17 shlokas
- 1
वैशंपायन उवाच
एवं सनत्सुजातेन विदुरेण च धीमता
सार्धं कथयतो राज्ञः सा व्यतीयाय शर्वरी
vaiśaṃpāyana uvāca
evaṃ sanatsujātena vidureṇa ca dhīmatā
sārdhaṃ kathayato rājñaḥ sā vyatīyāya śarvarī
- 2
तस्यां रजन्यां व्युष्टायां राजानः सर्व एव ते
सभाम् आविविशुर्हृष्टाः सूतस्योपदिदृक्षया
tasyāṃ rajanyāṃ vyuṣṭāyāṃ rājānaḥ sarva eva te
sabhām āviviśurhṛṣṭāḥ sūtasyopadidṛkṣayā
- 3
शुश्रूषमाणाः पार्थानां वचो धर्मार्थसंहितम्
धृतराष्ट्रमुखाः सर्वे ययू राजसभां शुभाम्
śuśrūṣamāṇāḥ pārthānāṃ vaco dharmārthasaṃhitam
dhṛtarāṣṭramukhāḥ sarve yayū rājasabhāṃ śubhām
- 4
सुधावदातां विस्तीर्णां कनकाजिरभूषिताम्
चन्द्रप्रभां सुरुचिरां सिक्तां परमवारिणा
sudhāvadātāṃ vistīrṇāṃ kanakājirabhūṣitām
candraprabhāṃ surucirāṃ siktāṃ paramavāriṇā
- 5
रुचिरैर् आसनैः स्तीर्णां काञ्चनैर्दारवैर् अपि
अश्मसारमयैर्दान्तैः स्वास्तीर्णैः सोत्तरच्छदैः
rucirair āsanaiḥ stīrṇāṃ kāñcanairdāravair api
aśmasāramayairdāntaiḥ svāstīrṇaiḥ sottaracchadaiḥ
- 6
भीष्मो द्रोणः कृपः शल्यः कृतवर्मा जयद्रथः
अश्वत्थामा विकर्णश्च सोमदत्तश्च बाह्लिकः
bhīṣmo droṇaḥ kṛpaḥ śalyaḥ kṛtavarmā jayadrathaḥ
aśvatthāmā vikarṇaśca somadattaśca bāhlikaḥ
- 7
विदुरश्च महाप्राज्ञो युयुत्सुश्च महारथः
सर्वे च सहिताः शूराः पार्थिवा भरतर्षभ
धृतराष्ट्रं पुरस्कृत्य विविशुस्तां सभां शुभाम्
viduraśca mahāprājño yuyutsuśca mahārathaḥ
sarve ca sahitāḥ śūrāḥ pārthivā bharatarṣabha
dhṛtarāṣṭraṃ puraskṛtya viviśustāṃ sabhāṃ śubhām
- 8
दुःशासनश्चित्रसेनः शकुनिश्चापि सौबलः
दुर्मुखो दुःसहः कर्ण उलूको ऽथ विविंशतिः
duḥśāsanaścitrasenaḥ śakuniścāpi saubalaḥ
durmukho duḥsahaḥ karṇa ulūko 'tha viviṃśatiḥ
- 9
कुरुराजं पुरस्कृत्य दुर्योधनम् अमर्षणम्
विविशुस्तां सभां राजन्सुराः शक्रसदो यथा
kururājaṃ puraskṛtya duryodhanam amarṣaṇam
viviśustāṃ sabhāṃ rājansurāḥ śakrasado yathā
- 10
आविशद्भिस्तदा राजञ्शूरैः परिघबाहुभिः
शुशुभे सा सभा राजन्सिंहैर् इव गिरेर्गुहा
āviśadbhistadā rājañśūraiḥ parighabāhubhiḥ
śuśubhe sā sabhā rājansiṃhair iva girerguhā
- 11
ते प्रविश्य महेष्वासाः सभां समितिशोभनाः
आसनानि महार्हाणि भेजिरे सूर्यवर्चसः
te praviśya maheṣvāsāḥ sabhāṃ samitiśobhanāḥ
āsanāni mahārhāṇi bhejire sūryavarcasaḥ
- 12
आसनस्थेषु सर्वेषु तेषु राजसु भारत
द्वाःस्थो निवेदयामास सूतपुत्रम् उपस्थितम्
āsanastheṣu sarveṣu teṣu rājasu bhārata
dvāḥstho nivedayāmāsa sūtaputram upasthitam
- 13
अयं स रथ आयाति यो ऽयासीत्पाण्डवान्प्रति
दूतो नस्तूर्णम् आयातः सैन्धवैः साधुवाहिभिः
ayaṃ sa ratha āyāti yo 'yāsītpāṇḍavānprati
dūto nastūrṇam āyātaḥ saindhavaiḥ sādhuvāhibhiḥ
- 14
उपयाय तु स क्षिप्रं रथात्प्रस्कन्द्य कुण्डली
प्रविवेश सभां पूर्णां महीपालैर्महात्मभिः
upayāya tu sa kṣipraṃ rathātpraskandya kuṇḍalī
praviveśa sabhāṃ pūrṇāṃ mahīpālairmahātmabhiḥ
- 15
संजय उवाच
प्राप्तो ऽस्मि पाण्डवान्गत्वा तद्विजानीत कौरवाः
यथावयः कुरून्सर्वान्प्रतिनन्दन्ति पाण्डवाः
saṃjaya uvāca
prāpto 'smi pāṇḍavāngatvā tadvijānīta kauravāḥ
yathāvayaḥ kurūnsarvānpratinandanti pāṇḍavāḥ
- 16
अभिवादयन्ति वृद्धांश्च वयस्यांश्च वयस्यवत्
यूनश्चाभ्यवदन्पार्थाः प्रतिपूज्य यथावयः
abhivādayanti vṛddhāṃśca vayasyāṃśca vayasyavat
yūnaścābhyavadanpārthāḥ pratipūjya yathāvayaḥ
- 17
यथाहं धृतराष्ट्रेण शिष्टः पूर्वम् इतो गतः
अब्रुवं पाण्डवान्गत्वा तन्निबोधत पार्थिवाः
yathāhaṃ dhṛtarāṣṭreṇa śiṣṭaḥ pūrvam ito gataḥ
abruvaṃ pāṇḍavāngatvā tannibodhata pārthivāḥ

