7 shlokas
- 1
धृतराष्ट्र उवाच
चक्षुष्मतां वै स्पृहयामि संजय द्रक्ष्यन्ति ये वासुदेवं समीपे
विभ्राजमानं वपुषा परेण प्रकाशयन्तं प्रदिशो दिशश्च
dhṛtarāṣṭra uvāca
cakṣuṣmatāṃ vai spṛhayāmi saṃjaya drakṣyanti ye vāsudevaṃ samīpe
vibhrājamānaṃ vapuṣā pareṇa prakāśayantaṃ pradiśo diśaśca
- 2
ईरयन्तं भारतीं भारतानाम् अभ्यर्चनीयां शंकरीं सृञ्जयानाम्
बुभूषद्भिर्ग्रहणीयाम् अनिन्द्यां परासूनाम् अग्रहणीयरूपाम्
īrayantaṃ bhāratīṃ bhāratānām abhyarcanīyāṃ śaṃkarīṃ sṛñjayānām
bubhūṣadbhirgrahaṇīyām anindyāṃ parāsūnām agrahaṇīyarūpām
- 3
समुद्यन्तं सात्वतम् एकवीरं प्रणेतारम् ऋषभं यादवानाम्
निहन्तारं क्षोभणं शात्रवाणां मुष्णन्तं च द्विषतां वै यशांसि
samudyantaṃ sātvatam ekavīraṃ praṇetāram ṛṣabhaṃ yādavānām
nihantāraṃ kṣobhaṇaṃ śātravāṇāṃ muṣṇantaṃ ca dviṣatāṃ vai yaśāṃsi
- 4
द्रष्टारो हि कुरवस्तं समेता महात्मानं शत्रुहणं वरेण्यम्
ब्रुवन्तं वाचम् अनृशंसरूपां वृष्णिश्रेष्ठं मोहयन्तं मदीयान्
draṣṭāro hi kuravastaṃ sametā mahātmānaṃ śatruhaṇaṃ vareṇyam
bruvantaṃ vācam anṛśaṃsarūpāṃ vṛṣṇiśreṣṭhaṃ mohayantaṃ madīyān
- 5
ऋषिं सनातनतमं विपश्चितं वाचः समुद्रं कलशं यतीनाम्
अरिष्टनेमिं गरुडं सुपर्णं पतिं प्रजानां भुवनस्य धाम
ṛṣiṃ sanātanatamaṃ vipaścitaṃ vācaḥ samudraṃ kalaśaṃ yatīnām
ariṣṭanemiṃ garuḍaṃ suparṇaṃ patiṃ prajānāṃ bhuvanasya dhāma
- 6
सहस्रशीर्षं पुरुषं पुराणम् अनादिमध्यान्तम् अनन्तकीर्तिम्
शुक्रस्य धातारम् अजं जनित्रं परं परेभ्यः शरणं प्रपद्ये
sahasraśīrṣaṃ puruṣaṃ purāṇam anādimadhyāntam anantakīrtim
śukrasya dhātāram ajaṃ janitraṃ paraṃ parebhyaḥ śaraṇaṃ prapadye
- 7
त्रैलोक्यनिर्माणकरं जनित्रं देवासुराणाम् अथ नागरक्षसाम्
नराधिपानां विदुषां प्रधानम् इन्द्रानुजं तं शरणं प्रपद्ये
trailokyanirmāṇakaraṃ janitraṃ devāsurāṇām atha nāgarakṣasām
narādhipānāṃ viduṣāṃ pradhānam indrānujaṃ taṃ śaraṇaṃ prapadye

