12 shlokas
- 1
कर्ण उवाच
राधेयो ऽहम् आधिरथिः कर्णस्त्वाम् अभिवादये
प्राप्ता किमर्थं भवती ब्रूहि किं करवाणि ते
karṇa uvāca
rādheyo 'ham ādhirathiḥ karṇastvām abhivādaye
prāptā kimarthaṃ bhavatī brūhi kiṃ karavāṇi te
- 2
कुन्त्युवाच
कौन्तेयस्त्वं न राधेयो न तवाधिरथः पिता
नासि सूतकुले जातः कर्ण तद्विद्धि मे वचः
kuntyuvāca
kaunteyastvaṃ na rādheyo na tavādhirathaḥ pitā
nāsi sūtakule jātaḥ karṇa tadviddhi me vacaḥ
- 3
कानीनस्त्वं मया जातः पूर्वजः कुक्षिणा धृतः
कुन्तिभोजस्य भवने पार्थस्त्वम् असि पुत्रक
kānīnastvaṃ mayā jātaḥ pūrvajaḥ kukṣiṇā dhṛtaḥ
kuntibhojasya bhavane pārthastvam asi putraka
- 4
प्रकाशकर्मा तपनो यो ऽयं देवो विरोचनः
अजीजनत्त्वां मय्येष कर्ण शस्त्रभृतां वरम्
prakāśakarmā tapano yo 'yaṃ devo virocanaḥ
ajījanattvāṃ mayyeṣa karṇa śastrabhṛtāṃ varam
- 5
कुण्डली बद्धकवचो देवगर्भः श्रिया वृतः
जातस्त्वम् असि दुर्धर्ष मया पुत्र पितुर्गृहे
kuṇḍalī baddhakavaco devagarbhaḥ śriyā vṛtaḥ
jātastvam asi durdharṣa mayā putra piturgṛhe
- 6
स त्वं भ्रातॄन् असंबुद्ध्वा मोहाद्यद् उपसेवसे
धार्तराष्ट्रान्न तद्युक्तं त्वयि पुत्र विशेषतः
sa tvaṃ bhrātṝn asaṃbuddhvā mohādyad upasevase
dhārtarāṣṭrānna tadyuktaṃ tvayi putra viśeṣataḥ
- 7
एतद्धर्मफलं पुत्र नराणां धर्मनिश्चये
यत्तुष्यन्त्यस्य पितरो माता चाप्येकदर्शिनी
etaddharmaphalaṃ putra narāṇāṃ dharmaniścaye
yattuṣyantyasya pitaro mātā cāpyekadarśinī
- 8
अर्जुनेनार्जितां पूर्वं हृतां लोभाद् असाधुभिः
आच्छिद्य धार्तराष्ट्रेभ्यो भुङ्क्ष्व यौधिष्ठिरीं श्रियम्
arjunenārjitāṃ pūrvaṃ hṛtāṃ lobhād asādhubhiḥ
ācchidya dhārtarāṣṭrebhyo bhuṅkṣva yaudhiṣṭhirīṃ śriyam
- 9
अद्य पश्यन्तु कुरवः कर्णार्जुनसमागमम्
सौभ्रात्रेण तद् आलक्ष्य संनमन्ताम् असाधवः
adya paśyantu kuravaḥ karṇārjunasamāgamam
saubhrātreṇa tad ālakṣya saṃnamantām asādhavaḥ
- 10
कर्णार्जुनौ वै भवतां यथा रामजनार्दनौ
असाध्यं किं नु लोके स्याद्युवयोः सहितात्मनोः
karṇārjunau vai bhavatāṃ yathā rāmajanārdanau
asādhyaṃ kiṃ nu loke syādyuvayoḥ sahitātmanoḥ
- 11
कर्ण शोभिष्यसे नूनं पञ्चभिर्भ्रातृभिर्वृतः
वेदैः परिवृतो ब्रह्मा यथा वेदाङ्गपञ्चमैः
karṇa śobhiṣyase nūnaṃ pañcabhirbhrātṛbhirvṛtaḥ
vedaiḥ parivṛto brahmā yathā vedāṅgapañcamaiḥ
- 12
उपपन्नो गुणैः श्रेष्ठो ज्येष्ठः श्रेष्ठेषु बन्धुषु
सूतपुत्रेति मा शब्दः पार्थस्त्वम् असि वीर्यवान्
upapanno guṇaiḥ śreṣṭho jyeṣṭhaḥ śreṣṭheṣu bandhuṣu
sūtaputreti mā śabdaḥ pārthastvam asi vīryavān

