21 shlokas
- 1
सात्यकिर् उवाच
यादृशः पुरुषस्यात्मा तादृशं सम्प्रभाषते
यथारूपो ऽन्तरात्मा ते तथारूपं प्रभाषसे
sātyakir uvāca
yādṛśaḥ puruṣasyātmā tādṛśaṃ samprabhāṣate
yathārūpo 'ntarātmā te tathārūpaṃ prabhāṣase
- 2
सन्ति वै पुरुषाः शूराः सन्ति कापुरुषास्तथा
उभावेतौ दृढौ पक्षौ दृश्येते पुरुषान्प्रति
santi vai puruṣāḥ śūrāḥ santi kāpuruṣāstathā
ubhāvetau dṛḍhau pakṣau dṛśyete puruṣānprati
- 5
कथं हि धर्मराजस्य दोषम् अल्पम् अपि ब्रुवन्
लभते परिषन्मध्ये व्याहर्तुम् अकुतोभयः
kathaṃ hi dharmarājasya doṣam alpam api bruvan
labhate pariṣanmadhye vyāhartum akutobhayaḥ
- 6
समाहूय महात्मानं जितवन्तो ऽक्षकोविदाः
अनक्षज्ञं यथाश्रद्धं तेषु धर्मजयः कुतः
samāhūya mahātmānaṃ jitavanto 'kṣakovidāḥ
anakṣajñaṃ yathāśraddhaṃ teṣu dharmajayaḥ kutaḥ
- 7
यदि कुन्तीसुतं गेहे क्रीडन्तं भ्रातृभिः सह
अभिगम्य जयेयुस्ते तत्तेषां धर्मतो भवेत्
yadi kuntīsutaṃ gehe krīḍantaṃ bhrātṛbhiḥ saha
abhigamya jayeyuste tatteṣāṃ dharmato bhavet
- 8
समाहूय तु राजानं क्षत्रधर्मरतं सदा
निकृत्या जितवन्तस्ते किं नु तेषां परं शुभम्
samāhūya tu rājānaṃ kṣatradharmarataṃ sadā
nikṛtyā jitavantaste kiṃ nu teṣāṃ paraṃ śubham
- 9
कथं प्रणिपतेच्चायम् इह कृत्वा पणं परम्
वनवासाद्विमुक्तस्तु प्राप्तः पैतामहं पदम्
kathaṃ praṇipateccāyam iha kṛtvā paṇaṃ param
vanavāsādvimuktastu prāptaḥ paitāmahaṃ padam
- 10
यद्ययं परवित्तानि कामयेत युधिष्ठिरः
एवम् अप्ययम् अत्यन्तं परान्नार्हति याचितुम्
yadyayaṃ paravittāni kāmayeta yudhiṣṭhiraḥ
evam apyayam atyantaṃ parānnārhati yācitum
- 11
कथं च धर्मयुक्तास्ते न च राज्यं जिहीर्षवः
निवृत्तवासान्कौन्तेयान्य आहुर्विदिता इति
kathaṃ ca dharmayuktāste na ca rājyaṃ jihīrṣavaḥ
nivṛttavāsānkaunteyānya āhurviditā iti
- 12
अनुनीता हि भीष्मेण द्रोणेन च महात्मना
न व्यवस्यन्ति पाण्डूनां प्रदातुं पैतृकं वसु
anunītā hi bhīṣmeṇa droṇena ca mahātmanā
na vyavasyanti pāṇḍūnāṃ pradātuṃ paitṛkaṃ vasu
- 13
अहं तु ताञ्शितैर्बाणैर् अनुनीय रणे बलात्
पादयोः पातयिष्यामि कौन्तेयस्य महात्मनः
ahaṃ tu tāñśitairbāṇair anunīya raṇe balāt
pādayoḥ pātayiṣyāmi kaunteyasya mahātmanaḥ
- 14
अथ ते न व्यवस्यन्ति प्रणिपाताय धीमतः
गमिष्यन्ति सहामात्या यमस्य सदनं प्रति
atha te na vyavasyanti praṇipātāya dhīmataḥ
gamiṣyanti sahāmātyā yamasya sadanaṃ prati
- 15
न हि ते युयुधानस्य संरब्धस्य युयुत्सतः
वेगं समर्थाः संसोढुं वज्रस्येव महीधराः
na hi te yuyudhānasya saṃrabdhasya yuyutsataḥ
vegaṃ samarthāḥ saṃsoḍhuṃ vajrasyeva mahīdharāḥ
- 16
को हि गाण्डीवधन्वानं कश्च चक्रायुधं युधि
मां चापि विषहेत्को नु कश्च भीमं दुरासदम्
ko hi gāṇḍīvadhanvānaṃ kaśca cakrāyudhaṃ yudhi
māṃ cāpi viṣahetko nu kaśca bhīmaṃ durāsadam
- 17
यमौ च दृढधन्वानौ यमकल्पौ महाद्युती
को जिजीविषुर् आसीदेद्धृष्टद्युम्नं च पार्षतम्
yamau ca dṛḍhadhanvānau yamakalpau mahādyutī
ko jijīviṣur āsīdeddhṛṣṭadyumnaṃ ca pārṣatam
- 18
पञ्चेमान्पाण्डवेयांश्च द्रौपद्याः कीर्तिवर्धनान्
समप्रमाणान्पाण्डूनां समवीर्यान्मदोत्कटान्
pañcemānpāṇḍaveyāṃśca draupadyāḥ kīrtivardhanān
samapramāṇānpāṇḍūnāṃ samavīryānmadotkaṭān
- 19
सौभद्रं च महेष्वासम् अमरैर् अपि दुःसहम्
गदप्रद्युम्नसाम्बांश्च कालवज्रानलोपमान्
saubhadraṃ ca maheṣvāsam amarair api duḥsaham
gadapradyumnasāmbāṃśca kālavajrānalopamān
- 20
ते वयं धृतराष्ट्रस्य पुत्रं शकुनिना सह
कर्णेन च निहत्याजावभिषेक्ष्याम पाण्डवम्
te vayaṃ dhṛtarāṣṭrasya putraṃ śakuninā saha
karṇena ca nihatyājāvabhiṣekṣyāma pāṇḍavam
- 21
नाधर्मो विद्यते कश्चिच्छत्रून्हत्वाततायिनः
अधर्म्यम् अयशस्यं च शात्रवाणां प्रयाचनम्
nādharmo vidyate kaścicchatrūnhatvātatāyinaḥ
adharmyam ayaśasyaṃ ca śātravāṇāṃ prayācanam
- 22
हृद्गतस्तस्य यः कामस्तं कुरुध्वम् अतन्द्रिताः
निसृष्टं धृतराष्ट्रेण राज्यं प्राप्नोतु पाण्डवः
hṛdgatastasya yaḥ kāmastaṃ kurudhvam atandritāḥ
nisṛṣṭaṃ dhṛtarāṣṭreṇa rājyaṃ prāpnotu pāṇḍavaḥ
- 23
अद्य पाण्डुसुतो राज्यं लभतां वा युधिष्ठिरः
निहता वा रणे सर्वे स्वप्स्यन्ति वसुधातले
adya pāṇḍusuto rājyaṃ labhatāṃ vā yudhiṣṭhiraḥ
nihatā vā raṇe sarve svapsyanti vasudhātale

