25 shlokas
- 1
शल्य उवाच
ततः शक्रः स्तूयमानो गन्धर्वाप्सरसां गणैः
ऐरावतं समारुह्य द्विपेन्द्रं लक्षणैर्युतम्
śalya uvāca
tataḥ śakraḥ stūyamāno gandharvāpsarasāṃ gaṇaiḥ
airāvataṃ samāruhya dvipendraṃ lakṣaṇairyutam
- 2
पावकश्च महातेजा महर्षिश्च बृहस्पतिः
यमश्च वरुणश्चैव कुबेरश्च धनेश्वरः
pāvakaśca mahātejā maharṣiśca bṛhaspatiḥ
yamaśca varuṇaścaiva kuberaśca dhaneśvaraḥ
- 3
सर्वैर्देवैः परिवृतः शक्रो वृत्रनिषूदनः
गन्धर्वैर् अप्सरोभिश्च यातस्त्रिभुवनं प्रभुः
sarvairdevaiḥ parivṛtaḥ śakro vṛtraniṣūdanaḥ
gandharvair apsarobhiśca yātastribhuvanaṃ prabhuḥ
- 4
स समेत्य महेन्द्राण्या देवराजः शतक्रतुः
मुदा परमया युक्तः पालयामास देवराट्
sa sametya mahendrāṇyā devarājaḥ śatakratuḥ
mudā paramayā yuktaḥ pālayāmāsa devarāṭ
- 5
ततः स भगवांस्तत्र अङ्गिराः समदृश्यत
अथर्ववेदमन्त्रैश्च देवेन्द्रं समपूजयत्
tataḥ sa bhagavāṃstatra aṅgirāḥ samadṛśyata
atharvavedamantraiśca devendraṃ samapūjayat
- 6
ततस्तु भगवान् इन्द्रः प्रहृष्टः समपद्यत
वरं च प्रददौ तस्मै अथर्वाङ्गिरसे तदा
tatastu bhagavān indraḥ prahṛṣṭaḥ samapadyata
varaṃ ca pradadau tasmai atharvāṅgirase tadā
- 7
अथर्वाङ्गिरसं नाम अस्मिन्वेदे भविष्यति
उदाहरणम् एतद्धि यज्ञभागं च लप्स्यसे
atharvāṅgirasaṃ nāma asminvede bhaviṣyati
udāharaṇam etaddhi yajñabhāgaṃ ca lapsyase
- 8
एवं सम्पूज्य भगवान् अथर्वाङ्गिरसं तदा
व्यसर्जयन्महाराज देवराजः शतक्रतुः
evaṃ sampūjya bhagavān atharvāṅgirasaṃ tadā
vyasarjayanmahārāja devarājaḥ śatakratuḥ
- 9
सम्पूज्य सर्वांस्त्रिदशान् ऋषींश्चापि तपोधनान्
इन्द्रः प्रमुदितो राजन्धर्मेणापालयत्प्रजाः
sampūjya sarvāṃstridaśān ṛṣīṃścāpi tapodhanān
indraḥ pramudito rājandharmeṇāpālayatprajāḥ
- 10
एवं दुःखम् अनुप्राप्तम् इन्द्रेण सह भार्यया
अज्ञातवासश्च कृतः शत्रूणां वधकाङ्क्षया
evaṃ duḥkham anuprāptam indreṇa saha bhāryayā
ajñātavāsaśca kṛtaḥ śatrūṇāṃ vadhakāṅkṣayā
- 11
नात्र मन्युस्त्वया कार्यो यत्क्लिष्टो ऽसि महावने
द्रौपद्या सह राजेन्द्र भ्रातृभिश्च महात्मभिः
nātra manyustvayā kāryo yatkliṣṭo 'si mahāvane
draupadyā saha rājendra bhrātṛbhiśca mahātmabhiḥ
- 12
एवं त्वम् अपि राजेन्द्र राज्यं प्राप्स्यसि भारत
वृत्रं हत्वा यथा प्राप्तः शक्रः कौरवनन्दन
evaṃ tvam api rājendra rājyaṃ prāpsyasi bhārata
vṛtraṃ hatvā yathā prāptaḥ śakraḥ kauravanandana
- 13
दुराचारश्च नहुषो ब्रह्मद्विट्पापचेतनः
अगस्त्यशापाभिहतो विनष्टः शाश्वतीः समाः
durācāraśca nahuṣo brahmadviṭpāpacetanaḥ
agastyaśāpābhihato vinaṣṭaḥ śāśvatīḥ samāḥ
- 14
एवं तव दुरात्मानः शत्रवः शत्रुसूदन
क्षिप्रं नाशं गमिष्यन्ति कर्णदुर्योधनादयः
evaṃ tava durātmānaḥ śatravaḥ śatrusūdana
kṣipraṃ nāśaṃ gamiṣyanti karṇaduryodhanādayaḥ
- 15
ततः सागरपर्यन्तां भोक्ष्यसे मेदिनीम् इमाम्
भ्रातृभिः सहितो वीर द्रौपद्या च सहाभिभो
tataḥ sāgaraparyantāṃ bhokṣyase medinīm imām
bhrātṛbhiḥ sahito vīra draupadyā ca sahābhibho
- 16
उपाख्यानम् इदं शक्रविजयं वेदसंमितम्
राज्ञा व्यूढेष्वनीकेषु श्रोतव्यं जयम् इच्छता
upākhyānam idaṃ śakravijayaṃ vedasaṃmitam
rājñā vyūḍheṣvanīkeṣu śrotavyaṃ jayam icchatā
- 17
तस्मात्संश्रावयामि त्वां विजयं जयतां वर
संस्तूयमाना वर्धन्ते महात्मानो युधिष्ठिर
tasmātsaṃśrāvayāmi tvāṃ vijayaṃ jayatāṃ vara
saṃstūyamānā vardhante mahātmāno yudhiṣṭhira
- 18
क्षत्रियाणाम् अभावो ऽयं युधिष्ठिर महात्मनाम्
दुर्योधनापराधेन भीमार्जुनबलेन च
kṣatriyāṇām abhāvo 'yaṃ yudhiṣṭhira mahātmanām
duryodhanāparādhena bhīmārjunabalena ca
- 19
आख्यानम् इन्द्रविजयं य इदं नियतः पठेत्
धूतपाप्मा जितस्वर्गः स प्रेत्येह च मोदते
ākhyānam indravijayaṃ ya idaṃ niyataḥ paṭhet
dhūtapāpmā jitasvargaḥ sa pretyeha ca modate
- 20
न चारिजं भयं तस्य न चापुत्रो भवेन्नरः
नापदं प्राप्नुयात्कांचिद्दीर्घम् आयुश्च विन्दति
सर्वत्र जयम् आप्नोति न कदाचित्पराजयम्
na cārijaṃ bhayaṃ tasya na cāputro bhavennaraḥ
nāpadaṃ prāpnuyātkāṃciddīrgham āyuśca vindati
sarvatra jayam āpnoti na kadācitparājayam
- 21
वैशंपायन उवाच
एवम् आश्वासितो राजा शल्येन भरतर्षभ
पूजयामास विधिवच्छल्यं धर्मभृतां वरः
vaiśaṃpāyana uvāca
evam āśvāsito rājā śalyena bharatarṣabha
pūjayāmāsa vidhivacchalyaṃ dharmabhṛtāṃ varaḥ
- 22
श्रुत्वा शल्यस्य वचनं कुन्तीपुत्रो युधिष्ठिरः
प्रत्युवाच महाबाहुर्मद्रराजम् इदं वचः
śrutvā śalyasya vacanaṃ kuntīputro yudhiṣṭhiraḥ
pratyuvāca mahābāhurmadrarājam idaṃ vacaḥ
- 23
भवान्कर्णस्य सारथ्यं करिष्यति न संशयः
तत्र तेजोवधः कार्यः कर्णस्य मम संस्तवैः
bhavānkarṇasya sārathyaṃ kariṣyati na saṃśayaḥ
tatra tejovadhaḥ kāryaḥ karṇasya mama saṃstavaiḥ
- 24
शल्य उवाच
एवम् एतत्करिष्यामि यथा मां सम्प्रभाषसे
यच्चान्यद् अपि शक्ष्यामि तत्करिष्याम्यहं तव
śalya uvāca
evam etatkariṣyāmi yathā māṃ samprabhāṣase
yaccānyad api śakṣyāmi tatkariṣyāmyahaṃ tava
- 25
वैशंपायन उवाच
तत आमन्त्र्य कौन्तेयाञ्शल्यो मद्राधिपस्तदा
जगाम सबलः श्रीमान्दुर्योधनम् अरिंदमः
vaiśaṃpāyana uvāca
tata āmantrya kaunteyāñśalyo madrādhipastadā
jagāma sabalaḥ śrīmānduryodhanam ariṃdamaḥ

