19 shlokas
- 1
संजय उवाच
ततो युधिष्ठिरश्चैव भीमसेनश्च पाण्डवः
द्रोणपुत्रं महाराज समन्तात्पर्यवारयन्
saṃjaya uvāca
tato yudhiṣṭhiraścaiva bhīmasenaśca pāṇḍavaḥ
droṇaputraṃ mahārāja samantātparyavārayan
- 2
ततो दुर्योधनो राजा भारद्वाजेन संवृतः
अभ्ययात्पाण्डवान्संख्ये ततो युद्धम् अवर्तत
घोररूपं महाराज भीरूणां भयवर्धनम्
tato duryodhano rājā bhāradvājena saṃvṛtaḥ
abhyayātpāṇḍavānsaṃkhye tato yuddham avartata
ghorarūpaṃ mahārāja bhīrūṇāṃ bhayavardhanam
- 3
अम्बष्ठान्मालवान्वङ्गाञ्शिबींस्त्रैगर्तकान् अपि
प्राहिणोन्मृत्युलोकाय गणान्क्रुद्धो युधिष्ठिरः
ambaṣṭhānmālavānvaṅgāñśibīṃstraigartakān api
prāhiṇonmṛtyulokāya gaṇānkruddho yudhiṣṭhiraḥ
- 4
अभीषाहाञ्शूरसेनान्क्षत्रियान्युद्धदुर्मदान्
निकृत्य पृथिवीं चक्रे भीमः शोणितकर्दमाम्
abhīṣāhāñśūrasenānkṣatriyānyuddhadurmadān
nikṛtya pṛthivīṃ cakre bhīmaḥ śoṇitakardamām
- 5
यौधेयारट्टराजन्यान्मद्रकांश्च गणान्युधि
प्राहिणोन्मृत्युलोकाय किरीटी निशितैः शरैः
yaudheyāraṭṭarājanyānmadrakāṃśca gaṇānyudhi
prāhiṇonmṛtyulokāya kirīṭī niśitaiḥ śaraiḥ
- 6
प्रगाढम् अञ्जोगतिभिर्नाराचैर् अभिपीडिताः
निपेतुर्द्विरदा भूमौ द्विशृङ्गा इव पर्वताः
pragāḍham añjogatibhirnārācair abhipīḍitāḥ
nipeturdviradā bhūmau dviśṛṅgā iva parvatāḥ
- 7
निकृत्तैर्हस्तिहस्तैश्च लुठमानैस्ततस्ततः
रराज वसुधा कीर्णा विसर्पद्भिर् इवोरगैः
nikṛttairhastihastaiśca luṭhamānaistatastataḥ
rarāja vasudhā kīrṇā visarpadbhir ivoragaiḥ
- 8
क्षिप्तैः कनकचित्रैश्च नृपछत्रैः क्षितिर्बभौ
द्यौर् इवादित्यचन्द्राद्यैर्ग्रहैः कीर्णा युगक्षये
kṣiptaiḥ kanakacitraiśca nṛpachatraiḥ kṣitirbabhau
dyaur ivādityacandrādyairgrahaiḥ kīrṇā yugakṣaye
- 9
हत प्रहरताभीता विध्यत व्यवकृन्तत
इत्यासीत्तुमुलः शब्दः शोणाश्वस्य रथं प्रति
hata praharatābhītā vidhyata vyavakṛntata
ityāsīttumulaḥ śabdaḥ śoṇāśvasya rathaṃ prati
- 10
द्रोणस्तु परमक्रुद्धो वायव्यास्त्रेण संयुगे
व्यधमत्तान्यथा वायुर्मेघान् इव दुरत्ययः
droṇastu paramakruddho vāyavyāstreṇa saṃyuge
vyadhamattānyathā vāyurmeghān iva duratyayaḥ
- 11
ते हन्यमाना द्रोणेन पाञ्चालाः प्राद्रवन्भयात्
पश्यतो भीमसेनस्य पार्थस्य च महात्मनः
te hanyamānā droṇena pāñcālāḥ prādravanbhayāt
paśyato bhīmasenasya pārthasya ca mahātmanaḥ
- 12
ततः किरीटी भीमश्च सहसा संन्यवर्तताम्
महता रथवंशेन परिगृह्य बलं तव
tataḥ kirīṭī bhīmaśca sahasā saṃnyavartatām
mahatā rathavaṃśena parigṛhya balaṃ tava
- 13
बीभत्सुर्दक्षिणं पार्श्वम् उत्तरं तु वृकोदरः
भारद्वाजं शरौघाभ्यां महद्भ्याम् अभ्यवर्षताम्
bībhatsurdakṣiṇaṃ pārśvam uttaraṃ tu vṛkodaraḥ
bhāradvājaṃ śaraughābhyāṃ mahadbhyām abhyavarṣatām
- 14
तौ तदा सृञ्जयाश्चैव पाञ्चालाश्च महारथाः
अन्वगच्छन्महाराज मत्स्याश्च सह सोमकैः
tau tadā sṛñjayāścaiva pāñcālāśca mahārathāḥ
anvagacchanmahārāja matsyāśca saha somakaiḥ
- 15
तथैव तव पुत्रस्य रथोदाराः प्रहारिणः
महत्या सेनया सार्धं जग्मुर्द्रोणरथं प्रति
tathaiva tava putrasya rathodārāḥ prahāriṇaḥ
mahatyā senayā sārdhaṃ jagmurdroṇarathaṃ prati
- 16
ततः सा भरती सेना वध्यमाना किरीटिना
तमसा निद्रया चैव पुनर् एव व्यदीर्यत
tataḥ sā bharatī senā vadhyamānā kirīṭinā
tamasā nidrayā caiva punar eva vyadīryata
- 17
द्रोणेन वार्यमाणास्ते स्वयं तव सुतेन च
न शक्यन्ते महाराज योधा वारयितुं तदा
droṇena vāryamāṇāste svayaṃ tava sutena ca
na śakyante mahārāja yodhā vārayituṃ tadā
- 18
सा पाण्डुपुत्रस्य शरैर्दार्यमाणा महाचमूः
तमसा संवृते लोके व्यद्रवत्सर्वतोमुखी
sā pāṇḍuputrasya śarairdāryamāṇā mahācamūḥ
tamasā saṃvṛte loke vyadravatsarvatomukhī
- 19
उत्सृज्य शतशो वाहांस्तत्र केचिन्नराधिपाः
प्राद्रवन्त महाराज भयाविष्टाः समन्ततः
utsṛjya śataśo vāhāṃstatra kecinnarādhipāḥ
prādravanta mahārāja bhayāviṣṭāḥ samantataḥ

