12 shlokas
- 1
संजय उवाच
उलूकस्य वचः श्रुत्वा कुन्तीपुत्रो युधिष्ठिरः
सेनां निर्यापयामास धृष्टद्युम्नपुरोगमाम्
saṃjaya uvāca
ulūkasya vacaḥ śrutvā kuntīputro yudhiṣṭhiraḥ
senāṃ niryāpayāmāsa dhṛṣṭadyumnapurogamām
- 2
पदातिनीं नागवतीं रथिनीम् अश्ववृन्दिनीम्
चतुर्विधबलां भीमाम् अकम्प्यां पृथिवीम् इव
padātinīṃ nāgavatīṃ rathinīm aśvavṛndinīm
caturvidhabalāṃ bhīmām akampyāṃ pṛthivīm iva
- 3
भीमसेनादिभिर्गुप्तां सार्जुनैश्च महारथैः
धृष्टद्युम्नवशां दुर्गां सागरस्तिमितोपमाम्
bhīmasenādibhirguptāṃ sārjunaiśca mahārathaiḥ
dhṛṣṭadyumnavaśāṃ durgāṃ sāgarastimitopamām
- 4
तस्यास्त्वग्रे महेष्वासः पाञ्चाल्यो युद्धदुर्मदः
द्रोणप्रेप्सुर् अनीकानि धृष्टद्युम्नः प्रकर्षति
tasyāstvagre maheṣvāsaḥ pāñcālyo yuddhadurmadaḥ
droṇaprepsur anīkāni dhṛṣṭadyumnaḥ prakarṣati
- 5
यथाबलं यथोत्साहं रथिनः समुपादिशत्
अर्जुनं सूतपुत्राय भीमं दुर्योधनाय च
yathābalaṃ yathotsāhaṃ rathinaḥ samupādiśat
arjunaṃ sūtaputrāya bhīmaṃ duryodhanāya ca
- 6
अश्वत्थाम्ने च नकुलं शैब्यं च कृतवर्मणे
सैन्धवाय च वार्ष्णेयं युयुधानम् उपादिशत्
aśvatthāmne ca nakulaṃ śaibyaṃ ca kṛtavarmaṇe
saindhavāya ca vārṣṇeyaṃ yuyudhānam upādiśat
- 7
शिखण्डिनं च भीष्माय प्रमुखे समकल्पयत्
सहदेवं शकुनये चेकितानं शलाय च
śikhaṇḍinaṃ ca bhīṣmāya pramukhe samakalpayat
sahadevaṃ śakunaye cekitānaṃ śalāya ca
- 8
धृष्टकेतुं च शल्याय गौतमायोत्तमौजसम्
द्रौपदेयांश्च पञ्चभ्यस्त्रिगर्तेभ्यः समादिशत्
dhṛṣṭaketuṃ ca śalyāya gautamāyottamaujasam
draupadeyāṃśca pañcabhyastrigartebhyaḥ samādiśat
- 9
वृषसेनाय सौभद्रं शेषाणां च महीक्षिताम्
समर्थं तं हि मेने वै पार्थाद् अभ्यधिकं रणे
vṛṣasenāya saubhadraṃ śeṣāṇāṃ ca mahīkṣitām
samarthaṃ taṃ hi mene vai pārthād abhyadhikaṃ raṇe
- 10
एवं विभज्य योधांस्तान्पृथक्च सह चैव ह
ज्वालावर्णो महेष्वासो द्रोणम् अंशम् अकल्पयत्
evaṃ vibhajya yodhāṃstānpṛthakca saha caiva ha
jvālāvarṇo maheṣvāso droṇam aṃśam akalpayat
- 11
धृष्टद्युम्नो महेष्वासः सेनापतिपतिस्ततः
विधिवद्व्यूह्य मेधावी युद्धाय धृतमानसः
dhṛṣṭadyumno maheṣvāsaḥ senāpatipatistataḥ
vidhivadvyūhya medhāvī yuddhāya dhṛtamānasaḥ
- 12
यथादिष्टान्यनीकानि पाण्डवानाम् अयोजयत्
जयाय पाण्डुपुत्राणां यत्तस्तस्थौ रणाजिरे
yathādiṣṭānyanīkāni pāṇḍavānām ayojayat
jayāya pāṇḍuputrāṇāṃ yattastasthau raṇājire

