21 shlokas
- 1
युधिष्ठिर उवाच
सुखेन रजनी व्युष्टा कच्चित्ते मधुसूदन
कच्चिज्ज्ञानानि सर्वाणि प्रसन्नानि तवाच्युत
yudhiṣṭhira uvāca
sukhena rajanī vyuṣṭā kaccitte madhusūdana
kaccijjñānāni sarvāṇi prasannāni tavācyuta
- 2
संजय उवाच
वासुदेवो ऽपि तद्युक्तं पर्यपृच्छद्युधिष्ठिरम्
ततः क्षत्ता प्रकृतयो न्यवेदयद् उपस्थिताः
saṃjaya uvāca
vāsudevo 'pi tadyuktaṃ paryapṛcchadyudhiṣṭhiram
tataḥ kṣattā prakṛtayo nyavedayad upasthitāḥ
- 3
अनुज्ञातश्च राज्ञा स प्रावेशयत तं जनम्
विराटं भीमसेनं च धृष्टद्युम्नं च सात्यकिम्
anujñātaśca rājñā sa prāveśayata taṃ janam
virāṭaṃ bhīmasenaṃ ca dhṛṣṭadyumnaṃ ca sātyakim
- 4
शिखण्डिनं यमौ चैव चेकितानं च केकयान्
युयुत्सुं चैव कौरव्यं पाञ्चाल्यं चोत्तमौजसम्
śikhaṇḍinaṃ yamau caiva cekitānaṃ ca kekayān
yuyutsuṃ caiva kauravyaṃ pāñcālyaṃ cottamaujasam
- 5
एते चान्ये च बहवः क्षत्रियाः क्षत्रियर्षभम्
उपतस्थुर्महात्मानं विविशुश्चासनेषु ते
ete cānye ca bahavaḥ kṣatriyāḥ kṣatriyarṣabham
upatasthurmahātmānaṃ viviśuścāsaneṣu te
- 6
एकस्मिन्न् आसने वीरावुपविष्टौ महाबलौ
कृष्णश्च युयुधानश्च महात्मानौ महाद्युती
ekasminn āsane vīrāvupaviṣṭau mahābalau
kṛṣṇaśca yuyudhānaśca mahātmānau mahādyutī
- 7
ततो युधिष्ठिरस्तेषां शृण्वतां मधुसूदनम्
अब्रवीत्पुण्डरीकाक्षम् आभाष्य मधुरं वचः
tato yudhiṣṭhirasteṣāṃ śṛṇvatāṃ madhusūdanam
abravītpuṇḍarīkākṣam ābhāṣya madhuraṃ vacaḥ
- 8
एकं त्वां वयम् आश्रित्य सहस्राक्षम् इवामराः
प्रार्थयामो जयं युद्धे शाश्वतानि सुखानि च
ekaṃ tvāṃ vayam āśritya sahasrākṣam ivāmarāḥ
prārthayāmo jayaṃ yuddhe śāśvatāni sukhāni ca
- 9
त्वं हि राज्यविनाशं च द्विषद्भिश्च निराक्रियाम्
क्लेशांश्च विविधान्कृष्ण सर्वांस्तान् अपि वेत्थ नः
tvaṃ hi rājyavināśaṃ ca dviṣadbhiśca nirākriyām
kleśāṃśca vividhānkṛṣṇa sarvāṃstān api vettha naḥ
- 10
त्वयि सर्वेश सर्वेषाम् अस्माकं भक्तवत्सल
सुखम् आयत्तम् अत्यर्थं यात्रा च मधुसूदन
tvayi sarveśa sarveṣām asmākaṃ bhaktavatsala
sukham āyattam atyarthaṃ yātrā ca madhusūdana
- 11
स तथा कुरु वार्ष्णेय यथा त्वयि मनो मम
अर्जुनस्य यथा सत्या प्रतिज्ञा स्याच्चिकीर्षिता
sa tathā kuru vārṣṇeya yathā tvayi mano mama
arjunasya yathā satyā pratijñā syāccikīrṣitā
- 12
स भवांस्तारयत्वस्माद्दुःखामर्षमहार्णवात्
पारं तितीर्षताम् अद्य प्लवो नो भव माधव
sa bhavāṃstārayatvasmādduḥkhāmarṣamahārṇavāt
pāraṃ titīrṣatām adya plavo no bhava mādhava
- 13
न हि तत्कुरुते संख्ये कार्तवीर्यसमस्त्वपि
रथी यत्कुरुते कृष्ण सारथिर्यत्नम् आस्थितः
na hi tatkurute saṃkhye kārtavīryasamastvapi
rathī yatkurute kṛṣṇa sārathiryatnam āsthitaḥ
- 14
वासुदेव उवाच
सामरेष्वपि लोकेषु सर्वेषु न तथाविधः
शरासनधरः कश्चिद्यथा पार्थो धनंजयः
vāsudeva uvāca
sāmareṣvapi lokeṣu sarveṣu na tathāvidhaḥ
śarāsanadharaḥ kaścidyathā pārtho dhanaṃjayaḥ
- 15
वीर्यवान् अस्त्रसम्पन्नः पराक्रान्तो महाबलः
युद्धशौण्डः सदामर्षी तेजसा परमो नृणाम्
vīryavān astrasampannaḥ parākrānto mahābalaḥ
yuddhaśauṇḍaḥ sadāmarṣī tejasā paramo nṛṇām
- 16
स युवा वृषभस्कन्धो दीर्घबाहुर्महाबलः
सिंहर्षभगतिः श्रीमान्द्विषतस्ते हनिष्यति
sa yuvā vṛṣabhaskandho dīrghabāhurmahābalaḥ
siṃharṣabhagatiḥ śrīmāndviṣataste haniṣyati
- 17
अहं च तत्करिष्यामि यथा कुन्तीसुतो ऽर्जुनः
धार्तराष्ट्रस्य सैन्यानि धक्ष्यत्यग्निर् इवोत्थितः
ahaṃ ca tatkariṣyāmi yathā kuntīsuto 'rjunaḥ
dhārtarāṣṭrasya sainyāni dhakṣyatyagnir ivotthitaḥ
- 18
अद्य तं पापकर्माणं क्षुद्रं सौभद्रघातिनम्
अपुनर्दर्शनं मार्गम् इषुभिः क्षेप्स्यते ऽर्जुनः
adya taṃ pāpakarmāṇaṃ kṣudraṃ saubhadraghātinam
apunardarśanaṃ mārgam iṣubhiḥ kṣepsyate 'rjunaḥ
- 19
तस्याद्य गृध्राः श्येनाश्च वडगोमायवस्तथा
भक्षयिष्यन्ति मांसानि ये चान्ये पुरुषादकाः
tasyādya gṛdhrāḥ śyenāśca vaḍagomāyavastathā
bhakṣayiṣyanti māṃsāni ye cānye puruṣādakāḥ
- 20
यद्यस्य देवा गोप्तारः सेन्द्राः सर्वे तथाप्यसौ
राजधानीं यमस्याद्य हतः प्राप्स्यति संकुले
yadyasya devā goptāraḥ sendrāḥ sarve tathāpyasau
rājadhānīṃ yamasyādya hataḥ prāpsyati saṃkule
- 21
निहत्य सैन्धवं जिष्णुर् अद्य त्वाम् उपयास्यति
विशोको विज्वरो राजन्भव भूतिपुरस्कृतः
nihatya saindhavaṃ jiṣṇur adya tvām upayāsyati
viśoko vijvaro rājanbhava bhūtipuraskṛtaḥ

