94 shlokas
- 1
संजय उवाच
ततः कर्णो महाराज भीमं विद्ध्वा त्रिभिः शरैः
मुमोच शरवर्षाणि चित्राणि च बहूनि च
saṃjaya uvāca
tataḥ karṇo mahārāja bhīmaṃ viddhvā tribhiḥ śaraiḥ
mumoca śaravarṣāṇi citrāṇi ca bahūni ca
- 2
वध्यमानो महाराज सूतपुत्रेण पाण्डवः
न विव्यथे भीमसेनो भिद्यमान इवाचलः
vadhyamāno mahārāja sūtaputreṇa pāṇḍavaḥ
na vivyathe bhīmaseno bhidyamāna ivācalaḥ
- 3
स कर्णं कर्णिना कर्णे पीतेन निशितेन च
विव्याध युधि राजेन्द्र भीमसेनः पतत्रिणा
sa karṇaṃ karṇinā karṇe pītena niśitena ca
vivyādha yudhi rājendra bhīmasenaḥ patatriṇā
- 4
स कुण्डलं महत्कर्णात्कर्णस्यापातयद्भुवि
तपनीयं महाराज दीप्तं ज्योतिर् इवाम्बरात्
sa kuṇḍalaṃ mahatkarṇātkarṇasyāpātayadbhuvi
tapanīyaṃ mahārāja dīptaṃ jyotir ivāmbarāt
- 5
अथापरेण भल्लेन सूतपुत्रं स्तनान्तरे
आजघान भृशं भीमः स्मयन्न् इव महाबलः
athāpareṇa bhallena sūtaputraṃ stanāntare
ājaghāna bhṛśaṃ bhīmaḥ smayann iva mahābalaḥ
- 6
पुनर् अस्य त्वरन्भीमो नाराचान्दश भारत
रणे प्रैषीन्महावेगान्यमदण्डोपमांस्तथा
punar asya tvaranbhīmo nārācāndaśa bhārata
raṇe praiṣīnmahāvegānyamadaṇḍopamāṃstathā
- 7
ते ललाटं समासाद्य सूतपुत्रस्य मारिष
विविशुश्चोदितास्तेन वल्मीकम् इव पन्नगाः
te lalāṭaṃ samāsādya sūtaputrasya māriṣa
viviśuścoditāstena valmīkam iva pannagāḥ
- 8
ललाटस्थैस्तु तैर्बाणैः सूतपुत्रो व्यरोचत
नीलोत्पलमयीं मालां धारयन्स पुरा यथा
lalāṭasthaistu tairbāṇaiḥ sūtaputro vyarocata
nīlotpalamayīṃ mālāṃ dhārayansa purā yathā
- 9
ततः क्रुद्धो रणे कर्णः पीडितो दृढधन्वना
वेगं चक्रे महावेगो भीमसेनवधं प्रति
tataḥ kruddho raṇe karṇaḥ pīḍito dṛḍhadhanvanā
vegaṃ cakre mahāvego bhīmasenavadhaṃ prati
- 10
तस्मै कर्णः शतं राजन्न् इषूणां गार्ध्रवाससाम्
अमर्षी बलवान्क्रुद्धः प्रेषयामास भारत
tasmai karṇaḥ śataṃ rājann iṣūṇāṃ gārdhravāsasām
amarṣī balavānkruddhaḥ preṣayāmāsa bhārata
- 11
ततः प्रासृजद् उग्राणि शरवर्षाणि पाण्डवः
समरे तम् अनादृत्य नास्य वीर्यम् अचिन्तयत्
tataḥ prāsṛjad ugrāṇi śaravarṣāṇi pāṇḍavaḥ
samare tam anādṛtya nāsya vīryam acintayat
- 12
ततः कर्णो महाराज पाण्डवं निशितैः शरैः
आजघानोरसि क्रुद्धः क्रुद्धरूपं परंतपः
tataḥ karṇo mahārāja pāṇḍavaṃ niśitaiḥ śaraiḥ
ājaghānorasi kruddhaḥ kruddharūpaṃ paraṃtapaḥ
- 13
जीमूताविव चान्योन्यं तौ ववर्षतुर् आहवे
तलशब्दरवैश्चैव त्रासयन्तौ परस्परम्
jīmūtāviva cānyonyaṃ tau vavarṣatur āhave
talaśabdaravaiścaiva trāsayantau parasparam
- 14
शरजालैश्च विविधैश्छादयामासतुर्मृधे
अन्योन्यं समरे क्रुद्धौ कृतप्रतिकृतैषिणौ
śarajālaiśca vividhaiśchādayāmāsaturmṛdhe
anyonyaṃ samare kruddhau kṛtapratikṛtaiṣiṇau
- 15
ततो भीमो महाबाहू राधेयस्य महात्मनः
क्षुरप्रेण धनुश्छित्त्वा कर्णं विव्याध पत्रिणा
tato bhīmo mahābāhū rādheyasya mahātmanaḥ
kṣurapreṇa dhanuśchittvā karṇaṃ vivyādha patriṇā
- 16
तद् अपास्य धनुश्छिन्नं सूतपुत्रो महामनाः
अन्यत्कार्मुकम् आदत्त वेगघ्नं भारसाधनम्
tad apāsya dhanuśchinnaṃ sūtaputro mahāmanāḥ
anyatkārmukam ādatta vegaghnaṃ bhārasādhanam
- 17
दृष्ट्वा च कुरुसौवीरसैन्धवानां बलक्षयम्
सवर्मध्वजशस्त्रैश्च पतितैः संवृतां महीम्
dṛṣṭvā ca kurusauvīrasaindhavānāṃ balakṣayam
savarmadhvajaśastraiśca patitaiḥ saṃvṛtāṃ mahīm
- 18
हस्त्यश्वनरदेहांश्च गतासून्प्रेक्ष्य सर्वतः
सूतपुत्रस्य संरम्भाद्दीप्तं वपुर् अजायत
hastyaśvanaradehāṃśca gatāsūnprekṣya sarvataḥ
sūtaputrasya saṃrambhāddīptaṃ vapur ajāyata
- 19
स विस्फार्य महच्चापं कार्तस्वरविभूषितम्
भीमं प्रैक्षत राधेयो राजन्घोरेण चक्षुषा
sa visphārya mahaccāpaṃ kārtasvaravibhūṣitam
bhīmaṃ praikṣata rādheyo rājanghoreṇa cakṣuṣā
- 20
ततः क्रुद्धः शरान् अस्यन्सूतपुत्रो व्यरोचत
मध्यंदिनगतो ऽर्चिष्माञ्शरदीव दिवाकरः
tataḥ kruddhaḥ śarān asyansūtaputro vyarocata
madhyaṃdinagato 'rciṣmāñśaradīva divākaraḥ
- 21
मरीचिविकचस्येव राजन्भानुमतो वपुः
आसीद् आधिरथेर्घोरं वपुः शरशतार्चिषः
marīcivikacasyeva rājanbhānumato vapuḥ
āsīd ādhiratherghoraṃ vapuḥ śaraśatārciṣaḥ
- 22
कराभ्याम् आददानस्य संदधानस्य चाशुगान्
विकर्षतो मुञ्चतो वा नान्तरं ददृशू रणे
karābhyām ādadānasya saṃdadhānasya cāśugān
vikarṣato muñcato vā nāntaraṃ dadṛśū raṇe
- 23
अग्निचक्रोपमं घोरं मण्डलीकृतम् आयुधम्
कर्णस्यासीन्महाराज सव्यदक्षिणम् अस्यतः
agnicakropamaṃ ghoraṃ maṇḍalīkṛtam āyudham
karṇasyāsīnmahārāja savyadakṣiṇam asyataḥ
- 24
स्वर्णपुङ्खाः सुनिशिताः कर्णचापच्युताः शराः
प्राच्छादयन्महाराज दिशः सूर्यस्य च प्रभाम्
svarṇapuṅkhāḥ suniśitāḥ karṇacāpacyutāḥ śarāḥ
prācchādayanmahārāja diśaḥ sūryasya ca prabhām
- 25
ततः कनकपुङ्खानां शराणां नतपर्वणाम्
धनुश्च्युतानां वियति ददृशे बहुधा व्रजः
tataḥ kanakapuṅkhānāṃ śarāṇāṃ nataparvaṇām
dhanuścyutānāṃ viyati dadṛśe bahudhā vrajaḥ
- 26
शरासनाद् आधिरथेः प्रभवन्तः स्म सायकाः
श्रेणीकृता व्यराजन्त राजन्क्रौञ्चा इवाम्बरे
śarāsanād ādhiratheḥ prabhavantaḥ sma sāyakāḥ
śreṇīkṛtā vyarājanta rājankrauñcā ivāmbare
- 27
गार्ध्रपत्राञ्शिलाधौतान्कार्तस्वरविभूषितान्
महावेगान्प्रदीप्ताग्रान्मुमोचाधिरथिः शरान्
gārdhrapatrāñśilādhautānkārtasvaravibhūṣitān
mahāvegānpradīptāgrānmumocādhirathiḥ śarān
- 28
ते तु चापबलोद्धूताः शातकुम्भविभूषिताः
अजस्रम् अन्वकीर्यन्त शराः पार्थरथं प्रति
te tu cāpabaloddhūtāḥ śātakumbhavibhūṣitāḥ
ajasram anvakīryanta śarāḥ pārtharathaṃ prati
- 29
ते व्योम्नि रत्नविकृता व्यकाशन्त सहस्रशः
शलभानाम् इव व्राताः शराः कर्णसमीरिताः
te vyomni ratnavikṛtā vyakāśanta sahasraśaḥ
śalabhānām iva vrātāḥ śarāḥ karṇasamīritāḥ
- 30
चापाद् आधिरथेर्मुक्ताः प्रपतन्तः स्म सायकाः
एको दीर्घ इव प्रांशुः प्रभवन्दृश्यते शरः
cāpād ādhirathermuktāḥ prapatantaḥ sma sāyakāḥ
eko dīrgha iva prāṃśuḥ prabhavandṛśyate śaraḥ

