35 shlokas
- 1
ईश्वर उवाच
अथातः सम्प्रवक्ष्यामि शर्कराशैलमुत्तमम्
यस्य प्रदानाद्विष्ण्वर्करुद्रास्तुष्यन्ति सर्वदा
īśvara uvāca
athātaḥ sampravakṣyāmi śarkarāśailamuttamam
yasya pradānādviṣṇvarkarudrāstuṣyanti sarvadā
- 2
अष्टाभिः शर्कराभारैरुत्तमः स्यान्महाचलः
चतुर्भिर्मध्यमः प्रोक्तो भाराभ्यामधमः स्मृतः
aṣṭābhiḥ śarkarābhārairuttamaḥ syānmahācalaḥ
caturbhirmadhyamaḥ prokto bhārābhyāmadhamaḥ smṛtaḥ
- 3
भारेण वार्धभारेण कुर्याद्यः स्वल्पवित्तवान्
विष्कम्भपर्वतान्कुर्यात्तुरीयांशेन मानवः
bhāreṇa vārdhabhāreṇa kuryādyaḥ svalpavittavān
viṣkambhaparvatānkuryātturīyāṃśena mānavaḥ
- 4
धान्यपर्वतवत्सर्वमासाद्यामरसंयुतम्
मेरोरुपरि तद्वच्च स्थाप्यं हेमतरुत्रयम्
dhānyaparvatavatsarvamāsādyāmarasaṃyutam
merorupari tadvacca sthāpyaṃ hematarutrayam
- 5
मन्दारः पारिजातश्च तृतीयः कल्पपादपः
एतद्वृक्षत्रयं मूर्ध्नि सर्वेष्वपि नियोजयेत्
mandāraḥ pārijātaśca tṛtīyaḥ kalpapādapaḥ
etadvṛkṣatrayaṃ mūrdhni sarveṣvapi niyojayet
- 6
हरिचन्दनसंतानौ पूर्वपश्चिमभागयोः
निवेश्यौ सर्वशैलेषु विशेषाच्छर्कराचले
haricandanasaṃtānau pūrvapaścimabhāgayoḥ
niveśyau sarvaśaileṣu viśeṣāccharkarācale
- 7
मन्दरे कामदेवस्तु प्रत्यग्वक्त्रः सदा भवेत्
गन्धमादनशृङ्गे तु धनदः स्यादुदङ्मुखः
mandare kāmadevastu pratyagvaktraḥ sadā bhavet
gandhamādanaśṛṅge tu dhanadaḥ syādudaṅmukhaḥ
- 8
प्राङ्मुखो वेदमूर्तिस्तु हंसः स्याद्विपुलाचले
हैमी सुपार्श्वे सुरभिर्दक्षिणाभिमुखी भवेत्
prāṅmukho vedamūrtistu haṃsaḥ syādvipulācale
haimī supārśve surabhirdakṣiṇābhimukhī bhavet
- 9
धान्यपर्वतवत्सर्वमावाहनविधानकम्
कृत्वा तु गुरवे दद्यान्मध्यमं पर्वतोत्तमम्
ऋत्विग्भ्यश्चतुरः शैलानिमान्मन्त्रानुदीरयन्
dhānyaparvatavatsarvamāvāhanavidhānakam
kṛtvā tu gurave dadyānmadhyamaṃ parvatottamam
ṛtvigbhyaścaturaḥ śailānimānmantrānudīrayan
- 10
सौभाग्यामृतसारोऽयं पर्वतः शर्करायुतः
तस्मादानन्दकारी त्वं भव शैलेन्द्र सर्वदा
saubhāgyāmṛtasāro'yaṃ parvataḥ śarkarāyutaḥ
tasmādānandakārī tvaṃ bhava śailendra sarvadā
- 11
अमृतं पिबतां ये तु निपेतुर्भुवि शीकराः
देवानां तत्समुत्थस्त्वं पाहि नः शर्कराचल
amṛtaṃ pibatāṃ ye tu nipeturbhuvi śīkarāḥ
devānāṃ tatsamutthastvaṃ pāhi naḥ śarkarācala
- 12
मनोभवधनुर्मध्यादुद्भूता शर्करा यतः
तन्मयोऽसि महाशैल पाहि संसारसागरात्
manobhavadhanurmadhyādudbhūtā śarkarā yataḥ
tanmayo'si mahāśaila pāhi saṃsārasāgarāt
- 13
यो दद्याच्छर्कराशैलमनेन विधिना नरः
सर्वपापैर्विनिर्मुक्तः स याति परमं पदम्
yo dadyāccharkarāśailamanena vidhinā naraḥ
sarvapāpairvinirmuktaḥ sa yāti paramaṃ padam
- 14
चन्द्रतारार्कसंकाशमधिरुह्यानुजीविभिः
सहैव यानमातिष्ठेत्तत्र विष्णुप्रचोदितः
candratārārkasaṃkāśamadhiruhyānujīvibhiḥ
sahaiva yānamātiṣṭhettatra viṣṇupracoditaḥ
- 15
ततः कल्पशतान्ते तु सप्तद्वीपाधिपो भवेत्
आयुरारोग्यसम्पन्नो यावज्जन्मार्बुदत्रयम्
tataḥ kalpaśatānte tu saptadvīpādhipo bhavet
āyurārogyasampanno yāvajjanmārbudatrayam
- 16
भोजनं शक्तितः कुर्यात्सर्वशैलेष्व् अमत्सरः
सर्वत्राक्षारलवणम् अश्नीयात्तदनुज्ञया
पर्वतोपस्करान्सर्वान्प्रापयेद्ब्राह्मणालयम्
bhojanaṃ śaktitaḥ kuryātsarvaśaileṣv amatsaraḥ
sarvatrākṣāralavaṇam aśnīyāttadanujñayā
parvatopaskarānsarvānprāpayedbrāhmaṇālayam
- 17
ईश्वर उवाच
आसीत्पुरा बृहत्कल्पे धर्ममूर्तिर्जनाधिपः
सुहृच्छक्रस्य निहता येन दैत्याः सहस्रशः
īśvara uvāca
āsītpurā bṛhatkalpe dharmamūrtirjanādhipaḥ
suhṛcchakrasya nihatā yena daityāḥ sahasraśaḥ
- 18
सोमसूर्यादयो यस्य तेजसा विगतप्रभाः
भवन्ति शतशो येन शत्रवश्चापराजिताः
यथेच्छारूपधारी च मनुष्योऽप्यपराजितः
somasūryādayo yasya tejasā vigataprabhāḥ
bhavanti śataśo yena śatravaścāparājitāḥ
yathecchārūpadhārī ca manuṣyo'pyaparājitaḥ
- 19
तस्य भानुमती नाम भार्या त्रैलोक्यसुन्दरी
लक्ष्मीवद्दिव्यरूपेण निर्जितामरसुन्दरी
tasya bhānumatī nāma bhāryā trailokyasundarī
lakṣmīvaddivyarūpeṇa nirjitāmarasundarī
- 20
राज्ञस्तस्याग्र्यमहिषी प्राणेभ्योऽपि गरीयसी
दशनारीसहस्राणां मध्ये श्रीरिव राजते
rājñastasyāgryamahiṣī prāṇebhyo'pi garīyasī
daśanārīsahasrāṇāṃ madhye śrīriva rājate
- 21
नृपकोटिसहस्रेण न कदाचित्स मुच्यते
कदाचिदास्थानगतः पप्रच्छ स पुरोधसम्
विस्मयेनावृतो राजा वसिष्ठमृषिसत्तमम्
nṛpakoṭisahasreṇa na kadācitsa mucyate
kadācidāsthānagataḥ papraccha sa purodhasam
vismayenāvṛto rājā vasiṣṭhamṛṣisattamam
- 22
राजोवाच
भगवन्केन धर्मेण मम लक्ष्मीरनुत्तमा
कस्माच्च विपुलं तेजो मच्छरीरे सदोत्तमम्
rājovāca
bhagavankena dharmeṇa mama lakṣmīranuttamā
kasmācca vipulaṃ tejo maccharīre sadottamam
- 23
वसिष्ठ उवाच
पुरा लीलावती नाम वेश्या शिवपरायणा
तया दत्तश्चतुर्दश्यां गुरवे लवणाचलः
हेमवृक्षादिभिः सार्धं यथावद्विधिपूर्वकम्
vasiṣṭha uvāca
purā līlāvatī nāma veśyā śivaparāyaṇā
tayā dattaścaturdaśyāṃ gurave lavaṇācalaḥ
hemavṛkṣādibhiḥ sārdhaṃ yathāvadvidhipūrvakam
- 24
शूद्रः सुवर्णकारश्च नाम्ना शौण्डोऽभवत्तदा
भृत्यो लीलावतीगेहे तेन हेम्ना विनिर्मिताः
śūdraḥ suvarṇakāraśca nāmnā śauṇḍo'bhavattadā
bhṛtyo līlāvatīgehe tena hemnā vinirmitāḥ
- 25
तरवः सुरमुख्याश्च श्रद्धायुक्तेन पार्थिव
अतिरूपेण सम्पन्ना घटयित्वा विना भृतिम्
धर्मकार्यमिति ज्ञात्वा न गृह्णाति कथंचन
taravaḥ suramukhyāśca śraddhāyuktena pārthiva
atirūpeṇa sampannā ghaṭayitvā vinā bhṛtim
dharmakāryamiti jñātvā na gṛhṇāti kathaṃcana
- 26
उज्ज्वालिताश्च तत्पत्न्या सौवर्णामरपादपाः
लीलावती गिरेः पार्श्वे परिचर्यां च पार्थिव
ujjvālitāśca tatpatnyā sauvarṇāmarapādapāḥ
līlāvatī gireḥ pārśve paricaryāṃ ca pārthiva
- 27
कृत्वा ताभ्याम् अशाठ्येन गुरुशुश्रूषणादिकम्
सा च लीलावती वेश्याकालेन महतापि च
kṛtvā tābhyām aśāṭhyena guruśuśrūṣaṇādikam
sā ca līlāvatī veśyākālena mahatāpi ca
- 28
कालधर्ममनुप्राप्ता कर्मयोगेण नारद
सर्वपापविनिर्मुक्ता जगाम शिवमन्दिरम्
kāladharmamanuprāptā karmayogeṇa nārada
sarvapāpavinirmuktā jagāma śivamandiram
- 29
योऽसौ सुवर्णकारस्तु दरिद्रोऽप्यतिसत्त्ववान्
न मौल्यमादाद्वेश्यातः स भवानिह साम्प्रतम्
yo'sau suvarṇakārastu daridro'pyatisattvavān
na maulyamādādveśyātaḥ sa bhavāniha sāmpratam
- 30
सप्तद्वीपपतिर्जातः सूर्यायुतसमप्रभः
यया सुवर्णकारस्य तरवो हेमनिर्मिताः
सम्यगुज्ज्वालिताः पत्न्या सेयं भानुमती तव
saptadvīpapatirjātaḥ sūryāyutasamaprabhaḥ
yayā suvarṇakārasya taravo hemanirmitāḥ
samyagujjvālitāḥ patnyā seyaṃ bhānumatī tava

