20 shlokas
- 1
संजय उवाच
कर्णस्य वचनं श्रुत्वा केशवः परवीरहा
उवाच प्रहसन्वाक्यं स्मितपूर्वम् इदं तदा
saṃjaya uvāca
karṇasya vacanaṃ śrutvā keśavaḥ paravīrahā
uvāca prahasanvākyaṃ smitapūrvam idaṃ tadā
- 2
अपि त्वां न तपेत्कर्ण राज्यलाभोपपादना
मया दत्तां हि पृथिवीं न प्रशासितुम् इच्छसि
api tvāṃ na tapetkarṇa rājyalābhopapādanā
mayā dattāṃ hi pṛthivīṃ na praśāsitum icchasi
- 3
ध्रुवो जयः पाण्डवानाम् इतीदं न संशयः कश्चन विद्यते ऽत्र
जयध्वजो दृश्यते पाण्डवस्य समुच्छ्रितो वानरराज उग्रः
dhruvo jayaḥ pāṇḍavānām itīdaṃ na saṃśayaḥ kaścana vidyate 'tra
jayadhvajo dṛśyate pāṇḍavasya samucchrito vānararāja ugraḥ
- 4
दिव्या माया विहिता भौवनेन समुच्छ्रिता इन्द्रकेतुप्रकाशा
दिव्यानि भूतानि भयावहानि दृश्यन्ति चैवात्र भयानकानि
divyā māyā vihitā bhauvanena samucchritā indraketuprakāśā
divyāni bhūtāni bhayāvahāni dṛśyanti caivātra bhayānakāni
- 5
न सज्जते शैलवनस्पतिभ्य ऊर्ध्वं तिर्यग्योजनमात्ररूपः
श्रीमान्ध्वजः कर्ण धनंजयस्य समुच्छ्रितः पावकतुल्यरूपः
na sajjate śailavanaspatibhya ūrdhvaṃ tiryagyojanamātrarūpaḥ
śrīmāndhvajaḥ karṇa dhanaṃjayasya samucchritaḥ pāvakatulyarūpaḥ
- 6
यदा द्रक्ष्यसि संग्रामे श्वेताश्वं कृष्णसारथिम्
ऐन्द्रम् अस्त्रं विकुर्वाणम् उभे चैवाग्निमारुते
yadā drakṣyasi saṃgrāme śvetāśvaṃ kṛṣṇasārathim
aindram astraṃ vikurvāṇam ubhe caivāgnimārute
- 7
गाण्डीवस्य च निर्घोषं विस्फूर्जितम् इवाशनेः
न तदा भविता त्रेता न कृतं द्वापरं न च
gāṇḍīvasya ca nirghoṣaṃ visphūrjitam ivāśaneḥ
na tadā bhavitā tretā na kṛtaṃ dvāparaṃ na ca
- 8
यदा द्रक्ष्यसि संग्रामे कुन्तीपुत्रं युधिष्ठिरम्
जपहोमसमायुक्तं स्वां रक्षन्तं महाचमूम्
yadā drakṣyasi saṃgrāme kuntīputraṃ yudhiṣṭhiram
japahomasamāyuktaṃ svāṃ rakṣantaṃ mahācamūm
- 9
आदित्यम् इव दुर्धर्षं तपन्तं शत्रुवाहिनीम्
न तदा भविता त्रेता न कृतं द्वापरं न च
ādityam iva durdharṣaṃ tapantaṃ śatruvāhinīm
na tadā bhavitā tretā na kṛtaṃ dvāparaṃ na ca
- 10
यदा द्रक्ष्यसि संग्रामे भीमसेनं महाबलम्
दुःशासनस्य रुधिरं पीत्वा नृत्यन्तम् आहवे
yadā drakṣyasi saṃgrāme bhīmasenaṃ mahābalam
duḥśāsanasya rudhiraṃ pītvā nṛtyantam āhave
- 11
प्रभिन्नम् इव मातङ्गं प्रतिद्विरदघातिनम्
न तदा भविता त्रेता न कृतं द्वापरं न च
prabhinnam iva mātaṅgaṃ pratidviradaghātinam
na tadā bhavitā tretā na kṛtaṃ dvāparaṃ na ca
- 12
यदा द्रक्ष्यसि संग्रामे माद्रीपुत्रौ महारथौ
वाहिनीं धार्तराष्ट्राणां क्षोभयन्तौ गजाविव
yadā drakṣyasi saṃgrāme mādrīputrau mahārathau
vāhinīṃ dhārtarāṣṭrāṇāṃ kṣobhayantau gajāviva
- 13
विगाढे शस्त्रसंपाते परवीररथारुजौ
न तदा भविता त्रेता न कृतं द्वापरं न च
vigāḍhe śastrasaṃpāte paravīrarathārujau
na tadā bhavitā tretā na kṛtaṃ dvāparaṃ na ca
- 14
यदा द्रक्ष्यसि संग्रामे द्रोणं शांतनवं कृपम्
सुयोधनं च राजानं सैन्धवं च जयद्रथम्
yadā drakṣyasi saṃgrāme droṇaṃ śāṃtanavaṃ kṛpam
suyodhanaṃ ca rājānaṃ saindhavaṃ ca jayadratham
- 15
युद्धायापततस्तूर्णं वारितान्सव्यसाचिना
न तदा भविता त्रेता न कृतं द्वापरं न च
yuddhāyāpatatastūrṇaṃ vāritānsavyasācinā
na tadā bhavitā tretā na kṛtaṃ dvāparaṃ na ca
- 16
ब्रूयाः कर्ण इतो गत्वा द्रोणं शांतनवं कृपम्
सौम्यो ऽयं वर्तते मासः सुप्रापयवसेन्धनः
brūyāḥ karṇa ito gatvā droṇaṃ śāṃtanavaṃ kṛpam
saumyo 'yaṃ vartate māsaḥ suprāpayavasendhanaḥ
- 17
पक्वौषधिवनस्फीतः फलवान् अल्पमक्षिकः
निष्पङ्को रसवत्तोयो नात्युष्णशिशिरः सुखः
pakvauṣadhivanasphītaḥ phalavān alpamakṣikaḥ
niṣpaṅko rasavattoyo nātyuṣṇaśiśiraḥ sukhaḥ
- 18
सप्तमाच्चापि दिवसाद् अमावास्या भविष्यति
संग्रामं योजयेत्तत्र तां ह्याहुः शक्रदेवताम्
saptamāccāpi divasād amāvāsyā bhaviṣyati
saṃgrāmaṃ yojayettatra tāṃ hyāhuḥ śakradevatām
- 19
तथा राज्ञो वदेः सर्वान्ये युद्धायाभ्युपागताः
यद्वो मनीषितं तद्वै सर्वं सम्पादयामि वः
tathā rājño vadeḥ sarvānye yuddhāyābhyupāgatāḥ
yadvo manīṣitaṃ tadvai sarvaṃ sampādayāmi vaḥ
- 20
राजानो राजपुत्राश्च दुर्योधनवशानुगाः
प्राप्य शस्त्रेण निधनं प्राप्स्यन्ति गतिम् उत्तमाम्
rājāno rājaputrāśca duryodhanavaśānugāḥ
prāpya śastreṇa nidhanaṃ prāpsyanti gatim uttamām

