16 shlokas
- 1
धृतराष्ट्र उवाच
यथैव पाण्डवाः सर्वे पराक्रान्ता जिगीषवः
तथैवाभिसरास्तेषां त्यक्तात्मानो जये धृताः
dhṛtarāṣṭra uvāca
yathaiva pāṇḍavāḥ sarve parākrāntā jigīṣavaḥ
tathaivābhisarāsteṣāṃ tyaktātmāno jaye dhṛtāḥ
- 2
त्वम् एव हि पराक्रान्तान् आचक्षीथाः परान्मम
पाञ्चालान्केकयान्मत्स्यान्मागधान्वत्सभूमिपान्
tvam eva hi parākrāntān ācakṣīthāḥ parānmama
pāñcālānkekayānmatsyānmāgadhānvatsabhūmipān
- 3
यश्च सेन्द्रान् इमांल्लोकान् इच्छन्कुर्याद्वशे बली
स श्रेष्ठो जगतः कृष्णः पाण्डवानां जये धृतः
yaśca sendrān imāṃllokān icchankuryādvaśe balī
sa śreṣṭho jagataḥ kṛṣṇaḥ pāṇḍavānāṃ jaye dhṛtaḥ
- 4
समस्ताम् अर्जुनाद्विद्यां सात्यकिः क्षिप्रम् आप्तवान्
शैनेयः समरे स्थाता बीजवत्प्रवपञ्शरान्
samastām arjunādvidyāṃ sātyakiḥ kṣipram āptavān
śaineyaḥ samare sthātā bījavatpravapañśarān
- 5
धृष्टद्युम्नश्च पाञ्चाल्यः क्रूरकर्मा महारथः
मामकेषु रणं कर्ता बलेषु परमास्त्रवित्
dhṛṣṭadyumnaśca pāñcālyaḥ krūrakarmā mahārathaḥ
māmakeṣu raṇaṃ kartā baleṣu paramāstravit
- 6
युधिष्ठिरस्य च क्रोधाद् अर्जुनस्य च विक्रमात्
यमाभ्यां भीमसेनाच्च भयं मे तात जायते
yudhiṣṭhirasya ca krodhād arjunasya ca vikramāt
yamābhyāṃ bhīmasenācca bhayaṃ me tāta jāyate
- 7
अमानुषं मनुष्येन्द्रैर्जालं विततम् अन्तरा
मम सेनां हनिष्यन्ति ततः क्रोशामि संजय
amānuṣaṃ manuṣyendrairjālaṃ vitatam antarā
mama senāṃ haniṣyanti tataḥ krośāmi saṃjaya
- 8
दर्शनीयो मनस्वी च लक्ष्मीवान्ब्रह्मवर्चसी
मेधावी सुकृतप्रज्ञो धर्मात्मा पाण्डुनन्दनः
darśanīyo manasvī ca lakṣmīvānbrahmavarcasī
medhāvī sukṛtaprajño dharmātmā pāṇḍunandanaḥ
- 9
मित्रामात्यैः सुसम्पन्नः सम्पन्नो योज्ययोजकैः
भ्रातृभिः श्वशुरैः पुत्रैर् उपपन्नो महारथैः
mitrāmātyaiḥ susampannaḥ sampanno yojyayojakaiḥ
bhrātṛbhiḥ śvaśuraiḥ putrair upapanno mahārathaiḥ
- 10
धृत्या च पुरुषव्याघ्रो नैभृत्येन च पाण्डवः
अनृशंसो वदान्यश्च ह्रीमान्सत्यपराक्रमः
dhṛtyā ca puruṣavyāghro naibhṛtyena ca pāṇḍavaḥ
anṛśaṃso vadānyaśca hrīmānsatyaparākramaḥ
- 11
बहुश्रुतः कृतात्मा च वृद्धसेवी जितेन्द्रियः
तं सर्वगुणसम्पन्नं समिद्धम् इव पावकम्
bahuśrutaḥ kṛtātmā ca vṛddhasevī jitendriyaḥ
taṃ sarvaguṇasampannaṃ samiddham iva pāvakam
- 12
तपन्तम् इव को मन्दः पतिष्यति पतंगवत्
पाण्डवाग्निम् अनावार्यं मुमूर्षुर्मूढचेतनः
tapantam iva ko mandaḥ patiṣyati pataṃgavat
pāṇḍavāgnim anāvāryaṃ mumūrṣurmūḍhacetanaḥ
- 13
तनुर् उच्चः शिखी राजा शुद्धजाम्बूनदप्रभः
मन्दानां मम पुत्राणां युद्धेनान्तं करिष्यति
tanur uccaḥ śikhī rājā śuddhajāmbūnadaprabhaḥ
mandānāṃ mama putrāṇāṃ yuddhenāntaṃ kariṣyati
- 14
तैर् अयुद्धं साधु मन्ये कुरवस्तन्निबोधत
युद्धे विनाशः कृत्स्नस्य कुलस्य भविता ध्रुवम्
tair ayuddhaṃ sādhu manye kuravastannibodhata
yuddhe vināśaḥ kṛtsnasya kulasya bhavitā dhruvam
- 15
एषा मे परमा शान्तिर्यया शाम्यति मे मनः
यदि त्वयुद्धम् इष्टं वो वयं शान्त्यै यतामहे
eṣā me paramā śāntiryayā śāmyati me manaḥ
yadi tvayuddham iṣṭaṃ vo vayaṃ śāntyai yatāmahe
- 16
न तु नः शिक्षमाणानाम् उपेक्षेत युधिष्ठिरः
जुगुप्सति ह्यधर्मेण माम् एवोद्दिश्य कारणम्
na tu naḥ śikṣamāṇānām upekṣeta yudhiṣṭhiraḥ
jugupsati hyadharmeṇa mām evoddiśya kāraṇam

