18 shlokas
- 1
संजय उवाच
द्रोणं स जित्वा पुरुषप्रवीरस्तथैव हार्दिक्यमुखांस्त्वदीयान्
प्रहस्य सूतं वचनं बभाषे शिनिप्रवीरः कुरुपुंगवाग्र्य
saṃjaya uvāca
droṇaṃ sa jitvā puruṣapravīrastathaiva hārdikyamukhāṃstvadīyān
prahasya sūtaṃ vacanaṃ babhāṣe śinipravīraḥ kurupuṃgavāgrya
- 2
निमित्तमात्रं वयम् अत्र सूत दग्धारयः केशवफल्गुनाभ्याम्
हतान्निहन्मेह नरर्षभेण वयं सुरेशात्मसमुद्भवेन
nimittamātraṃ vayam atra sūta dagdhārayaḥ keśavaphalgunābhyām
hatānnihanmeha nararṣabheṇa vayaṃ sureśātmasamudbhavena
- 3
तम् एवम् उक्त्वा शिनिपुंगवस्तदा महामृधे सो ऽग्र्यधनुर्धरो ऽरिहा
किरन्समन्तात्सहसा शरान्बली समापतच्छ्येन इवामिषं यथा
tam evam uktvā śinipuṃgavastadā mahāmṛdhe so 'gryadhanurdharo 'rihā
kiransamantātsahasā śarānbalī samāpatacchyena ivāmiṣaṃ yathā
- 4
तं यान्तम् अश्वैः शशिशङ्खवर्णैर्विगाह्य सैन्यं पुरुषप्रवीरम्
नाशक्नुवन्वारयितुं समन्ताद् आदित्यरश्मिप्रतिमं नराग्र्यम्
taṃ yāntam aśvaiḥ śaśiśaṅkhavarṇairvigāhya sainyaṃ puruṣapravīram
nāśaknuvanvārayituṃ samantād ādityaraśmipratimaṃ narāgryam
- 5
असह्यविक्रान्तम् अदीनसत्त्वं सर्वे गणा भारत दुर्विषह्यम्
सहस्रनेत्रप्रतिमप्रभावं दिवीव सूर्यं जलदव्यपाये
asahyavikrāntam adīnasattvaṃ sarve gaṇā bhārata durviṣahyam
sahasranetrapratimaprabhāvaṃ divīva sūryaṃ jaladavyapāye
- 6
अमर्षपूर्णस्त्वतिचित्रयोधी शरासनी काञ्चनवर्मधारी
सुदर्शनः सात्यकिम् आपतन्तं न्यवारयद्राजवरः प्रसह्य
amarṣapūrṇastvaticitrayodhī śarāsanī kāñcanavarmadhārī
sudarśanaḥ sātyakim āpatantaṃ nyavārayadrājavaraḥ prasahya
- 7
तयोर् अभूद्भरत संप्रहारः सुदारुणस्तं समभिप्रशंसन्
योधास्त्वदीयाश्च हि सोमकाश्च वृत्रेन्द्रयोर्युद्धम् इवामरौघाः
tayor abhūdbharata saṃprahāraḥ sudāruṇastaṃ samabhipraśaṃsan
yodhāstvadīyāśca hi somakāśca vṛtrendrayoryuddham ivāmaraughāḥ
- 8
शरैः सुतीक्ष्णैः शतशो ऽभ्यविध्यत्सुदर्शनः सात्वतमुख्यम् आजौ
अनागतान् एव तु तान्पृषत्कांश्चिछेद बाणैः शिनिपुंगवो ऽपि
śaraiḥ sutīkṣṇaiḥ śataśo 'bhyavidhyatsudarśanaḥ sātvatamukhyam ājau
anāgatān eva tu tānpṛṣatkāṃścicheda bāṇaiḥ śinipuṃgavo 'pi
- 9
तथैव शक्रप्रतिमो ऽपि सात्यकिः सुदर्शने यान्क्षिपति स्म सायकान्
द्विधा त्रिधा तान् अकरोत्सुदर्शनः शरोत्तमैः स्यन्दनवर्यम् आस्थितः
tathaiva śakrapratimo 'pi sātyakiḥ sudarśane yānkṣipati sma sāyakān
dvidhā tridhā tān akarotsudarśanaḥ śarottamaiḥ syandanavaryam āsthitaḥ
- 10
सम्प्रेक्ष्य बाणान्निहतांस्तदानीं सुदर्शनः सात्यकिबाणवेगैः
क्रोधाद्दिधक्षन्न् इव तिग्मतेजाः शरान् अमुञ्चत्तपनीयचित्रान्
samprekṣya bāṇānnihatāṃstadānīṃ sudarśanaḥ sātyakibāṇavegaiḥ
krodhāddidhakṣann iva tigmatejāḥ śarān amuñcattapanīyacitrān
- 11
पुनः स बाणैस्त्रिभिर् अग्निकल्पैर् आकर्णपूर्णैर्निशितैः सुपुङ्खैः
विव्याध देहावरणं विभिद्य ते सात्यकेर् आविविशुः शरीरम्
punaḥ sa bāṇaistribhir agnikalpair ākarṇapūrṇairniśitaiḥ supuṅkhaiḥ
vivyādha dehāvaraṇaṃ vibhidya te sātyaker āviviśuḥ śarīram
- 12
तथैव तस्यावनिपालपुत्रः संधाय बाणैर् अपरैर्ज्वलद्भिः
आजघ्निवांस्तान्रजतप्रकाशांश्चतुर्भिर् अश्वांश्चतुरः प्रसह्य
tathaiva tasyāvanipālaputraḥ saṃdhāya bāṇair aparairjvaladbhiḥ
ājaghnivāṃstānrajataprakāśāṃścaturbhir aśvāṃścaturaḥ prasahya
- 13
तथा तु तेनाभिहतस्तरस्वी नप्ता शिनेर् इन्द्रसमानवीर्यः
सुदर्शनस्येषुगणैः सुतीक्ष्णैर्हयान्निहत्याशु ननाद नादम्
tathā tu tenābhihatastarasvī naptā śiner indrasamānavīryaḥ
sudarśanasyeṣugaṇaiḥ sutīkṣṇairhayānnihatyāśu nanāda nādam
- 14
अथास्य सूतस्य शिरो निकृत्य भल्लेन वज्राशनिसंनिभेन
सुदर्शनस्यापि शिनिप्रवीरः क्षुरेण चिछेद शिरः प्रसह्य
athāsya sūtasya śiro nikṛtya bhallena vajrāśanisaṃnibhena
sudarśanasyāpi śinipravīraḥ kṣureṇa cicheda śiraḥ prasahya
- 15
सकुण्डलं पूर्णशशिप्रकाशं भ्राजिष्णु वक्त्रं निचकर्त देहात्
यथा पुरा वज्रधरः प्रसह्य बलस्य संख्ये ऽतिबलस्य राजन्
sakuṇḍalaṃ pūrṇaśaśiprakāśaṃ bhrājiṣṇu vaktraṃ nicakarta dehāt
yathā purā vajradharaḥ prasahya balasya saṃkhye 'tibalasya rājan
- 16
निहत्य तं पार्थिवपुत्रपौत्रं रणे यदूनाम् ऋषभस्तरस्वी
मुदा समेतः परया महात्मा रराज राजन्सुरराजकल्पः
nihatya taṃ pārthivaputrapautraṃ raṇe yadūnām ṛṣabhastarasvī
mudā sametaḥ parayā mahātmā rarāja rājansurarājakalpaḥ
- 17
ततो ययावर्जुनम् एव येन निवार्य सैन्यं तव मार्गणौघैः
सदश्वयुक्तेन रथेन निर्याल्लोकान्विसिस्मापयिषुर्नृवीरः
tato yayāvarjunam eva yena nivārya sainyaṃ tava mārgaṇaughaiḥ
sadaśvayuktena rathena niryāllokānvisismāpayiṣurnṛvīraḥ
- 18
तत्तस्य विस्मापयनीयम् अग्र्यम् अपूजयन्योधवराः समेताः
यद्वर्तमानान् इषुगोचरे ऽरीन्ददाह बाणैर्हुतभुग्यथैव
tattasya vismāpayanīyam agryam apūjayanyodhavarāḥ sametāḥ
yadvartamānān iṣugocare 'rīndadāha bāṇairhutabhugyathaiva

