17 shlokas
- 1
शौनक उवाच
एवं स नाहुषो राजा ययातिः पुत्रमीप्सितम्
राज्येऽभिषिच्य मुदितो वानप्रस्थो ऽभवन्मुनिः
śaunaka uvāca
evaṃ sa nāhuṣo rājā yayātiḥ putramīpsitam
rājye'bhiṣicya mudito vānaprastho 'bhavanmuniḥ
- 2
उषित्वा वनवासं स ब्राह्मणैः सह संश्रितः
फलमूलाशनो दान्तो यथा स्वर्गमितो गतः
uṣitvā vanavāsaṃ sa brāhmaṇaiḥ saha saṃśritaḥ
phalamūlāśano dānto yathā svargamito gataḥ
- 3
स गतः स्वर्गवासं तु न्यवसन्मुदितः सुखी
कालस्य नातिमहतः पुनः शक्रेण पातितः
sa gataḥ svargavāsaṃ tu nyavasanmuditaḥ sukhī
kālasya nātimahataḥ punaḥ śakreṇa pātitaḥ
- 4
विवशः प्रच्युतः स्वर्गाद् अप्राप्तो मेदिनीतलम्
स्थितश्चासीद् अन्तरिक्षे स तदेति श्रुतं मया
vivaśaḥ pracyutaḥ svargād aprāpto medinītalam
sthitaścāsīd antarikṣe sa tadeti śrutaṃ mayā
- 5
तत एव पुनश्चापि गतः स्वर्गमिति श्रुतिः
राज्ञा वसुमता सार्धमष्टकेन च वीर्यवान्
प्रतर्दनेन शिबिना समेत्य किल संसदि
tata eva punaścāpi gataḥ svargamiti śrutiḥ
rājñā vasumatā sārdhamaṣṭakena ca vīryavān
pratardanena śibinā sametya kila saṃsadi
- 6
शतानीक उवाच
कर्मणा केन स दिवं पुनः प्राप्तो महीपतिः
कथमिन्द्रेण भगवन्पातितो मेदिनीतले
śatānīka uvāca
karmaṇā kena sa divaṃ punaḥ prāpto mahīpatiḥ
kathamindreṇa bhagavanpātito medinītale
- 7
सर्वमेतद् अशेषेण श्रोतुमिच्छामि तत्त्वतः
कथ्यमानं त्वया विप्र देवर्षिगणसंनिधौ
sarvametad aśeṣeṇa śrotumicchāmi tattvataḥ
kathyamānaṃ tvayā vipra devarṣigaṇasaṃnidhau
- 8
देवराजसमो ह्य् आसीद्ययातिः पृथिवीपतिः
वर्धनः कुरुवंशस्य विभावसुसमद्युतिः
devarājasamo hy āsīdyayātiḥ pṛthivīpatiḥ
vardhanaḥ kuruvaṃśasya vibhāvasusamadyutiḥ
- 9
तस्य विस्तीर्णयशसः सत्यकीर्तेर्महात्मनः
श्रोतुमिच्छामि देवेश दिवि चेह च सर्वशः
tasya vistīrṇayaśasaḥ satyakīrtermahātmanaḥ
śrotumicchāmi deveśa divi ceha ca sarvaśaḥ
- 10
शौनक उवाच
हन्त ते कथयिष्यामि ययातेरुत्तमां कथाम्
दिवि चेह च पुण्यार्थां सर्वपापप्रणाशिनीम्
śaunaka uvāca
hanta te kathayiṣyāmi yayāteruttamāṃ kathām
divi ceha ca puṇyārthāṃ sarvapāpapraṇāśinīm
- 11
ययातिर्नाहुषो राजा पूरुं पुत्रं कनीयसम्
राज्येऽभिषिच्य मुदितः प्रवव्राज वनं तदा
yayātirnāhuṣo rājā pūruṃ putraṃ kanīyasam
rājye'bhiṣicya muditaḥ pravavrāja vanaṃ tadā
- 12
अन्तेषु स विनिक्षिप्य पुत्रान्यदुपुरोगमान्
फलमूलाशनो राजा वनेऽसौ न्यवसच्चिरम्
anteṣu sa vinikṣipya putrānyadupurogamān
phalamūlāśano rājā vane'sau nyavasacciram
- 13
स जितात्मा जितक्रोधस्तर्पयन्पितृदेवताः
अग्नींश्च विधिवज्जुह्वन्वानप्रस्थविधानतः
sa jitātmā jitakrodhastarpayanpitṛdevatāḥ
agnīṃśca vidhivajjuhvanvānaprasthavidhānataḥ
- 14
अतिथीन्पूजयन्नित्यं वन्येन हविषा विभुः
शिलोञ्छवृत्तिमास्थाय शेषान्नकृतभोजनः
atithīnpūjayannityaṃ vanyena haviṣā vibhuḥ
śiloñchavṛttimāsthāya śeṣānnakṛtabhojanaḥ
- 15
पूर्णं सहस्रं वर्षाणामेवंवृत्तिर् अभून्नृपः
अम्बुभक्षः स चाब्दांस्त्रीनासीन्नियतवाङ्मनाः
pūrṇaṃ sahasraṃ varṣāṇāmevaṃvṛttir abhūnnṛpaḥ
ambubhakṣaḥ sa cābdāṃstrīnāsīnniyatavāṅmanāḥ
- 16
ततस्तु वायुभक्षोऽभूत्संवत्सरमतन्द्रितः
पञ्चाग्निमध्ये च तपस्तेपे संवत्सरं पुनः
tatastu vāyubhakṣo'bhūtsaṃvatsaramatandritaḥ
pañcāgnimadhye ca tapastepe saṃvatsaraṃ punaḥ
- 17
एकपादस्थितश्चासीत्षण्मासान् अनिलाशनः
पुण्यकीर्तिस्ततः स्वर्गं जगामावृत्य रोदसी
ekapādasthitaścāsītṣaṇmāsān anilāśanaḥ
puṇyakīrtistataḥ svargaṃ jagāmāvṛtya rodasī

