19 shlokas
- 1
संजय उवाच
यन्मा पृच्छसि राजेन्द्र सिन्धुराजस्य विक्रमम्
शृणु तत्सर्वम् आख्यास्ये यथा पाण्डून् अयोधयत्
saṃjaya uvāca
yanmā pṛcchasi rājendra sindhurājasya vikramam
śṛṇu tatsarvam ākhyāsye yathā pāṇḍūn ayodhayat
- 2
तम् ऊहुः सारथेर्वश्याः सैन्धवाः साधुवाहिनः
विकुर्वाणा बृहन्तो ऽश्वाः श्वसनोपमरंहसः
tam ūhuḥ sārathervaśyāḥ saindhavāḥ sādhuvāhinaḥ
vikurvāṇā bṛhanto 'śvāḥ śvasanopamaraṃhasaḥ
- 3
गन्धर्वनगराकारं विधिवत्कल्पितं रथम्
तस्याभ्यशोभयत्केतुर्वाराहो राजतो महान्
gandharvanagarākāraṃ vidhivatkalpitaṃ ratham
tasyābhyaśobhayatketurvārāho rājato mahān
- 4
श्वेतच्छत्रपताकाभिश्चामरव्यजनेन च
स बभौ राजलिङ्गैस्तैस्तारापतिर् इवाम्बरे
śvetacchatrapatākābhiścāmaravyajanena ca
sa babhau rājaliṅgaistaistārāpatir ivāmbare
- 5
मुक्तावज्रमणिस्वर्णैर्भूषितं तद् अयस्मयम्
वरूथं विबभौ तस्य ज्योतिर्भिः खम् इवावृतम्
muktāvajramaṇisvarṇairbhūṣitaṃ tad ayasmayam
varūthaṃ vibabhau tasya jyotirbhiḥ kham ivāvṛtam
- 6
स विस्फार्य महच्चापं किरन्न् इषुगणान्बहून्
तत्खण्डं पूरयामास यद्व्यदारयद् आर्जुनिः
sa visphārya mahaccāpaṃ kirann iṣugaṇānbahūn
tatkhaṇḍaṃ pūrayāmāsa yadvyadārayad ārjuniḥ
- 7
स सात्यकिं त्रिभिर्बाणैर् अष्टभिश्च वृकोदरम्
धृष्टद्युम्नं तथा षष्ट्या विराटं दशभिः शरैः
sa sātyakiṃ tribhirbāṇair aṣṭabhiśca vṛkodaram
dhṛṣṭadyumnaṃ tathā ṣaṣṭyā virāṭaṃ daśabhiḥ śaraiḥ
- 8
द्रुपदं पञ्चभिस्तीक्ष्णैर्दशभिश्च शिखण्डिनम्
केकयान्पञ्चविंशत्या द्रौपदेयांस्त्रिभिस्त्रिभिः
drupadaṃ pañcabhistīkṣṇairdaśabhiśca śikhaṇḍinam
kekayānpañcaviṃśatyā draupadeyāṃstribhistribhiḥ
- 9
युधिष्ठिरं च सप्तत्या ततः शेषान् अपानुदत्
इषुजालेन महता तद् अद्भुतम् इवाभवत्
yudhiṣṭhiraṃ ca saptatyā tataḥ śeṣān apānudat
iṣujālena mahatā tad adbhutam ivābhavat
- 10
अथास्य शितपीतेन भल्लेनादिश्य कार्मुकम्
चिछेद प्रहसन्राजा धर्मपुत्रः प्रतापवान्
athāsya śitapītena bhallenādiśya kārmukam
cicheda prahasanrājā dharmaputraḥ pratāpavān
- 11
अक्ष्णोर्निमेषमात्रेण सो ऽन्यद् आदाय कार्मुकम्
विव्याध दशभिः पार्थ तांश्चैवान्यांस्त्रिभिस्त्रिभिः
akṣṇornimeṣamātreṇa so 'nyad ādāya kārmukam
vivyādha daśabhiḥ pārtha tāṃścaivānyāṃstribhistribhiḥ
- 12
तस्य तल्लाघवं ज्ञात्वा भीमो भल्लैस्त्रिभिः पुनः
धनुर्ध्वजं च छत्रं च क्षितौ क्षिप्रम् अपातयत्
tasya tallāghavaṃ jñātvā bhīmo bhallaistribhiḥ punaḥ
dhanurdhvajaṃ ca chatraṃ ca kṣitau kṣipram apātayat
- 13
सो ऽन्यद् आदाय बलवान्सज्यं कृत्वा च कार्मुकम्
भीमस्यापोथयत्केतुं धनुर् अश्वांश्च मारिष
so 'nyad ādāya balavānsajyaṃ kṛtvā ca kārmukam
bhīmasyāpothayatketuṃ dhanur aśvāṃśca māriṣa
- 14
स हताश्वाद् अवप्लुत्य छिन्नधन्वा रथोत्तमात्
सात्यकेर् आप्लुतो यानं गिर्यग्रम् इव केसरी
sa hatāśvād avaplutya chinnadhanvā rathottamāt
sātyaker āpluto yānaṃ giryagram iva kesarī
- 15
ततस्त्वदीयाः संहृष्टाः साधु साध्विति चुक्रुशुः
सिन्धुराजस्य तत्कर्म प्रेक्ष्याश्रद्धेयम् उत्तमम्
tatastvadīyāḥ saṃhṛṣṭāḥ sādhu sādhviti cukruśuḥ
sindhurājasya tatkarma prekṣyāśraddheyam uttamam
- 16
संक्रुद्धान्पाण्डवान् एको यद्दधारास्त्रतेजसा
तत्तस्य कर्म भूतानि सर्वाण्येवाभ्यपूजयन्
saṃkruddhānpāṇḍavān eko yaddadhārāstratejasā
tattasya karma bhūtāni sarvāṇyevābhyapūjayan
- 17
सौभद्रेण हतैः पूर्वं सोत्तरायुधिभिर्द्विपैः
पाण्डूनां दर्शितः पन्थाः सैन्धवेन निवारितः
saubhadreṇa hataiḥ pūrvaṃ sottarāyudhibhirdvipaiḥ
pāṇḍūnāṃ darśitaḥ panthāḥ saindhavena nivāritaḥ
- 18
यतमानास्तु ते वीरा मत्स्यपाञ्चालकेकयाः
पाण्डवाश्चान्वपद्यन्त प्रत्यैकश्येन सैन्धवम्
yatamānāstu te vīrā matsyapāñcālakekayāḥ
pāṇḍavāścānvapadyanta pratyaikaśyena saindhavam
- 19
यो यो हि यतते भेत्तुं द्रोणानीकं तवाहितः
तं तं देववरप्राप्त्या सैन्धवः प्रत्यवारयत्
yo yo hi yatate bhettuṃ droṇānīkaṃ tavāhitaḥ
taṃ taṃ devavaraprāptyā saindhavaḥ pratyavārayat

