21 shlokas
- 1
नारद उवाच
तथैव सा श्रियं त्यक्त्वा कन्या भूत्वा यशस्विनी
माधवी गालवं विप्रम् अन्वयात्सत्यसंगरा
nārada uvāca
tathaiva sā śriyaṃ tyaktvā kanyā bhūtvā yaśasvinī
mādhavī gālavaṃ vipram anvayātsatyasaṃgarā
- 2
गालवो विमृशन्न् एव स्वकार्यगतमानसः
जगाम भोजनगरं द्रष्टुम् औशीनरं नृपम्
gālavo vimṛśann eva svakāryagatamānasaḥ
jagāma bhojanagaraṃ draṣṭum auśīnaraṃ nṛpam
- 3
तम् उवाचाथ गत्वा स नृपतिं सत्यविक्रमम्
इयं कन्या सुतौ द्वौ ते जनयिष्यति पार्थिवौ
tam uvācātha gatvā sa nṛpatiṃ satyavikramam
iyaṃ kanyā sutau dvau te janayiṣyati pārthivau
- 4
अस्यां भवान् अवाप्तार्थो भविता प्रेत्य चेह च
सोमार्कप्रतिसंकाशौ जनयित्वा सुतौ नृप
asyāṃ bhavān avāptārtho bhavitā pretya ceha ca
somārkapratisaṃkāśau janayitvā sutau nṛpa
- 5
शुल्कं तु सर्वधर्मज्ञ हयानां चन्द्रवर्चसाम्
एकतः श्यामकर्णानां देयं मह्यं चतुःशतम्
śulkaṃ tu sarvadharmajña hayānāṃ candravarcasām
ekataḥ śyāmakarṇānāṃ deyaṃ mahyaṃ catuḥśatam
- 6
गुर्वर्थो ऽयं समारम्भो न हयैः कृत्यम् अस्ति मे
यदि शक्यं महाराज क्रियतां मा विचार्यताम्
gurvartho 'yaṃ samārambho na hayaiḥ kṛtyam asti me
yadi śakyaṃ mahārāja kriyatāṃ mā vicāryatām
- 7
अनपत्यो ऽसि राजर्षे पुत्रौ जनय पार्थिव
पितॄन्पुत्रप्लवेन त्वम् आत्मानं चैव तारय
anapatyo 'si rājarṣe putrau janaya pārthiva
pitṝnputraplavena tvam ātmānaṃ caiva tāraya
- 8
न पुत्रफलभोक्ता हि राजर्षे पात्यते दिवः
न याति नरकं घोरं यत्र गच्छन्त्यनात्मजाः
na putraphalabhoktā hi rājarṣe pātyate divaḥ
na yāti narakaṃ ghoraṃ yatra gacchantyanātmajāḥ
- 9
एतच्चान्यच्च विविधं श्रुत्वा गालवभाषितम्
उशीनरः प्रतिवचो ददौ तस्य नराधिपः
etaccānyacca vividhaṃ śrutvā gālavabhāṣitam
uśīnaraḥ prativaco dadau tasya narādhipaḥ
- 10
श्रुतवान् अस्मि ते वाक्यं यथा वदसि गालव
विधिस्तु बलवान्ब्रह्मन्प्रवणं हि मनो मम
śrutavān asmi te vākyaṃ yathā vadasi gālava
vidhistu balavānbrahmanpravaṇaṃ hi mano mama
- 11
शते द्वे तु ममाश्वानाम् ईदृशानां द्विजोत्तम
इतरेषां सहस्राणि सुबहूनि चरन्ति मे
śate dve tu mamāśvānām īdṛśānāṃ dvijottama
itareṣāṃ sahasrāṇi subahūni caranti me
- 12
अहम् अप्येकम् एवास्यां जनयिष्यामि गालव
पुत्रं द्विज गतं मार्गं गमिष्यामि परैर् अहम्
aham apyekam evāsyāṃ janayiṣyāmi gālava
putraṃ dvija gataṃ mārgaṃ gamiṣyāmi parair aham
- 13
मूल्येनापि समं कुर्यां तवाहं द्विजसत्तम
पौरजानपदार्थं तु ममार्थो नात्मभोगतः
mūlyenāpi samaṃ kuryāṃ tavāhaṃ dvijasattama
paurajānapadārthaṃ tu mamārtho nātmabhogataḥ
- 14
कामतो हि धनं राजा पारक्यं यः प्रयच्छति
न स धर्मेण धर्मात्मन्युज्यते यशसा न च
kāmato hi dhanaṃ rājā pārakyaṃ yaḥ prayacchati
na sa dharmeṇa dharmātmanyujyate yaśasā na ca
- 15
सो ऽहं प्रतिग्रहीष्यामि ददात्वेतां भवान्मम
कुमारीं देवगर्भाभाम् एकपुत्रभवाय मे
so 'haṃ pratigrahīṣyāmi dadātvetāṃ bhavānmama
kumārīṃ devagarbhābhām ekaputrabhavāya me
- 16
तथा तु बहुकल्याणम् उक्तवन्तं नराधिपम्
उशीनरं द्विजश्रेष्ठो गालवः प्रत्यपूजयत्
tathā tu bahukalyāṇam uktavantaṃ narādhipam
uśīnaraṃ dvijaśreṣṭho gālavaḥ pratyapūjayat
- 17
उशीनरं प्रतिग्राह्य गालवः प्रययौ वनम्
रेमे स तां समासाद्य कृतपुण्य इव श्रियम्
uśīnaraṃ pratigrāhya gālavaḥ prayayau vanam
reme sa tāṃ samāsādya kṛtapuṇya iva śriyam
- 18
कन्दरेषु च शैलानां नदीनां निर्झरेषु च
उद्यानेषु विचित्रेषु वनेषूपवनेषु च
kandareṣu ca śailānāṃ nadīnāṃ nirjhareṣu ca
udyāneṣu vicitreṣu vaneṣūpavaneṣu ca
- 19
हर्म्येषु रमणीयेषु प्रासादशिखरेषु च
वातायनविमानेषु तथा गर्भगृहेषु च
harmyeṣu ramaṇīyeṣu prāsādaśikhareṣu ca
vātāyanavimāneṣu tathā garbhagṛheṣu ca
- 20
ततो ऽस्य समये जज्ञे पुत्रो बालरविप्रभः
शिबिर्नाम्नाभिविख्यातो यः स पार्थिवसत्तमः
tato 'sya samaye jajñe putro bālaraviprabhaḥ
śibirnāmnābhivikhyāto yaḥ sa pārthivasattamaḥ
- 21
उपस्थाय स तं विप्रो गालवः प्रतिगृह्य च
कन्यां प्रयातस्तां राजन्दृष्टवान्विनतात्मजम्
upasthāya sa taṃ vipro gālavaḥ pratigṛhya ca
kanyāṃ prayātastāṃ rājandṛṣṭavānvinatātmajam

