9 shlokas
- 1
वैशंपायन उवाच
दुर्योधने धार्तराष्ट्रे तद्वचो ऽप्रतिनन्दति
तूष्णींभूतेषु सर्वेषु समुत्तस्थुर्नरेश्वराः
vaiśaṃpāyana uvāca
duryodhane dhārtarāṣṭre tadvaco 'pratinandati
tūṣṇīṃbhūteṣu sarveṣu samuttasthurnareśvarāḥ
- 2
उत्थितेषु महाराज पृथिव्यां सर्वराजसु
रहिते संजयं राजा परिप्रष्टुं प्रचक्रमे
utthiteṣu mahārāja pṛthivyāṃ sarvarājasu
rahite saṃjayaṃ rājā paripraṣṭuṃ pracakrame
- 3
आशंसमानो विजयं तेषां पुत्रवशानुगः
आत्मनश्च परेषां च पाण्डवानां च निश्चयम्
āśaṃsamāno vijayaṃ teṣāṃ putravaśānugaḥ
ātmanaśca pareṣāṃ ca pāṇḍavānāṃ ca niścayam
- 4
धृतराष्ट्र उवाच
गावल्गणे ब्रूहि नः सारफल्गु स्वसेनायां यावद् इहास्ति किंचित्
त्वं पाण्डवानां निपुणं वेत्थ सर्वं किम् एषां ज्यायः किमु तेषां कनीयः
dhṛtarāṣṭra uvāca
gāvalgaṇe brūhi naḥ sāraphalgu svasenāyāṃ yāvad ihāsti kiṃcit
tvaṃ pāṇḍavānāṃ nipuṇaṃ vettha sarvaṃ kim eṣāṃ jyāyaḥ kimu teṣāṃ kanīyaḥ
- 5
त्वम् एतयोः सारवित्सर्वदर्शी धर्मार्थयोर्निपुणो निश्चयज्ञः
स मे पृष्टः संजय ब्रूहि सर्वं युध्यमानाः कतरे ऽस्मिन्न सन्ति
tvam etayoḥ sāravitsarvadarśī dharmārthayornipuṇo niścayajñaḥ
sa me pṛṣṭaḥ saṃjaya brūhi sarvaṃ yudhyamānāḥ katare 'sminna santi
- 6
संजय उवाच
न त्वां ब्रूयां रहिते जातु किंचिद् असूया हि त्वां प्रसहेत राजन्
आनयस्व पितरं संशितव्रतं गांधारीं च महिषीम् आजमीढ
saṃjaya uvāca
na tvāṃ brūyāṃ rahite jātu kiṃcid asūyā hi tvāṃ prasaheta rājan
ānayasva pitaraṃ saṃśitavrataṃ gāṃdhārīṃ ca mahiṣīm ājamīḍha
- 7
तौ ते ऽसूयां विनयेतां नरेन्द्र धर्मज्ञौ तौ निपुणौ निश्चयज्ञौ
तयोस्तु त्वां संनिधौ तद्वदेयं कृत्स्नं मतं वासुदेवार्जुनाभ्याम्
tau te 'sūyāṃ vinayetāṃ narendra dharmajñau tau nipuṇau niścayajñau
tayostu tvāṃ saṃnidhau tadvadeyaṃ kṛtsnaṃ mataṃ vāsudevārjunābhyām
- 8
वैशंपायन उवाच
ततस्तन्मतम् आज्ञाय संजयस्यात्मजस्य च
अभ्युपेत्य महाप्राज्ञः कृष्णद्वैपायनो ऽब्रवीत्
vaiśaṃpāyana uvāca
tatastanmatam ājñāya saṃjayasyātmajasya ca
abhyupetya mahāprājñaḥ kṛṣṇadvaipāyano 'bravīt
- 9
संपृच्छते धृतराष्ट्राय संजय आचक्ष्व सर्वं यावद् एषो ऽनुयुङ्क्ते
सर्वं यावद्वेत्थ तस्मिन्यथावद्याथातथ्यं वासुदेवे ऽर्जुने च
saṃpṛcchate dhṛtarāṣṭrāya saṃjaya ācakṣva sarvaṃ yāvad eṣo 'nuyuṅkte
sarvaṃ yāvadvettha tasminyathāvadyāthātathyaṃ vāsudeve 'rjune ca

