18 shlokas
- 1
वैशंपायन उवाच
तथा दूतैः समाज्ञाय आयान्तं मधुसूदनम्
धृतराष्ट्रो ऽब्रवीद्भीष्मम् अर्चयित्वा महाभुजम्
vaiśaṃpāyana uvāca
tathā dūtaiḥ samājñāya āyāntaṃ madhusūdanam
dhṛtarāṣṭro 'bravīdbhīṣmam arcayitvā mahābhujam
- 2
द्रोणं च संजयं चैव विदुरं च महामतिम्
दुर्योधनं च सामात्यं हृष्टरोमाब्रवीद् इदम्
droṇaṃ ca saṃjayaṃ caiva viduraṃ ca mahāmatim
duryodhanaṃ ca sāmātyaṃ hṛṣṭaromābravīd idam
- 3
अद्भुतं महद् आश्चर्यं श्रूयते कुरुनन्दन
स्त्रियो बालाश्च वृद्धाश्च कथयन्ति गृहे गृहे
adbhutaṃ mahad āścaryaṃ śrūyate kurunandana
striyo bālāśca vṛddhāśca kathayanti gṛhe gṛhe
- 4
सत्कृत्याचक्षते चान्ये तथैवान्ये समागताः
पृथग्वादाश्च वर्तन्ते चत्वरेषु सभासु च
satkṛtyācakṣate cānye tathaivānye samāgatāḥ
pṛthagvādāśca vartante catvareṣu sabhāsu ca
- 5
उपयास्यति दाशार्हः पाण्डवार्थे पराक्रमी
स नो मान्यश्च पूज्यश्च सर्वथा मधुसूदनः
upayāsyati dāśārhaḥ pāṇḍavārthe parākramī
sa no mānyaśca pūjyaśca sarvathā madhusūdanaḥ
- 6
तस्मिन्हि यात्रा लोकस्य भूतानाम् ईश्वरो हि सः
तस्मिन्धृतिश्च वीर्यं च प्रज्ञा चौजश्च माधवे
tasminhi yātrā lokasya bhūtānām īśvaro hi saḥ
tasmindhṛtiśca vīryaṃ ca prajñā caujaśca mādhave
- 7
स मान्यतां नरश्रेष्ठः स हि धर्मः सनातनः
पूजितो हि सुखाय स्याद् असुखः स्याद् अपूजितः
sa mānyatāṃ naraśreṣṭhaḥ sa hi dharmaḥ sanātanaḥ
pūjito hi sukhāya syād asukhaḥ syād apūjitaḥ
- 8
स चेत्तुष्यति दाशार्ह उपचारैर् अरिंदमः
कृत्स्नान्सर्वान् अभिप्रायान्प्राप्स्यामः सर्वराजसु
sa cettuṣyati dāśārha upacārair ariṃdamaḥ
kṛtsnānsarvān abhiprāyānprāpsyāmaḥ sarvarājasu
- 9
तस्य पूजार्थम् अद्यैव संविधत्स्व परंतप
सभाः पथि विधीयन्तां सर्वकामसमाहिताः
tasya pūjārtham adyaiva saṃvidhatsva paraṃtapa
sabhāḥ pathi vidhīyantāṃ sarvakāmasamāhitāḥ
- 10
यथा प्रीतिर्महाबाहो त्वयि जायेत तस्य वै
तथा कुरुष्व गान्धारे कथं वा भीष्म मन्यसे
yathā prītirmahābāho tvayi jāyeta tasya vai
tathā kuruṣva gāndhāre kathaṃ vā bhīṣma manyase
- 11
ततो भीष्मादयः सर्वे धृतराष्ट्रं जनाधिपम्
ऊचुः परमम् इत्येवं पूजयन्तो ऽस्य तद्वचः
tato bhīṣmādayaḥ sarve dhṛtarāṣṭraṃ janādhipam
ūcuḥ paramam ityevaṃ pūjayanto 'sya tadvacaḥ
- 12
तेषाम् अनुमतं ज्ञात्वा राजा दुर्योधनस्तदा
सभावास्तूनि रम्याणि प्रदेष्टुम् उपचक्रमे
teṣām anumataṃ jñātvā rājā duryodhanastadā
sabhāvāstūni ramyāṇi pradeṣṭum upacakrame
- 13
ततो देशेषु देशेषु रमणीयेषु भागशः
सर्वरत्नसमाकीर्णाः सभाश्चक्रुर् अनेकशः
tato deśeṣu deśeṣu ramaṇīyeṣu bhāgaśaḥ
sarvaratnasamākīrṇāḥ sabhāścakrur anekaśaḥ
- 14
आसनानि विचित्राणि युक्तानि विविधैर्गुणैः
स्त्रियो गन्धान् अलंकारान्सूक्ष्माणि वसनानि च
āsanāni vicitrāṇi yuktāni vividhairguṇaiḥ
striyo gandhān alaṃkārānsūkṣmāṇi vasanāni ca
- 15
गुणवन्त्यन्नपानानि भोज्यानि विविधानि च
माल्यानि च सुगन्धीनि तानि राजा ददौ ततः
guṇavantyannapānāni bhojyāni vividhāni ca
mālyāni ca sugandhīni tāni rājā dadau tataḥ
- 16
विशेषतश्च वासार्थं सभां ग्रामे वृकस्थले
विदधे कौरवो राजा बहुरत्नां मनोरमाम्
viśeṣataśca vāsārthaṃ sabhāṃ grāme vṛkasthale
vidadhe kauravo rājā bahuratnāṃ manoramām
- 17
एतद्विधाय वै सर्वं देवार्हम् अतिमानुषम्
आचख्यौ धृतराष्ट्राय राजा दुर्योधनस्तदा
etadvidhāya vai sarvaṃ devārham atimānuṣam
ācakhyau dhṛtarāṣṭrāya rājā duryodhanastadā
- 18
ताः सभाः केशवः सर्वा रत्नानि विविधानि च
असमीक्ष्यैव दाशार्ह उपायात्कुरुसद्म तत्
tāḥ sabhāḥ keśavaḥ sarvā ratnāni vividhāni ca
asamīkṣyaiva dāśārha upāyātkurusadma tat

