलं कृत्वा दृष्ट्वा च प्रतिगृह्य च
सहास्माभिर्महात्मानः पुनः प्रतिनिवर्त्स्यथ
evaṃ kautūhalaṃ kṛtvā dṛṣṭvā ca pratigṛhya ca
sahāsmābhirmahātmānaḥ punaḥ pratinivartsyatha
- 18
दर्शनीयांश्च वः सर्वान्देवरूपान् अवस्थितान्
समीक्ष्य कृष्णा वरयेत्संगत्यान्यतमं वरम्
darśanīyāṃśca vaḥ sarvāndevarūpān avasthitān
samīkṣya kṛṣṇā varayetsaṃgatyānyatamaṃ varam
- 19
अयं भ्राता तव श्रीमान्दर्शनीयो महाभुजः
नियुध्यमानो विजयेत्संगत्या द्रविणं बहु
आहरिष्यन्न् अयं नूनं प्रीतिं वो वर्धयिष्यति
ayaṃ bhrātā tava śrīmāndarśanīyo mahābhujaḥ
niyudhyamāno vijayetsaṃgatyā draviṇaṃ bahu
āhariṣyann ayaṃ nūnaṃ prītiṃ vo vardhayiṣyati
- 20
युधिष्ठिर उवाच
परमं भो गमिष्यामो द्रष्टुं देवमहोत्सवम्
भवद्भिः सहिताः सर्वे कन्यायास्तं स्वयंवरम्
yudhiṣṭhira uvāca
paramaṃ bho gamiṣyāmo draṣṭuṃ devamahotsavam
bhavadbhiḥ sahitāḥ sarve kanyāyāstaṃ svayaṃvaram

