21 shlokas
- 1
नारद उवाच
एवम् उक्तः सुपर्णेन तथ्यं वचनम् उत्तमम्
विमृश्यावहितो राजा निश्चित्य च पुनः पुनः
nārada uvāca
evam uktaḥ suparṇena tathyaṃ vacanam uttamam
vimṛśyāvahito rājā niścitya ca punaḥ punaḥ
- 2
यष्टा क्रतुसहस्राणां दाता दानपतिः प्रभुः
ययातिर्वत्सकाशीश इदं वचनम् अब्रवीत्
yaṣṭā kratusahasrāṇāṃ dātā dānapatiḥ prabhuḥ
yayātirvatsakāśīśa idaṃ vacanam abravīt
- 3
दृष्ट्वा प्रियसखं तार्क्ष्यं गालवं च द्विजर्षभम्
निदर्शनं च तपसो भिक्षां श्लाघ्यां च कीर्तिताम्
dṛṣṭvā priyasakhaṃ tārkṣyaṃ gālavaṃ ca dvijarṣabham
nidarśanaṃ ca tapaso bhikṣāṃ ślāghyāṃ ca kīrtitām
- 4
अतीत्य च नृपान् अन्यान् आदित्यकुलसंभवान्
मत्सकाशम् अनुप्राप्तावेतौ बुद्धिम् अवेक्ष्य च
atītya ca nṛpān anyān ādityakulasaṃbhavān
matsakāśam anuprāptāvetau buddhim avekṣya ca
- 5
अद्य मे सफलं जन्म तारितं चाद्य मे कुलम्
अद्यायं तारितो देशो मम तार्क्ष्य त्वयानघ
adya me saphalaṃ janma tāritaṃ cādya me kulam
adyāyaṃ tārito deśo mama tārkṣya tvayānagha
- 6
वक्तुम् इच्छामि तु सखे यथा जानासि मां पुरा
न तथा वित्तवान् अस्मि क्षीणं वित्तं हि मे सखे
vaktum icchāmi tu sakhe yathā jānāsi māṃ purā
na tathā vittavān asmi kṣīṇaṃ vittaṃ hi me sakhe
- 7
न च शक्तो ऽस्मि ते कर्तुं मोघम् आगमनं खग
न चाशाम् अस्य विप्रर्षेर्वितथां कर्तुम् उत्सहे
na ca śakto 'smi te kartuṃ mogham āgamanaṃ khaga
na cāśām asya viprarṣervitathāṃ kartum utsahe
- 8
तत्तु दास्यामि यत्कार्यम् इदं संपादयिष्यति
अभिगम्य हताशो हि निवृत्तो दहते कुलम्
tattu dāsyāmi yatkāryam idaṃ saṃpādayiṣyati
abhigamya hatāśo hi nivṛtto dahate kulam
- 9
नातः परं वैनतेय किंचित्पापिष्ठम् उच्यते
यथाशानाशनं लोके देहि नास्तीति वा वचः
nātaḥ paraṃ vainateya kiṃcitpāpiṣṭham ucyate
yathāśānāśanaṃ loke dehi nāstīti vā vacaḥ
- 10
हताशो ह्यकृतार्थः सन्हतः संभावितो नरः
हिनस्ति तस्य पुत्रांश्च पौत्रांश्चाकुर्वतो ऽर्थिनाम्
hatāśo hyakṛtārthaḥ sanhataḥ saṃbhāvito naraḥ
hinasti tasya putrāṃśca pautrāṃścākurvato 'rthinām
- 11
तस्माच्चतुर्णां वंशानां स्थापयित्री सुता मम
इयं सुरसुतप्रख्या सर्वधर्मोपचायिनी
tasmāccaturṇāṃ vaṃśānāṃ sthāpayitrī sutā mama
iyaṃ surasutaprakhyā sarvadharmopacāyinī
- 12
सदा देवमनुष्याणाम् असुराणां च गालव
काङ्क्षिता रूपतो बाला सुता मे प्रतिगृह्यताम्
sadā devamanuṣyāṇām asurāṇāṃ ca gālava
kāṅkṣitā rūpato bālā sutā me pratigṛhyatām
- 13
अस्याः शुल्कं प्रदास्यन्ति नृपा राज्यम् अपि ध्रुवम्
किं पुनः श्यामकर्णानां हयानां द्वे चतुःशते
asyāḥ śulkaṃ pradāsyanti nṛpā rājyam api dhruvam
kiṃ punaḥ śyāmakarṇānāṃ hayānāṃ dve catuḥśate
- 14
स भवान्प्रतिगृह्णातु ममेमां माधवीं सुताम्
अहं दौहित्रवान्स्यां वै वर एष मम प्रभो
sa bhavānpratigṛhṇātu mamemāṃ mādhavīṃ sutām
ahaṃ dauhitravānsyāṃ vai vara eṣa mama prabho
- 15
प्रतिगृह्य च तां कन्यां गालवः सह पक्षिणा
पुनर्द्रक्ष्याव इत्युक्त्वा प्रतस्थे सह कन्यया
pratigṛhya ca tāṃ kanyāṃ gālavaḥ saha pakṣiṇā
punardrakṣyāva ityuktvā pratasthe saha kanyayā
- 16
उपलब्धम् इदं द्वारम् अश्वानाम् इति चाण्डजः
उक्त्वा गालवम् आपृच्छ्य जगाम भवनं स्वकम्
upalabdham idaṃ dvāram aśvānām iti cāṇḍajaḥ
uktvā gālavam āpṛcchya jagāma bhavanaṃ svakam
- 17
गते पतगराजे तु गालवः सह कन्यया
चिन्तयानः क्षमं दाने राज्ञां वै शुल्कतो ऽगमत्
gate patagarāje tu gālavaḥ saha kanyayā
cintayānaḥ kṣamaṃ dāne rājñāṃ vai śulkato 'gamat
- 18
सो ऽगच्छन्मनसेक्ष्वाकुं हर्यश्वं राजसत्तमम्
अयोध्यायां महावीर्यं चतुरङ्गबलान्वितम्
so 'gacchanmanasekṣvākuṃ haryaśvaṃ rājasattamam
ayodhyāyāṃ mahāvīryaṃ caturaṅgabalānvitam
- 19
कोशधान्यबलोपेतं प्रियपौरं द्विजप्रियम्
प्रजाभिकामं शाम्यन्तं कुर्वाणं तप उत्तमम्
kośadhānyabalopetaṃ priyapauraṃ dvijapriyam
prajābhikāmaṃ śāmyantaṃ kurvāṇaṃ tapa uttamam
- 20
तम् उपागम्य विप्रः स हर्यश्वं गालवो ऽब्रवीत्
कन्येयं मम राजेन्द्र प्रसवैः कुलवर्धिनी
tam upāgamya vipraḥ sa haryaśvaṃ gālavo 'bravīt
kanyeyaṃ mama rājendra prasavaiḥ kulavardhinī
- 21
इयं शुल्केन भार्यार्थे हर्यश्व प्रतिगृह्यताम्
शुल्कं ते कीर्तयिष्यामि तच्छ्रुत्वा सम्प्रधार्यताम्
iyaṃ śulkena bhāryārthe haryaśva pratigṛhyatām
śulkaṃ te kīrtayiṣyāmi tacchrutvā sampradhāryatām

