18 shlokas
- 1
भीष्म उवाच
ततो ऽहं निशि राजेन्द्र प्रणम्य शिरसा तदा
ब्राह्मणानां पितॄणां च देवतानां च सर्वशः
bhīṣma uvāca
tato 'haṃ niśi rājendra praṇamya śirasā tadā
brāhmaṇānāṃ pitṝṇāṃ ca devatānāṃ ca sarvaśaḥ
- 2
नक्तंचराणां भूतानां रजन्याश्च विशां पते
शयनं प्राप्य रहिते मनसा समचिन्तयम्
naktaṃcarāṇāṃ bhūtānāṃ rajanyāśca viśāṃ pate
śayanaṃ prāpya rahite manasā samacintayam
- 3
जामदग्न्येन मे युद्धम् इदं परमदारुणम्
अहानि सुबहून्यद्य वर्तते सुमहात्ययम्
jāmadagnyena me yuddham idaṃ paramadāruṇam
ahāni subahūnyadya vartate sumahātyayam
- 4
न च रामं महावीर्यं शक्नोमि रणमूर्धनि
विजेतुं समरे विप्रं जामदग्न्यं महाबलम्
na ca rāmaṃ mahāvīryaṃ śaknomi raṇamūrdhani
vijetuṃ samare vipraṃ jāmadagnyaṃ mahābalam
- 5
यदि शक्यो मया जेतुं जामदग्न्यः प्रतापवान्
दैवतानि प्रसन्नानि दर्शयन्तु निशां मम
yadi śakyo mayā jetuṃ jāmadagnyaḥ pratāpavān
daivatāni prasannāni darśayantu niśāṃ mama
- 6
ततो ऽहं निशि राजेन्द्र प्रसुप्तः शरविक्षतः
दक्षिणेनैव पार्श्वेन प्रभातसमये इव
tato 'haṃ niśi rājendra prasuptaḥ śaravikṣataḥ
dakṣiṇenaiva pārśvena prabhātasamaye iva
- 7
ततो ऽहं विप्रमुख्यैस्तैर्यैर् अस्मि पतितो रथात्
उत्थापितो धृतश्चैव मा भैर् इति च सान्त्वितः
tato 'haṃ vipramukhyaistairyair asmi patito rathāt
utthāpito dhṛtaścaiva mā bhair iti ca sāntvitaḥ
- 8
त एव मां महाराज स्वप्नदर्शनम् एत्य वै
परिवार्याब्रुवन्वाक्यं तन्निबोध कुरूद्वह
ta eva māṃ mahārāja svapnadarśanam etya vai
parivāryābruvanvākyaṃ tannibodha kurūdvaha
- 9
उत्तिष्ठ मा भैर्गाङ्गेय भयं ते नास्ति किंचन
रक्षामहे नरव्याघ्र स्वशरीरं हि नो भवान्
uttiṣṭha mā bhairgāṅgeya bhayaṃ te nāsti kiṃcana
rakṣāmahe naravyāghra svaśarīraṃ hi no bhavān
- 10
न त्वां रामो रणे जेता जामदग्न्यः कथंचन
त्वम् एव समरे रामं विजेता भरतर्षभ
na tvāṃ rāmo raṇe jetā jāmadagnyaḥ kathaṃcana
tvam eva samare rāmaṃ vijetā bharatarṣabha
- 11
इदम् अस्त्रं सुदयितं प्रत्यभिज्ञास्यते भवान्
विदितं हि तवाप्येतत्पूर्वस्मिन्देहधारणे
idam astraṃ sudayitaṃ pratyabhijñāsyate bhavān
viditaṃ hi tavāpyetatpūrvasmindehadhāraṇe
- 12
प्राजापत्यं विश्वकृतं प्रस्वापं नाम भारत
न हीदं वेद रामो ऽपि पृथिव्यां वा पुमान्क्वचित्
prājāpatyaṃ viśvakṛtaṃ prasvāpaṃ nāma bhārata
na hīdaṃ veda rāmo 'pi pṛthivyāṃ vā pumānkvacit
- 13
तत्स्मरस्व महाबाहो भृशं संयोजयस्व च
न च रामः क्षयं गन्ता तेनास्त्रेण नराधिप
tatsmarasva mahābāho bhṛśaṃ saṃyojayasva ca
na ca rāmaḥ kṣayaṃ gantā tenāstreṇa narādhipa
- 14
एनसा च न योगं त्वं प्राप्स्यसे जातु मानद
स्वप्स्यते जामदग्न्यो ऽसौ त्वद्बाणबलपीडितः
enasā ca na yogaṃ tvaṃ prāpsyase jātu mānada
svapsyate jāmadagnyo 'sau tvadbāṇabalapīḍitaḥ
- 15
ततो जित्वा त्वम् एवैनं पुनर् उत्थापयिष्यसि
अस्त्रेण दयितेनाजौ भीष्म संबोधनेन वै
tato jitvā tvam evainaṃ punar utthāpayiṣyasi
astreṇa dayitenājau bhīṣma saṃbodhanena vai
- 16
एवं कुरुष्व कौरव्य प्रभाते रथम् आस्थितः
प्रसुप्तं वा मृतं वापि तुल्यं मन्यामहे वयम्
evaṃ kuruṣva kauravya prabhāte ratham āsthitaḥ
prasuptaṃ vā mṛtaṃ vāpi tulyaṃ manyāmahe vayam
- 17
न च रामेण मर्तव्यं कदाचिद् अपि पार्थिव
ततः समुत्पन्नम् इदं प्रस्वापं युज्यताम् इति
na ca rāmeṇa martavyaṃ kadācid api pārthiva
tataḥ samutpannam idaṃ prasvāpaṃ yujyatām iti
- 18
इत्युक्त्वान्तर्हिता राजन्सर्व एव द्विजोत्तमाः
अष्टौ सदृशरूपास्ते सर्वे भास्वरमूर्तयः
ityuktvāntarhitā rājansarva eva dvijottamāḥ
aṣṭau sadṛśarūpāste sarve bhāsvaramūrtayaḥ

