28 shlokas
- 1
धृतराष्ट्र उवाच
राजपुत्रैः परिवृतस्तथामात्यैश्च संजय
उपारोप्य रथे कर्णं निर्यातो मधुसूदनः
dhṛtarāṣṭra uvāca
rājaputraiḥ parivṛtastathāmātyaiśca saṃjaya
upāropya rathe karṇaṃ niryāto madhusūdanaḥ
- 2
किम् अब्रवीद्रथोपस्थे राधेयं परवीरहा
कानि सान्त्वानि गोविन्दः सूतपुत्रे प्रयुक्तवान्
kim abravīdrathopasthe rādheyaṃ paravīrahā
kāni sāntvāni govindaḥ sūtaputre prayuktavān
- 3
ओघमेघस्वनः काले यत्कृष्णः कर्णम् अब्रवीत्
मृदु वा यदि वा तीक्ष्णं तन्ममाचक्ष्व संजय
oghameghasvanaḥ kāle yatkṛṣṇaḥ karṇam abravīt
mṛdu vā yadi vā tīkṣṇaṃ tanmamācakṣva saṃjaya
- 4
संजय उवाच
आनुपूर्व्येण वाक्यानि श्लक्ष्णानि च मृदूनि च
प्रियाणि धर्मयुक्तानि सत्यानि च हितानि च
saṃjaya uvāca
ānupūrvyeṇa vākyāni ślakṣṇāni ca mṛdūni ca
priyāṇi dharmayuktāni satyāni ca hitāni ca
- 5
हृदयग्रहणीयानि राधेयं मधुसूदनः
यान्यब्रवीद् अमेयात्मा तानि मे शृणु भारत
hṛdayagrahaṇīyāni rādheyaṃ madhusūdanaḥ
yānyabravīd ameyātmā tāni me śṛṇu bhārata
- 6
वासुदेव उवाच
उपासितास्ते राधेय ब्राह्मणा वेदपारगाः
तत्त्वार्थं परिपृष्टाश्च नियतेनानसूयया
vāsudeva uvāca
upāsitāste rādheya brāhmaṇā vedapāragāḥ
tattvārthaṃ paripṛṣṭāśca niyatenānasūyayā
- 7
त्वम् एव कर्ण जानासि वेदवादान्सनातनान्
त्वं ह्येव धर्मशास्त्रेषु सूक्ष्मेषु परिनिष्ठितः
tvam eva karṇa jānāsi vedavādānsanātanān
tvaṃ hyeva dharmaśāstreṣu sūkṣmeṣu pariniṣṭhitaḥ
- 8
कानीनश्च सहोढश्च कन्यायां यश्च जायते
वोढारं पितरं तस्य प्राहुः शास्त्रविदो जनाः
kānīnaśca sahoḍhaśca kanyāyāṃ yaśca jāyate
voḍhāraṃ pitaraṃ tasya prāhuḥ śāstravido janāḥ
- 9
सो ऽसि कर्ण तथा जातः पाण्डोः पुत्रो ऽसि धर्मतः
निग्रहाद्धर्मशास्त्राणाम् एहि राजा भविष्यसि
so 'si karṇa tathā jātaḥ pāṇḍoḥ putro 'si dharmataḥ
nigrahāddharmaśāstrāṇām ehi rājā bhaviṣyasi
- 10
पितृपक्षे हि ते पार्था मातृपक्षे च वृष्णयः
द्वौ पक्षावभिजानीहि त्वम् एतौ पुरुषर्षभ
pitṛpakṣe hi te pārthā mātṛpakṣe ca vṛṣṇayaḥ
dvau pakṣāvabhijānīhi tvam etau puruṣarṣabha
- 11
मया सार्धम् इतो यातम् अद्य त्वां तात पाण्डवाः
अभिजानन्तु कौन्तेयं पूर्वजातं युधिष्ठिरात्
mayā sārdham ito yātam adya tvāṃ tāta pāṇḍavāḥ
abhijānantu kaunteyaṃ pūrvajātaṃ yudhiṣṭhirāt
- 12
पादौ तव ग्रहीष्यन्ति भ्रातरः पञ्च पाण्डवाः
द्रौपदेयास्तथा पञ्च सौभद्रश्चापराजितः
pādau tava grahīṣyanti bhrātaraḥ pañca pāṇḍavāḥ
draupadeyāstathā pañca saubhadraścāparājitaḥ
- 13
राजानो राजपुत्राश्च पाण्डवार्थे समागताः
पादौ तव ग्रहीष्यन्ति सर्वे चान्धकवृष्णयः
rājāno rājaputrāśca pāṇḍavārthe samāgatāḥ
pādau tava grahīṣyanti sarve cāndhakavṛṣṇayaḥ
- 14
हिरण्मयांश्च ते कुम्भान्राजतान्पार्थिवांस्तथा
ओषध्यः सर्वबीजानि सर्वरत्नानि वीरुधः
hiraṇmayāṃśca te kumbhānrājatānpārthivāṃstathā
oṣadhyaḥ sarvabījāni sarvaratnāni vīrudhaḥ
- 15
राजन्या राजकन्याश्चाप्य् आनयन्त्वभिषेचनम्
षष्ठे च त्वां तथा काले द्रौपद्युपगमिष्यति
rājanyā rājakanyāścāpy ānayantvabhiṣecanam
ṣaṣṭhe ca tvāṃ tathā kāle draupadyupagamiṣyati
- 16
अद्य त्वाम् अभिषिञ्चन्तु चातुर्वैद्या द्विजातयः
पुरोहितः पाण्डवानां व्याघ्रचर्मण्यवस्थितम्
adya tvām abhiṣiñcantu cāturvaidyā dvijātayaḥ
purohitaḥ pāṇḍavānāṃ vyāghracarmaṇyavasthitam
- 17
तथैव भ्रातरः पञ्च पाण्डवाः पुरुषर्षभाः
द्रौपदेयास्तथा पञ्च पाञ्चालाश्चेदयस्तथा
tathaiva bhrātaraḥ pañca pāṇḍavāḥ puruṣarṣabhāḥ
draupadeyāstathā pañca pāñcālāścedayastathā
- 18
अहं च त्वाभिषेक्ष्यामि राजानं पृथिवीपतिम्
युवराजो ऽस्तु ते राजा कुन्तीपुत्रो युधिष्ठिरः
ahaṃ ca tvābhiṣekṣyāmi rājānaṃ pṛthivīpatim
yuvarājo 'stu te rājā kuntīputro yudhiṣṭhiraḥ
- 19
गृहीत्वा व्यजनं श्वेतं धर्मात्मा संशितव्रतः
उपान्वारोहतु रथं कुन्तीपुत्रो युधिष्ठिरः
gṛhītvā vyajanaṃ śvetaṃ dharmātmā saṃśitavrataḥ
upānvārohatu rathaṃ kuntīputro yudhiṣṭhiraḥ
- 20
छत्रं च ते महच्छ्वेतं भीमसेनो महाबलः
अभिषिक्तस्य कौन्तेय कौन्तेयो धारयिष्यति
chatraṃ ca te mahacchvetaṃ bhīmaseno mahābalaḥ
abhiṣiktasya kaunteya kaunteyo dhārayiṣyati
- 21
किङ्किणीशतनिर्घोषं वैयाघ्रपरिवारणम्
रथं श्वेतहयैर्युक्तम् अर्जुनो वाहयिष्यति
kiṅkiṇīśatanirghoṣaṃ vaiyāghraparivāraṇam
rathaṃ śvetahayairyuktam arjuno vāhayiṣyati
- 22
अभिमन्युश्च ते नित्यं प्रत्यासन्नो भविष्यति
नकुलः सहदेवश्च द्रौपदेयाश्च पञ्च ये
abhimanyuśca te nityaṃ pratyāsanno bhaviṣyati
nakulaḥ sahadevaśca draupadeyāśca pañca ye
- 23
पाञ्चालास्त्वानुयास्यन्ति शिखण्डी च महारथः
अहं च त्वानुयास्यामि सर्वे चान्धकवृष्णयः
दाशार्हाः परिवारास्ते दाशार्णाश्च विशां पते
pāñcālāstvānuyāsyanti śikhaṇḍī ca mahārathaḥ
ahaṃ ca tvānuyāsyāmi sarve cāndhakavṛṣṇayaḥ
dāśārhāḥ parivārāste dāśārṇāśca viśāṃ pate
- 24
भुङ्क्ष्व राज्यं महाबाहो भ्रातृभिः सह पाण्डवैः
जपैर्होमैश्च संयुक्तो मङ्गलैश्च पृथग्विधैः
bhuṅkṣva rājyaṃ mahābāho bhrātṛbhiḥ saha pāṇḍavaiḥ
japairhomaiśca saṃyukto maṅgalaiśca pṛthagvidhaiḥ
- 25
पुरोगमाश्च ते सन्तु द्रविडाः सह कुन्तलैः
आन्ध्रास्तालचराश्चैव चूचुपा वेणुपास्तथा
purogamāśca te santu draviḍāḥ saha kuntalaiḥ
āndhrāstālacarāścaiva cūcupā veṇupāstathā
- 26
स्तुवन्तु त्वाद्य बहुशः स्तुतिभिः सूतमागधाः
विजयं वसुषेणस्य घोषयन्तु च पाण्डवाः
stuvantu tvādya bahuśaḥ stutibhiḥ sūtamāgadhāḥ
vijayaṃ vasuṣeṇasya ghoṣayantu ca pāṇḍavāḥ
- 27
स त्वं परिवृतः पार्थैर्नक्षत्रैर् इव चन्द्रमाः
प्रशाधि राज्यं कौन्तेय कुन्तीं च प्रतिनन्दय
sa tvaṃ parivṛtaḥ pārthairnakṣatrair iva candramāḥ
praśādhi rājyaṃ kaunteya kuntīṃ ca pratinandaya
- 28
मित्राणि ते प्रहृष्यन्तु व्यथन्तु रिपवस्तथा
सौभ्रात्रं चैव ते ऽद्यास्तु भ्रातृभिः सह पाण्डवैः
mitrāṇi te prahṛṣyantu vyathantu ripavastathā
saubhrātraṃ caiva te 'dyāstu bhrātṛbhiḥ saha pāṇḍavaiḥ

