21 shlokas
- 1
धृतराष्ट्र उवाच
उपप्लव्याद् इह क्षत्तर् उपयातो जनार्दनः
वृकस्थले निवसति स च प्रातर् इहेष्यति
dhṛtarāṣṭra uvāca
upaplavyād iha kṣattar upayāto janārdanaḥ
vṛkasthale nivasati sa ca prātar iheṣyati
- 2
आहुकानाम् अधिपतिः पुरोगः सर्वसात्वताम्
महामना महावीर्यो महामात्रो जनार्दनः
āhukānām adhipatiḥ purogaḥ sarvasātvatām
mahāmanā mahāvīryo mahāmātro janārdanaḥ
- 3
स्फीतस्य वृष्णिवंशस्य भर्ता गोप्ता च माधवः
त्रयाणाम् अपि लोकानां भगवान्प्रपितामहः
sphītasya vṛṣṇivaṃśasya bhartā goptā ca mādhavaḥ
trayāṇām api lokānāṃ bhagavānprapitāmahaḥ
- 4
वृष्ण्यन्धकाः सुमनसो यस्य प्रज्ञाम् उपासते
आदित्या वसवो रुद्रा यथा बुद्धिं बृहस्पतेः
vṛṣṇyandhakāḥ sumanaso yasya prajñām upāsate
ādityā vasavo rudrā yathā buddhiṃ bṛhaspateḥ
- 5
तस्मै पूजां प्रयोक्ष्यामि दाशार्हाय महात्मने
प्रत्यक्षं तव धर्मज्ञ तन्मे कथयतः शृणु
tasmai pūjāṃ prayokṣyāmi dāśārhāya mahātmane
pratyakṣaṃ tava dharmajña tanme kathayataḥ śṛṇu
- 6
एकवर्णैः सुकृष्णाङ्गैर्बाह्लिजातैर्हयोत्तमैः
चतुर्युक्तान्रथांस्तस्मै रौक्मान्दास्यामि षोडश
ekavarṇaiḥ sukṛṣṇāṅgairbāhlijātairhayottamaiḥ
caturyuktānrathāṃstasmai raukmāndāsyāmi ṣoḍaśa
- 7
नित्यप्रभिन्नान्मातङ्गान् ईषादन्तान्प्रहारिणः
अष्टानुचरम् एकैकम् अष्टौ दास्यामि केशवे
nityaprabhinnānmātaṅgān īṣādantānprahāriṇaḥ
aṣṭānucaram ekaikam aṣṭau dāsyāmi keśave
- 8
दासीनाम् अप्रजातानां शुभानां रुक्मवर्चसाम्
शतम् अस्मै प्रदास्यामि दासानाम् अपि तावतः
dāsīnām aprajātānāṃ śubhānāṃ rukmavarcasām
śatam asmai pradāsyāmi dāsānām api tāvataḥ
- 9
आविकं बहु सुस्पर्शं पार्वतीयैर् उपाहृतम्
तद् अप्यस्मै प्रदास्यामि सहस्राणि दशाष्ट च
āvikaṃ bahu susparśaṃ pārvatīyair upāhṛtam
tad apyasmai pradāsyāmi sahasrāṇi daśāṣṭa ca
- 10
अजिनानां सहस्राणि चीनदेशोद्भवानि च
तान्यप्यस्मै प्रदास्यामि यावद् अर्हति केशवः
ajinānāṃ sahasrāṇi cīnadeśodbhavāni ca
tānyapyasmai pradāsyāmi yāvad arhati keśavaḥ
- 11
दिवा रात्रौ च भात्येष सुतेजा विमलो मणिः
तम् अप्यस्मै प्रदास्यामि तम् अप्यर्हति केशवः
divā rātrau ca bhātyeṣa sutejā vimalo maṇiḥ
tam apyasmai pradāsyāmi tam apyarhati keśavaḥ
- 12
एकेनापि पतत्यह्ना योजनानि चतुर्दश
यानम् अश्वतरीयुक्तं दास्ये तस्मै तद् अप्यहम्
ekenāpi patatyahnā yojanāni caturdaśa
yānam aśvatarīyuktaṃ dāsye tasmai tad apyaham
- 13
यावन्ति वाहनान्यस्य यावन्तः पुरुषाश्च ते
ततो ऽष्टगुणम् अप्यस्मै भोज्यं दास्याम्यहं सदा
yāvanti vāhanānyasya yāvantaḥ puruṣāśca te
tato 'ṣṭaguṇam apyasmai bhojyaṃ dāsyāmyahaṃ sadā
- 14
मम पुत्राश्च पौत्राश्च सर्वे दुर्योधनाद् ऋते
प्रत्युद्यास्यन्ति दाशार्हं रथैर्मृष्टैर् अलंकृताः
mama putrāśca pautrāśca sarve duryodhanād ṛte
pratyudyāsyanti dāśārhaṃ rathairmṛṣṭair alaṃkṛtāḥ
- 15
स्वलंकृताश्च कल्याण्यः पादैर् एव सहस्रशः
वारमुख्या महाभागं प्रत्युद्यास्यन्ति केशवम्
svalaṃkṛtāśca kalyāṇyaḥ pādair eva sahasraśaḥ
vāramukhyā mahābhāgaṃ pratyudyāsyanti keśavam
- 16
नगराद् अपि याः काश्चिद्गमिष्यन्ति जनार्दनम्
द्रष्टुं कन्याश्च कल्याण्यस्ताश्च यास्यन्त्यनावृताः
nagarād api yāḥ kāścidgamiṣyanti janārdanam
draṣṭuṃ kanyāśca kalyāṇyastāśca yāsyantyanāvṛtāḥ
- 17
सस्त्रीपुरुषबालं हि नगरं मधुसूदनम्
उदीक्षते महात्मानं भानुमन्तम् इव प्रजाः
sastrīpuruṣabālaṃ hi nagaraṃ madhusūdanam
udīkṣate mahātmānaṃ bhānumantam iva prajāḥ
- 18
महाध्वजपताकाश्च क्रियन्तां सर्वतोदिशम्
जलावसिक्तो विरजाः पन्थास्तस्येति चान्वशात्
mahādhvajapatākāśca kriyantāṃ sarvatodiśam
jalāvasikto virajāḥ panthāstasyeti cānvaśāt
- 19
दुःशासनस्य च गृहं दुर्योधनगृहाद्वरम्
तद् अस्य क्रियतां क्षिप्रं सुसंमृष्टम् अलंकृतम्
duḥśāsanasya ca gṛhaṃ duryodhanagṛhādvaram
tad asya kriyatāṃ kṣipraṃ susaṃmṛṣṭam alaṃkṛtam
- 20
एतद्धि रुचिराकारैः प्रासादैर् उपशोभितम्
शिवं च रमणीयं च सर्वर्तु सुमहाधनम्
etaddhi rucirākāraiḥ prāsādair upaśobhitam
śivaṃ ca ramaṇīyaṃ ca sarvartu sumahādhanam
- 21
सर्वम् अस्मिन्गृहे रत्नं मम दुर्योधनस्य च
यद्यद् अर्हेत्स वार्ष्णेयस्तत्तद्देयम् असंशयम्
sarvam asmingṛhe ratnaṃ mama duryodhanasya ca
yadyad arhetsa vārṣṇeyastattaddeyam asaṃśayam

