15 shlokas
- 1
संजय उवाच
अर्जुनो वासुदेवश्च धन्विनौ परमार्चितौ
कामाद् अन्यत्र सम्भूतौ सर्वाभावाय संमितौ
saṃjaya uvāca
arjuno vāsudevaśca dhanvinau paramārcitau
kāmād anyatra sambhūtau sarvābhāvāya saṃmitau
- 2
द्याम् अन्तरं समास्थाय यथायुक्तं मनस्विनः
चक्रं तद्वासुदेवस्य मायया वर्तते विभो
dyām antaraṃ samāsthāya yathāyuktaṃ manasvinaḥ
cakraṃ tadvāsudevasya māyayā vartate vibho
- 3
सापह्नवं पाण्डवेषु पाण्डवानां सुसंमतम्
सारासारबलं ज्ञात्वा तत्समासेन मे शृणु
sāpahnavaṃ pāṇḍaveṣu pāṇḍavānāṃ susaṃmatam
sārāsārabalaṃ jñātvā tatsamāsena me śṛṇu
- 4
नरकं शम्बरं चैव कंसं चैद्यं च माधवः
जितवान्घोरसंकाशान्क्रीडन्न् इव जनार्दनः
narakaṃ śambaraṃ caiva kaṃsaṃ caidyaṃ ca mādhavaḥ
jitavānghorasaṃkāśānkrīḍann iva janārdanaḥ
- 5
पृथिवीं चान्तरिक्षं च द्यां चैव पुरुषोत्तमः
मनसैव विशिष्टात्मा नयत्यात्मवशं वशी
pṛthivīṃ cāntarikṣaṃ ca dyāṃ caiva puruṣottamaḥ
manasaiva viśiṣṭātmā nayatyātmavaśaṃ vaśī
- 6
भूयो भूयो हि यद्राजन्पृच्छसे पाण्डवान्प्रति
सारासारबलं ज्ञातुं तन्मे निगदतः शृणु
bhūyo bhūyo hi yadrājanpṛcchase pāṇḍavānprati
sārāsārabalaṃ jñātuṃ tanme nigadataḥ śṛṇu
- 7
एकतो वा जगत्कृत्स्नम् एकतो वा जनार्दनः
सारतो जगतः कृत्स्नाद् अतिरिक्तो जनार्दनः
ekato vā jagatkṛtsnam ekato vā janārdanaḥ
sārato jagataḥ kṛtsnād atirikto janārdanaḥ
- 8
भस्म कुर्याज्जगद् इदं मनसैव जनार्दनः
न तु कृत्स्नं जगच्छक्तं भस्म कर्तुं जनार्दनम्
bhasma kuryājjagad idaṃ manasaiva janārdanaḥ
na tu kṛtsnaṃ jagacchaktaṃ bhasma kartuṃ janārdanam
- 9
यतः सत्यं यतो धर्मो यतो ह्रीर् आर्जवं यतः
ततो भवति गोविन्दो यतः कृष्णस्ततो जयः
yataḥ satyaṃ yato dharmo yato hrīr ārjavaṃ yataḥ
tato bhavati govindo yataḥ kṛṣṇastato jayaḥ
- 10
पृथिवीं चान्तरिक्षं च दिवं च पुरुषोत्तमः
विचेष्टयति भूतात्मा क्रीडन्न् इव जनार्दनः
pṛthivīṃ cāntarikṣaṃ ca divaṃ ca puruṣottamaḥ
viceṣṭayati bhūtātmā krīḍann iva janārdanaḥ
- 11
स कृत्वा पाण्डवान्सत्रं लोकं संमोहयन्न् इव
अधर्मनिरतान्मूढान्दग्धुम् इच्छति ते सुतान्
sa kṛtvā pāṇḍavānsatraṃ lokaṃ saṃmohayann iva
adharmaniratānmūḍhāndagdhum icchati te sutān
- 12
कालचक्रं जगच्चक्रं युगचक्रं च केशवः
आत्मयोगेन भगवान्परिवर्तयते ऽनिशम्
kālacakraṃ jagaccakraṃ yugacakraṃ ca keśavaḥ
ātmayogena bhagavānparivartayate 'niśam
- 13
कालस्य च हि मृत्योश्च जङ्गमस्थावरस्य च
ईशते भगवान् एकः सत्यम् एतद्ब्रवीमि ते
kālasya ca hi mṛtyośca jaṅgamasthāvarasya ca
īśate bhagavān ekaḥ satyam etadbravīmi te
- 14
ईशन् अपि महायोगी सर्वस्य जगतो हरिः
कर्माण्यारभते कर्तुं कीनाश इव दुर्बलः
īśan api mahāyogī sarvasya jagato hariḥ
karmāṇyārabhate kartuṃ kīnāśa iva durbalaḥ
- 15
तेन वञ्चयते लोकान्मायायोगेन केशवः
ये तम् एव प्रपद्यन्ते न ते मुह्यन्ति मानवाः
tena vañcayate lokānmāyāyogena keśavaḥ
ye tam eva prapadyante na te muhyanti mānavāḥ

