20 shlokas
- 1
धृतराष्ट्र उवाच
बालम् अत्यन्तसुखिनम् अवार्यबलदर्पितम्
युद्धेषु कुशलं वीरं कुलपुत्रं तनुत्यजम्
dhṛtarāṣṭra uvāca
bālam atyantasukhinam avāryabaladarpitam
yuddheṣu kuśalaṃ vīraṃ kulaputraṃ tanutyajam
- 2
गाहमानम् अनीकानि सदश्वैस्तं त्रिहायनैः
अपि यौधिष्ठिरात्सैन्यात्कश्चिद् अन्वपतद्रथी
gāhamānam anīkāni sadaśvaistaṃ trihāyanaiḥ
api yaudhiṣṭhirātsainyātkaścid anvapatadrathī
- 3
संजय उवाच
युधिष्ठिरो भीमसेनः शिखण्डी सात्यकिर्यमौ
धृष्टद्युम्नो विराटश्च द्रुपदश्च सकेकयः
धृष्टकेतुश्च संरब्धो मत्स्याश्चान्वपतन्रणे
saṃjaya uvāca
yudhiṣṭhiro bhīmasenaḥ śikhaṇḍī sātyakiryamau
dhṛṣṭadyumno virāṭaśca drupadaśca sakekayaḥ
dhṛṣṭaketuśca saṃrabdho matsyāścānvapatanraṇe
- 4
अभ्यद्रवन्परीप्सन्तो व्यूढानीकाः प्रहारिणः
तान्दृष्ट्वा द्रवतः शूरांस्त्वदीया विमुखाभवन्
abhyadravanparīpsanto vyūḍhānīkāḥ prahāriṇaḥ
tāndṛṣṭvā dravataḥ śūrāṃstvadīyā vimukhābhavan
- 5
ततस्तद्विमुखं दृष्ट्वा तव सूनोर्महद्बलम्
जामाता तव तेजस्वी विष्टम्भयिषुर् आद्रवत्
tatastadvimukhaṃ dṛṣṭvā tava sūnormahadbalam
jāmātā tava tejasvī viṣṭambhayiṣur ādravat
- 6
सैन्धवस्य महाराज पुत्रो राजा जयद्रथः
स पुत्रगृद्धिनः पार्थान्सहसैन्यान् अवारयत्
saindhavasya mahārāja putro rājā jayadrathaḥ
sa putragṛddhinaḥ pārthānsahasainyān avārayat
- 7
उग्रधन्वा महेष्वासो दिव्यम् अस्त्रम् उदीरयन्
वार्द्धक्षत्रिर् उपासेधत्प्रवणाद् इव कुञ्जरान्
ugradhanvā maheṣvāso divyam astram udīrayan
vārddhakṣatrir upāsedhatpravaṇād iva kuñjarān
- 8
धृतराष्ट्र उवाच
अतिभारम् अहं मन्ये सैन्धवे संजयाहितम्
यद् एकः पाण्डवान्क्रुद्धान्पुत्रगृद्धीन् अवारयत्
dhṛtarāṣṭra uvāca
atibhāram ahaṃ manye saindhave saṃjayāhitam
yad ekaḥ pāṇḍavānkruddhānputragṛddhīn avārayat
- 9
अत्यद्भुतम् इदं मन्ये बलं शौर्यं च सैन्धवे
तद् अस्य ब्रूहि मे वीर्यं कर्म चाग्र्यं महात्मनः
atyadbhutam idaṃ manye balaṃ śauryaṃ ca saindhave
tad asya brūhi me vīryaṃ karma cāgryaṃ mahātmanaḥ
- 10
किं दत्तं हुतम् इष्टं वा सुतप्तम् अथवा तपः
सिन्धुराजेन येनैकः क्रुद्धान्पार्थान् अवारयत्
kiṃ dattaṃ hutam iṣṭaṃ vā sutaptam athavā tapaḥ
sindhurājena yenaikaḥ kruddhānpārthān avārayat
- 11
संजय उवाच
द्रौपदीहरणे यत्तद्भीमसेनेन निर्जितः
मानात्स तप्तवान्राजा वरार्थी सुमहत्तपः
saṃjaya uvāca
draupadīharaṇe yattadbhīmasenena nirjitaḥ
mānātsa taptavānrājā varārthī sumahattapaḥ
- 12
इन्द्रियाणीन्द्रियार्थेभ्यः प्रियेभ्यः संनिवर्त्य सः
क्षुत्पिपासातपसहः कृशो धमनिसंततः
देवम् आराधयच्छर्वं गृणन्ब्रह्म सनातनम्
indriyāṇīndriyārthebhyaḥ priyebhyaḥ saṃnivartya saḥ
kṣutpipāsātapasahaḥ kṛśo dhamanisaṃtataḥ
devam ārādhayaccharvaṃ gṛṇanbrahma sanātanam
- 13
भक्तानुकम्पी भगवांस्तस्य चक्रे ततो दयाम्
स्वप्नान्ते ऽप्यथ चैवाह हरः सिन्धुपतेः सुतम्
वरं वृणीष्व प्रीतो ऽस्मि जयद्रथ किम् इच्छसि
bhaktānukampī bhagavāṃstasya cakre tato dayām
svapnānte 'pyatha caivāha haraḥ sindhupateḥ sutam
varaṃ vṛṇīṣva prīto 'smi jayadratha kim icchasi
- 14
एवम् उक्तस्तु शर्वेण सिन्धुराजो जयद्रथः
उवाच प्रणतो रुद्रं प्राञ्जलिर्नियतात्मवान्
evam uktastu śarveṇa sindhurājo jayadrathaḥ
uvāca praṇato rudraṃ prāñjalirniyatātmavān
- 15
पाण्डवेयान् अहं संख्ये भीमवीर्यपराक्रमान्
एको रणे धारयेयं समस्तान् इति भारत
pāṇḍaveyān ahaṃ saṃkhye bhīmavīryaparākramān
eko raṇe dhārayeyaṃ samastān iti bhārata
- 16
एवम् उक्तस्तु देवेशो जयद्रथम् अथाब्रवीत्
ददामि ते वरं सौम्य विना पार्थं धनंजयम्
evam uktastu deveśo jayadratham athābravīt
dadāmi te varaṃ saumya vinā pārthaṃ dhanaṃjayam
- 17
धारयिष्यसि संग्रामे चतुरः पाण्डुनन्दनान्
एवम् अस्त्विति देवेशम् उक्त्वाबुध्यत पार्थिवः
dhārayiṣyasi saṃgrāme caturaḥ pāṇḍunandanān
evam astviti deveśam uktvābudhyata pārthivaḥ
- 18
स तेन वरदानेन दिव्येनास्त्रबलेन च
एकः संधारयामास पाण्डवानाम् अनीकिनीम्
sa tena varadānena divyenāstrabalena ca
ekaḥ saṃdhārayāmāsa pāṇḍavānām anīkinīm
- 19
तस्य ज्यातलघोषेण क्षत्रियान्भयम् आविशत्
परांस्तु तव सैन्यस्य हर्षः परमको ऽभवत्
tasya jyātalaghoṣeṇa kṣatriyānbhayam āviśat
parāṃstu tava sainyasya harṣaḥ paramako 'bhavat
- 20
दृष्ट्वा तु क्षत्रिया भारं सैन्धवे सर्वम् अर्पितम्
उत्क्रुश्याभ्यद्रवन्राजन्येन यौधिष्ठिरं बलम्
dṛṣṭvā tu kṣatriyā bhāraṃ saindhave sarvam arpitam
utkruśyābhyadravanrājanyena yaudhiṣṭhiraṃ balam

