23 shlokas
- 1
नारद उवाच
गालवं वैनतेयो ऽथ प्रहसन्न् इदम् अब्रवीत्
दिष्ट्या कृतार्थं पश्यामि भवन्तम् इह वै द्विज
nārada uvāca
gālavaṃ vainateyo 'tha prahasann idam abravīt
diṣṭyā kṛtārthaṃ paśyāmi bhavantam iha vai dvija
- 2
गालवस्तु वचः श्रुत्वा वैनतेयेन भाषितम्
चतुर्भागावशिष्टं तद् आचख्यौ कार्यम् अस्य हि
gālavastu vacaḥ śrutvā vainateyena bhāṣitam
caturbhāgāvaśiṣṭaṃ tad ācakhyau kāryam asya hi
- 3
सुपर्णस्त्वब्रवीद् एनं गालवं पततां वरः
प्रयत्नस्ते न कर्तव्यो नैष सम्पत्स्यते तव
suparṇastvabravīd enaṃ gālavaṃ patatāṃ varaḥ
prayatnaste na kartavyo naiṣa sampatsyate tava
- 4
पुरा हि कन्यकुब्जे वै गाधेः सत्यवतीं सुताम्
भार्यार्थे ऽवरयत्कन्याम् ऋचीकस्तेन भाषितः
purā hi kanyakubje vai gādheḥ satyavatīṃ sutām
bhāryārthe 'varayatkanyām ṛcīkastena bhāṣitaḥ
- 5
एकतः श्यामकर्णानां हयानां चन्द्रवर्चसाम्
भगवन्दीयतां मह्यं सहस्रम् इति गालव
ekataḥ śyāmakarṇānāṃ hayānāṃ candravarcasām
bhagavandīyatāṃ mahyaṃ sahasram iti gālava
- 6
ऋचीकस्तु तथेत्युक्त्वा वरुणस्यालयं गतः
अश्वतीर्थे हयांल्लब्ध्वा दत्तवान्पार्थिवाय वै
ṛcīkastu tathetyuktvā varuṇasyālayaṃ gataḥ
aśvatīrthe hayāṃllabdhvā dattavānpārthivāya vai
- 7
इष्ट्वा ते पुण्डरीकेण दत्ता राज्ञा द्विजातिषु
तेभ्यो द्वे द्वे शते क्रीत्वा प्राप्तास्ते पार्थिवैस्तदा
iṣṭvā te puṇḍarīkeṇa dattā rājñā dvijātiṣu
tebhyo dve dve śate krītvā prāptāste pārthivaistadā
- 8
अपराण्यपि चत्वारि शतानि द्विजसत्तम
नीयमानानि संतारे हृतान्यासन्वितस्तया
एवं न शक्यम् अप्राप्यं प्राप्तुं गालव कर्हिचित्
aparāṇyapi catvāri śatāni dvijasattama
nīyamānāni saṃtāre hṛtānyāsanvitastayā
evaṃ na śakyam aprāpyaṃ prāptuṃ gālava karhicit
- 9
इमाम् अश्वशताभ्यां वै द्वाभ्यां तस्मै निवेदय
विश्वामित्राय धर्मात्मन्षड्भिर् अश्वशतैः सह
ततो ऽसि गतसंमोहः कृतकृत्यो द्विजर्षभ
imām aśvaśatābhyāṃ vai dvābhyāṃ tasmai nivedaya
viśvāmitrāya dharmātmanṣaḍbhir aśvaśataiḥ saha
tato 'si gatasaṃmohaḥ kṛtakṛtyo dvijarṣabha
- 10
गालवस्तं तथेत्युक्त्वा सुपर्णसहितस्ततः
आदायाश्वांश्च कन्यां च विश्वामित्रम् उपागमत्
gālavastaṃ tathetyuktvā suparṇasahitastataḥ
ādāyāśvāṃśca kanyāṃ ca viśvāmitram upāgamat
- 11
गालव उवाच
अश्वानां काङ्क्षितार्थानां षड् इमानि शतानि वै
शतद्वयेन कन्येयं भवता प्रतिगृह्यताम्
gālava uvāca
aśvānāṃ kāṅkṣitārthānāṃ ṣaḍ imāni śatāni vai
śatadvayena kanyeyaṃ bhavatā pratigṛhyatām
- 12
अस्यां राजर्षिभिः पुत्रा जाता वै धार्मिकास्त्रयः
चतुर्थं जनयत्वेकं भवान् अपि नरोत्तम
asyāṃ rājarṣibhiḥ putrā jātā vai dhārmikāstrayaḥ
caturthaṃ janayatvekaṃ bhavān api narottama
- 13
पूर्णान्येवं शतान्यष्टौ तुरगाणां भवन्तु ते
भवतो ह्यनृणो भूत्वा तपः कुर्यां यथासुखम्
pūrṇānyevaṃ śatānyaṣṭau turagāṇāṃ bhavantu te
bhavato hyanṛṇo bhūtvā tapaḥ kuryāṃ yathāsukham
- 14
नारद उवाच
विश्वामित्रस्तु तं दृष्ट्वा गालवं सह पक्षिणा
कन्यां च तां वरारोहाम् इदम् इत्यब्रवीद्वचः
nārada uvāca
viśvāmitrastu taṃ dṛṣṭvā gālavaṃ saha pakṣiṇā
kanyāṃ ca tāṃ varārohām idam ityabravīdvacaḥ
- 15
किम् इयं पूर्वम् एवेह न दत्ता मम गालव
पुत्रा ममैव चत्वारो भवेयुः कुलभावनाः
kim iyaṃ pūrvam eveha na dattā mama gālava
putrā mamaiva catvāro bhaveyuḥ kulabhāvanāḥ
- 16
प्रतिगृह्णामि ते कन्याम् एकपुत्रफलाय वै
अश्वाश्चाश्रमम् आसाद्य तिष्ठन्तु मम सर्वशः
pratigṛhṇāmi te kanyām ekaputraphalāya vai
aśvāścāśramam āsādya tiṣṭhantu mama sarvaśaḥ
- 17
स तया रममाणो ऽथ विश्वामित्रो महाद्युतिः
आत्मजं जनयामास माधवीपुत्रम् अष्टकम्
sa tayā ramamāṇo 'tha viśvāmitro mahādyutiḥ
ātmajaṃ janayāmāsa mādhavīputram aṣṭakam
- 18
जातमात्रं सुतं तं च विश्वामित्रो महाद्युतिः
संयोज्यार्थैस्तथा धर्मैर् अश्वैस्तैः समयोजयत्
jātamātraṃ sutaṃ taṃ ca viśvāmitro mahādyutiḥ
saṃyojyārthaistathā dharmair aśvaistaiḥ samayojayat
- 19
अथाष्टकः पुरं प्रायात्तदा सोमपुरप्रभम्
निर्यात्य कन्यां शिष्याय कौशिको ऽपि वनं ययौ
athāṣṭakaḥ puraṃ prāyāttadā somapuraprabham
niryātya kanyāṃ śiṣyāya kauśiko 'pi vanaṃ yayau
- 20
गालवो ऽपि सुपर्णेन सह निर्यात्य दक्षिणाम्
मनसाभिप्रतीतेन कन्याम् इदम् उवाच ह
gālavo 'pi suparṇena saha niryātya dakṣiṇām
manasābhipratītena kanyām idam uvāca ha
- 21
जातो दानपतिः पुत्रस्त्वया शूरस्तथापरः
सत्यधर्मरतश्चान्यो यज्वा चापि तथापरः
jāto dānapatiḥ putrastvayā śūrastathāparaḥ
satyadharmarataścānyo yajvā cāpi tathāparaḥ
- 22
तद् आगच्छ वरारोहे तारितस्ते पिता सुतैः
चत्वारश्चैव राजानस्तथाहं च सुमध्यमे
tad āgaccha varārohe tāritaste pitā sutaiḥ
catvāraścaiva rājānastathāhaṃ ca sumadhyame
- 23
गालवस्त्वभ्यनुज्ञाय सुपर्णं पन्नगाशनम्
पितुर्निर्यात्य तां कन्यां प्रययौ वनम् एव ह
gālavastvabhyanujñāya suparṇaṃ pannagāśanam
piturniryātya tāṃ kanyāṃ prayayau vanam eva ha

