9 shlokas
- 1
सहदेव उवाच
यद् एतत्कथितं राज्ञा धर्म एष सनातनः
यथा तु युद्धम् एव स्यात्तथा कार्यम् अरिंदम
sahadeva uvāca
yad etatkathitaṃ rājñā dharma eṣa sanātanaḥ
yathā tu yuddham eva syāttathā kāryam ariṃdama
- 2
यदि प्रशमम् इच्छेयुः कुरवः पाण्डवैः सह
तथापि युद्धं दाशार्ह योजयेथाः सहैव तैः
yadi praśamam iccheyuḥ kuravaḥ pāṇḍavaiḥ saha
tathāpi yuddhaṃ dāśārha yojayethāḥ sahaiva taiḥ
- 3
कथं नु दृष्ट्वा पाञ्चालीं तथा क्लिष्टां सभागताम्
अवधेन प्रशाम्येत मम मन्युः सुयोधने
kathaṃ nu dṛṣṭvā pāñcālīṃ tathā kliṣṭāṃ sabhāgatām
avadhena praśāmyeta mama manyuḥ suyodhane
- 4
यदि भीमार्जुनौ कृष्ण धर्मराजश्च धार्मिकः
धर्मम् उत्सृज्य तेनाहं योद्धुम् इच्छामि संयुगे
yadi bhīmārjunau kṛṣṇa dharmarājaśca dhārmikaḥ
dharmam utsṛjya tenāhaṃ yoddhum icchāmi saṃyuge
- 5
सात्यकिर् उवाच
सत्यम् आह महाबाहो सहदेवो महामतिः
दुर्योधनवधे शान्तिस्तस्य कोपस्य मे भवेत्
sātyakir uvāca
satyam āha mahābāho sahadevo mahāmatiḥ
duryodhanavadhe śāntistasya kopasya me bhavet
- 6
जानासि हि यथा दृष्ट्वा चीराजिनधरान्वने
तवापि मन्युर् उद्भूतो दुःखितान्प्रेक्ष्य पाण्डवान्
jānāsi hi yathā dṛṣṭvā cīrājinadharānvane
tavāpi manyur udbhūto duḥkhitānprekṣya pāṇḍavān
- 7
तस्मान्माद्रीसुतः शूरो यद् आह पुरुषर्षभः
वचनं सर्वयोधानां तन्मतं पुरुषोत्तम
tasmānmādrīsutaḥ śūro yad āha puruṣarṣabhaḥ
vacanaṃ sarvayodhānāṃ tanmataṃ puruṣottama
- 8
वैशंपायन उवाच
एवं वदति वाक्यं तु युयुधाने महामतौ
सुभीमः सिंहनादो ऽभूद्योधानां तत्र सर्वशः
vaiśaṃpāyana uvāca
evaṃ vadati vākyaṃ tu yuyudhāne mahāmatau
subhīmaḥ siṃhanādo 'bhūdyodhānāṃ tatra sarvaśaḥ
- 9
सर्वे हि सर्वतो वीरास्तद्वचः प्रत्यपूजयन्
साधु साध्विति शैनेयं हर्षयन्तो युयुत्सवः
sarve hi sarvato vīrāstadvacaḥ pratyapūjayan
sādhu sādhviti śaineyaṃ harṣayanto yuyutsavaḥ

