13 shlokas
- 1
संजय उवाच
उलूकस्त्वर्जुनं भूयो यथोक्तं वाक्यम् अब्रवीत्
आशीविषम् इव क्रुद्धं तुदन्वाक्यशलाकया
saṃjaya uvāca
ulūkastvarjunaṃ bhūyo yathoktaṃ vākyam abravīt
āśīviṣam iva kruddhaṃ tudanvākyaśalākayā
- 2
तस्य तद्वचनं श्रुत्वा रुषिताः पाण्डवा भृशम्
प्राग् एव भृशसंक्रुद्धाः कैतव्येन प्रधर्षिताः
tasya tadvacanaṃ śrutvā ruṣitāḥ pāṇḍavā bhṛśam
prāg eva bhṛśasaṃkruddhāḥ kaitavyena pradharṣitāḥ
- 3
नासनेष्व् अवतिष्ठन्त बाहूंश्चैव विचिक्षिपुः
आशीविषा इव क्रुद्धा वीक्षांचक्रुः परस्परम्
nāsaneṣv avatiṣṭhanta bāhūṃścaiva vicikṣipuḥ
āśīviṣā iva kruddhā vīkṣāṃcakruḥ parasparam
- 4
अवाक्शिरा भीमसेनः समुदैक्षत केशवम्
नेत्राभ्यां लोहितान्ताभ्याम् आशीविष इव श्वसन्
avākśirā bhīmasenaḥ samudaikṣata keśavam
netrābhyāṃ lohitāntābhyām āśīviṣa iva śvasan
- 5
आर्तं वातात्मजं दृष्ट्वा क्रोधेनाभिहतं भृशम्
उत्स्मयन्न् इव दाशार्हः कैतव्यं प्रत्यभाषत
ārtaṃ vātātmajaṃ dṛṣṭvā krodhenābhihataṃ bhṛśam
utsmayann iva dāśārhaḥ kaitavyaṃ pratyabhāṣata
- 6
प्रयाहि शीघ्रं कैतव्य ब्रूयाश्चैव सुयोधनम्
श्रुतं वाक्यं गृहीतो ऽर्थो मतं यत्ते तथास्तु तत्
prayāhi śīghraṃ kaitavya brūyāścaiva suyodhanam
śrutaṃ vākyaṃ gṛhīto 'rtho mataṃ yatte tathāstu tat
- 7
मद्वचश्चापि भूयस्ते वक्तव्यः स सुयोधनः
श्व इदानीं प्रदृश्येथाः पुरुषो भव दुर्मते
madvacaścāpi bhūyaste vaktavyaḥ sa suyodhanaḥ
śva idānīṃ pradṛśyethāḥ puruṣo bhava durmate
- 8
मन्यसे यच्च मूढ त्वं न योत्स्यति जनार्दनः
सारथ्येन वृतः पार्थैर् इति त्वं न बिभेषि च
manyase yacca mūḍha tvaṃ na yotsyati janārdanaḥ
sārathyena vṛtaḥ pārthair iti tvaṃ na bibheṣi ca
- 9
जघन्यकालम् अप्येतद्भवेद्यत्सर्वपार्थिवान्
निर्दहेयम् अहं क्रोधात्तृणानीव हुताशनः
jaghanyakālam apyetadbhavedyatsarvapārthivān
nirdaheyam ahaṃ krodhāttṛṇānīva hutāśanaḥ
- 10
युधिष्ठिरनियोगात्तु फल्गुनस्य महात्मनः
करिष्ये युध्यमानस्य सारथ्यं विदितात्मनः
yudhiṣṭhiraniyogāttu phalgunasya mahātmanaḥ
kariṣye yudhyamānasya sārathyaṃ viditātmanaḥ
- 11
यद्युत्पतसि लोकांस्त्रीन्यद्याविशसि भूतलम्
तत्र तत्रार्जुनरथं प्रभाते द्रक्ष्यसे ऽग्रतः
yadyutpatasi lokāṃstrīnyadyāviśasi bhūtalam
tatra tatrārjunarathaṃ prabhāte drakṣyase 'grataḥ
- 12
यच्चापि भीमसेनस्य मन्यसे मोघगर्जितम्
दुःशासनस्य रुधिरं पीतम् इत्यवधार्यताम्
yaccāpi bhīmasenasya manyase moghagarjitam
duḥśāsanasya rudhiraṃ pītam ityavadhāryatām
- 13
न त्वां समीक्षते पार्थो नापि राजा युधिष्ठिरः
न भीमसेनो न यमौ प्रतिकूलप्रभाषिणम्
na tvāṃ samīkṣate pārtho nāpi rājā yudhiṣṭhiraḥ
na bhīmaseno na yamau pratikūlaprabhāṣiṇam

