9 shlokas
- 1
ईश्वर उवाच
अतः परं प्रवक्ष्यामि गुडपर्वतमुत्तमम्
यत्प्रदानान्नरः स्वर्गमाप्नोति सुरपूजितम्
īśvara uvāca
ataḥ paraṃ pravakṣyāmi guḍaparvatamuttamam
yatpradānānnaraḥ svargamāpnoti surapūjitam
- 2
उत्तमो दशभिर्भारैर्मध्यमः पञ्चभिर्मतः
त्रिभिर्भारैः कनिष्ठः स्यात्तदर्धेनाल्पवित्तवान्
uttamo daśabhirbhārairmadhyamaḥ pañcabhirmataḥ
tribhirbhāraiḥ kaniṣṭhaḥ syāttadardhenālpavittavān
- 3
तद्वदामन्त्रणं पूजां हेमवृक्षसुरार्चनम्
विष्कम्भपर्वतांस्तद्वत्सरांसि वनदेवताः
tadvadāmantraṇaṃ pūjāṃ hemavṛkṣasurārcanam
viṣkambhaparvatāṃstadvatsarāṃsi vanadevatāḥ
- 4
होमजागरणं तद्वल्लोकपालाधिवासनम्
धान्यपर्वतवत्कुर्यादिमं मन्त्रमुदीरयेत्
homajāgaraṇaṃ tadvallokapālādhivāsanam
dhānyaparvatavatkuryādimaṃ mantramudīrayet
- 5
यथा देवेषु विश्वात्मा प्रवरोऽयं जनार्दनः
सामवेदस्तु वेदानां महादेवस्तु योगिनाम्
yathā deveṣu viśvātmā pravaro'yaṃ janārdanaḥ
sāmavedastu vedānāṃ mahādevastu yoginām
- 6
प्रणवः सर्वमन्त्राणां नारीणां पार्वती यथा
तथा रसानां प्रवरः सदैवेक्षुरसो मतः
praṇavaḥ sarvamantrāṇāṃ nārīṇāṃ pārvatī yathā
tathā rasānāṃ pravaraḥ sadaivekṣuraso mataḥ
- 7
मम तस्मात्परां लक्ष्मीं गुडपर्वत देहि वै
यस्मात्सौभाग्यदायिन्या भ्राता त्वं गुडपर्वत
निवासश्चापि पार्वत्यास्तस्माच्छान्तिं प्रयच्छ मे
mama tasmātparāṃ lakṣmīṃ guḍaparvata dehi vai
yasmātsaubhāgyadāyinyā bhrātā tvaṃ guḍaparvata
nivāsaścāpi pārvatyāstasmācchāntiṃ prayaccha me
- 8
अनेन विधिना यस्तु दद्याद्गुडमयं गिरिम्
पूज्यमानः स गन्धर्वैर्गौरीलोके महीयते
anena vidhinā yastu dadyādguḍamayaṃ girim
pūjyamānaḥ sa gandharvairgaurīloke mahīyate
- 9
ततः कल्पशतान्ते तु सप्तद्वीपाधिपो भवेत्
आयुरारोग्यसम्पन्नः शत्रुभिश्चापराजितः
tataḥ kalpaśatānte tu saptadvīpādhipo bhavet
āyurārogyasampannaḥ śatrubhiścāparājitaḥ

