14 shlokas
- 1
भीष्म उवाच
द्रौपदेया महाराज सर्वे पञ्च महारथाः
वैराटिर् उत्तरश्चैव रथो मम महान्मतः
bhīṣma uvāca
draupadeyā mahārāja sarve pañca mahārathāḥ
vairāṭir uttaraścaiva ratho mama mahānmataḥ
- 2
अभिमन्युर्महाराज रथयूथपयूथपः
समः पार्थेन समरे वासुदेवेन वा भवेत्
abhimanyurmahārāja rathayūthapayūthapaḥ
samaḥ pārthena samare vāsudevena vā bhavet
- 3
लघ्वस्त्रश्चित्रयोधी च मनस्वी दृढविक्रमः
संस्मरन्वै परिक्लेशं स्वपितुर्विक्रमिष्यति
laghvastraścitrayodhī ca manasvī dṛḍhavikramaḥ
saṃsmaranvai parikleśaṃ svapiturvikramiṣyati
- 4
सात्यकिर्माधवः शूरो रथयूथपयूथपः
एष वृष्णिप्रवीराणाम् अमर्षी जितसाध्वसः
sātyakirmādhavaḥ śūro rathayūthapayūthapaḥ
eṣa vṛṣṇipravīrāṇām amarṣī jitasādhvasaḥ
- 5
उत्तमौजास्तथा राजन्रथो मम महान्मतः
युधामन्युश्च विक्रान्तो रथोदारो नरर्षभः
uttamaujāstathā rājanratho mama mahānmataḥ
yudhāmanyuśca vikrānto rathodāro nararṣabhaḥ
- 6
एतेषां बहुसाहस्रा रथा नागा हयास्तथा
योत्स्यन्ते ते तनुं त्यक्त्वा कुन्तीपुत्रप्रियेप्सया
eteṣāṃ bahusāhasrā rathā nāgā hayāstathā
yotsyante te tanuṃ tyaktvā kuntīputrapriyepsayā
- 7
पाण्डवैः सह राजेन्द्र तव सेनासु भारत
अग्निमारुतवद्राजन्न् आह्वयन्तः परस्परम्
pāṇḍavaiḥ saha rājendra tava senāsu bhārata
agnimārutavadrājann āhvayantaḥ parasparam
- 8
अजेयौ समरे वृद्धौ विराटद्रुपदावुभौ
महारथौ महावीर्यौ मतौ मे पुरुषर्षभौ
ajeyau samare vṛddhau virāṭadrupadāvubhau
mahārathau mahāvīryau matau me puruṣarṣabhau
- 9
वयोवृद्धावपि तु तौ क्षत्रधर्मपरायणौ
यतिष्येते परं शक्त्या स्थितौ वीरगते पथि
vayovṛddhāvapi tu tau kṣatradharmaparāyaṇau
yatiṣyete paraṃ śaktyā sthitau vīragate pathi
- 10
संबन्धकेन राजेन्द्र तौ तु वीर्यबलान्वयात्
आर्यवृत्तौ महेष्वासौ स्नेहपाशसितावुभौ
saṃbandhakena rājendra tau tu vīryabalānvayāt
āryavṛttau maheṣvāsau snehapāśasitāvubhau
- 11
कारणं प्राप्य तु नराः सर्व एव महाभुजाः
शूरा वा कातरा वापि भवन्ति नरपुंगव
kāraṇaṃ prāpya tu narāḥ sarva eva mahābhujāḥ
śūrā vā kātarā vāpi bhavanti narapuṃgava
- 12
एकायनगतावेतौ पार्थेन दृढभक्तिकौ
त्यक्त्वा प्राणान्परं शक्त्या घटितारौ नराधिप
ekāyanagatāvetau pārthena dṛḍhabhaktikau
tyaktvā prāṇānparaṃ śaktyā ghaṭitārau narādhipa
- 13
पृथग् अक्षौहिणीभ्यां तावुभौ संयति दारुणौ
संबन्धिभावं रक्षन्तौ महत्कर्म करिष्यतः
pṛthag akṣauhiṇībhyāṃ tāvubhau saṃyati dāruṇau
saṃbandhibhāvaṃ rakṣantau mahatkarma kariṣyataḥ
- 14
लोकवीरौ महेष्वासौ त्यक्तात्मानौ च भारत
प्रत्ययं परिरक्षन्तौ महत्कर्म करिष्यतः
lokavīrau maheṣvāsau tyaktātmānau ca bhārata
pratyayaṃ parirakṣantau mahatkarma kariṣyataḥ

