22 shlokas
- 1
गालव उवाच
गरुत्मन्भुजगेन्द्रारे सुपर्ण विनतात्मज
नय मां तार्क्ष्य पूर्वेण यत्र धर्मस्य चक्षुषी
gālava uvāca
garutmanbhujagendrāre suparṇa vinatātmaja
naya māṃ tārkṣya pūrveṇa yatra dharmasya cakṣuṣī
- 2
पूर्वम् एतां दिशं गच्छ या पूर्वं परिकीर्तिता
दैवतानां हि सांनिध्यम् अत्र कीर्तितवान् असि
pūrvam etāṃ diśaṃ gaccha yā pūrvaṃ parikīrtitā
daivatānāṃ hi sāṃnidhyam atra kīrtitavān asi
- 3
अत्र सत्यं च धर्मश्च त्वया सम्यक्प्रकीर्तितः
इच्छेयं तु समागन्तुं समस्तैर्दैवतैर् अहम्
भूयश्च तान्सुरान्द्रष्टुम् इच्छेयम् अरुणानुज
atra satyaṃ ca dharmaśca tvayā samyakprakīrtitaḥ
iccheyaṃ tu samāgantuṃ samastairdaivatair aham
bhūyaśca tānsurāndraṣṭum iccheyam aruṇānuja
- 4
नारद उवाच
तम् आह विनतासूनुर् आरोहस्वेति वै द्विजम्
आरुरोहाथ स मुनिर्गरुडं गालवस्तदा
nārada uvāca
tam āha vinatāsūnur ārohasveti vai dvijam
ārurohātha sa munirgaruḍaṃ gālavastadā
- 5
गालव उवाच
क्रममाणस्य ते रूपं दृश्यते पन्नगाशन
भास्करस्येव पूर्वाह्णे सहस्रांशोर्विवस्वतः
gālava uvāca
kramamāṇasya te rūpaṃ dṛśyate pannagāśana
bhāskarasyeva pūrvāhṇe sahasrāṃśorvivasvataḥ
- 6
पक्षवातप्रणुन्नानां वृक्षाणाम् अनुगामिनाम्
प्रस्थितानाम् इव समं पश्यामीह गतिं खग
pakṣavātapraṇunnānāṃ vṛkṣāṇām anugāminām
prasthitānām iva samaṃ paśyāmīha gatiṃ khaga
- 7
ससागरवनाम् उर्वीं सशैलवनकाननाम्
आकर्षन्न् इव चाभासि पक्षवातेन खेचर
sasāgaravanām urvīṃ saśailavanakānanām
ākarṣann iva cābhāsi pakṣavātena khecara
- 8
समीननागनक्रं च खम् इवारोप्यते जलम्
वायुना चैव महता पक्षवातेन चानिशम्
samīnanāganakraṃ ca kham ivāropyate jalam
vāyunā caiva mahatā pakṣavātena cāniśam
- 9
तुल्यरूपाननान्मत्स्यांस्तिमिमत्स्यांस्तिमिंगिलान्
नागांश्च नरवक्त्रांश्च पश्याम्युन्मथितान् इव
tulyarūpānanānmatsyāṃstimimatsyāṃstimiṃgilān
nāgāṃśca naravaktrāṃśca paśyāmyunmathitān iva
- 10
महार्णवस्य च रवैः श्रोत्रे मे बधिरीकृते
न शृणोमि न पश्यामि नात्मनो वेद्मि कारणम्
mahārṇavasya ca ravaiḥ śrotre me badhirīkṛte
na śṛṇomi na paśyāmi nātmano vedmi kāraṇam
- 11
शनैः साधु भवान्यातु ब्रह्महत्याम् अनुस्मरन्
न दृश्यते रविस्तात न दिशो न च खं खग
śanaiḥ sādhu bhavānyātu brahmahatyām anusmaran
na dṛśyate ravistāta na diśo na ca khaṃ khaga
- 12
तम एव तु पश्यामि शरीरं ते न लक्षये
मणीव जात्यौ पश्यामि चक्षुषी ते ऽहम् अण्डज
tama eva tu paśyāmi śarīraṃ te na lakṣaye
maṇīva jātyau paśyāmi cakṣuṣī te 'ham aṇḍaja
- 13
शरीरे तु न पश्यामि तव चैवात्मनश्च ह
पदे पदे तु पश्यामि सलिलाद् अग्निम् उत्थितम्
śarīre tu na paśyāmi tava caivātmanaśca ha
pade pade tu paśyāmi salilād agnim utthitam
- 14
स मे निर्वाप्य सहसा चक्षुषी शाम्यते पुनः
तन्निवर्त महान्कालो गच्छतो विनतात्मज
sa me nirvāpya sahasā cakṣuṣī śāmyate punaḥ
tannivarta mahānkālo gacchato vinatātmaja
- 15
न मे प्रयोजनं किंचिद्गमने पन्नगाशन
संनिवर्त महावेग न वेगं विषहामि ते
na me prayojanaṃ kiṃcidgamane pannagāśana
saṃnivarta mahāvega na vegaṃ viṣahāmi te
- 16
गुरवे संश्रुतानीह शतान्यष्टौ हि वाजिनाम्
एकतः श्यामकर्णानां शुभ्राणां चन्द्रवर्चसाम्
gurave saṃśrutānīha śatānyaṣṭau hi vājinām
ekataḥ śyāmakarṇānāṃ śubhrāṇāṃ candravarcasām
- 17
तेषां चैवापवर्गाय मार्गं पश्यामि नाण्डज
ततो ऽयं जीवितत्यागे दृष्टो मार्गो मयात्मनः
teṣāṃ caivāpavargāya mārgaṃ paśyāmi nāṇḍaja
tato 'yaṃ jīvitatyāge dṛṣṭo mārgo mayātmanaḥ
- 18
नैव मे ऽस्ति धनं किंचिन्न धनेनान्वितः सुहृत्
न चार्थेनापि महता शक्यम् एतद्व्यपोहितुम्
naiva me 'sti dhanaṃ kiṃcinna dhanenānvitaḥ suhṛt
na cārthenāpi mahatā śakyam etadvyapohitum
- 19
नारद उवाच
एवं बहु च दीनं च ब्रुवाणं गालवं तदा
प्रत्युवाच व्रजन्न् एव प्रहसन्विनतात्मजः
nārada uvāca
evaṃ bahu ca dīnaṃ ca bruvāṇaṃ gālavaṃ tadā
pratyuvāca vrajann eva prahasanvinatātmajaḥ
- 20
नातिप्रज्ञो ऽसि विप्रर्षे यो ऽऽत्मानं त्यक्तुम् इच्छसि
न चापि कृत्रिमः कालः कालो हि परमेश्वरः
nātiprajño 'si viprarṣe yo ''tmānaṃ tyaktum icchasi
na cāpi kṛtrimaḥ kālaḥ kālo hi parameśvaraḥ
- 21
किम् अहं पूर्वम् एवेह भवता नाभिचोदितः
उपायो ऽत्र महान् अस्ति येनैतद् उपपद्यते
kim ahaṃ pūrvam eveha bhavatā nābhicoditaḥ
upāyo 'tra mahān asti yenaitad upapadyate
- 22
तद् एष ऋषभो नाम पर्वतः सागरोरसि
अत्र विश्रम्य भुक्त्वा च निवर्तिष्याव गालव
tad eṣa ṛṣabho nāma parvataḥ sāgarorasi
atra viśramya bhuktvā ca nivartiṣyāva gālava

