15 shlokas
- 1
संजय उवाच
तस्य लालप्यतः श्रुत्वा वृद्धः कुरुपितामहः
देशकालोचितं वाक्यम् अब्रवीत्प्रीतमानसः
saṃjaya uvāca
tasya lālapyataḥ śrutvā vṛddhaḥ kurupitāmahaḥ
deśakālocitaṃ vākyam abravītprītamānasaḥ
- 2
समुद्र इव सिन्धूनां ज्योतिषाम् इव भास्करः
सत्यस्य च यथा सन्तो बीजानाम् इव चोर्वरा
samudra iva sindhūnāṃ jyotiṣām iva bhāskaraḥ
satyasya ca yathā santo bījānām iva corvarā
- 3
पर्जन्य इव भूतानां प्रतिष्ठा सुहृदां भव
बान्धवास्त्वानुजीवन्तु सहस्राक्षम् इवामराः
parjanya iva bhūtānāṃ pratiṣṭhā suhṛdāṃ bhava
bāndhavāstvānujīvantu sahasrākṣam ivāmarāḥ
- 4
स्वबाहुबलवीर्येण धार्तराष्ट्रप्रियैषिणा
कर्ण राजपुरं गत्वा काम्बोजा निहतास्त्वया
svabāhubalavīryeṇa dhārtarāṣṭrapriyaiṣiṇā
karṇa rājapuraṃ gatvā kāmbojā nihatāstvayā
- 5
गिरिव्रजगताश्चापि नग्नजित्प्रमुखा नृपाः
अम्बष्ठाश्च विदेहाश्च गान्धाराश्च जितास्त्वया
girivrajagatāścāpi nagnajitpramukhā nṛpāḥ
ambaṣṭhāśca videhāśca gāndhārāśca jitāstvayā
- 6
हिमवद्दुर्गनिलयाः किराता रणकर्कशाः
दुर्योधनस्य वशगाः कृताः कर्ण त्वया पुरा
himavaddurganilayāḥ kirātā raṇakarkaśāḥ
duryodhanasya vaśagāḥ kṛtāḥ karṇa tvayā purā
- 7
तत्र तत्र च संग्रामे दुर्योधनहितैषिणा
बहवश्च जिता वीरास्त्वया कर्ण महौजसा
tatra tatra ca saṃgrāme duryodhanahitaiṣiṇā
bahavaśca jitā vīrāstvayā karṇa mahaujasā
- 8
यथा दुर्योधनस्तात सज्ञातिकुलबान्धवः
तथा त्वम् अपि सर्वेषां कौरवाणां गतिर्भव
yathā duryodhanastāta sajñātikulabāndhavaḥ
tathā tvam api sarveṣāṃ kauravāṇāṃ gatirbhava
- 9
शिवेनाभिवदामि त्वां गच्छ युध्यस्व शत्रुभिः
अनुशाधि कुरून्संख्ये धत्स्व दुर्योधने जयम्
śivenābhivadāmi tvāṃ gaccha yudhyasva śatrubhiḥ
anuśādhi kurūnsaṃkhye dhatsva duryodhane jayam
- 10
भवान्पौत्रसमो ऽस्माकं यथा दुर्योधनस्तथा
तवापि धर्मतः सर्वे यथा तस्य वयं तथा
bhavānpautrasamo 'smākaṃ yathā duryodhanastathā
tavāpi dharmataḥ sarve yathā tasya vayaṃ tathā
- 11
यौनात्संबन्धकाल्लोके विशिष्टं संगतं सताम्
सद्भिः सह नरश्रेष्ठ प्रवदन्ति मनीषिणः
yaunātsaṃbandhakālloke viśiṣṭaṃ saṃgataṃ satām
sadbhiḥ saha naraśreṣṭha pravadanti manīṣiṇaḥ
- 12
स सत्यसंगरो भूत्वा ममेदम् इति निश्चितम्
कुरूणां पालय बलं यथा दुर्योधनस्तथा
sa satyasaṃgaro bhūtvā mamedam iti niścitam
kurūṇāṃ pālaya balaṃ yathā duryodhanastathā
- 13
इति श्रुत्वा वचः सो ऽथ चरणावभिवाद्य च
ययौ वैकर्तनः कर्णस्तूर्णम् आयोधनं प्रति
iti śrutvā vacaḥ so 'tha caraṇāvabhivādya ca
yayau vaikartanaḥ karṇastūrṇam āyodhanaṃ prati
- 14
सो ऽभिवीक्ष्य नरौघाणां स्थानम् अप्रतिमं महत्
व्यूढप्रहरणोरस्कं सैन्यं तत्समबृंहयत्
so 'bhivīkṣya naraughāṇāṃ sthānam apratimaṃ mahat
vyūḍhapraharaṇoraskaṃ sainyaṃ tatsamabṛṃhayat
- 15
कर्णं दृष्ट्वा महेष्वासं युद्धाय समवस्थितम्
क्ष्वेडितास्फोटितरवैः सिंहनादरवैर् अपि
धनुःशब्दैश्च विविधैः कुरवः समपूजयन्
karṇaṃ dṛṣṭvā maheṣvāsaṃ yuddhāya samavasthitam
kṣveḍitāsphoṭitaravaiḥ siṃhanādaravair api
dhanuḥśabdaiśca vividhaiḥ kuravaḥ samapūjayan

