29 shlokas
- 1
ईश्वर उवाच
अथान्यामपि वक्ष्यामि तृतीयां पापनाशिनीम्
रसकल्याणिनीमेतां पुराकल्पविदो विदुः
īśvara uvāca
athānyāmapi vakṣyāmi tṛtīyāṃ pāpanāśinīm
rasakalyāṇinīmetāṃ purākalpavido viduḥ
- 2
माघमासे तु सम्प्राप्ते तृतीयां शुक्लपक्षतः
प्रातर्गव्येन पयसा तिलैः स्नानं समाचरेत्
māghamāse tu samprāpte tṛtīyāṃ śuklapakṣataḥ
prātargavyena payasā tilaiḥ snānaṃ samācaret
- 3
स्नापयेन्मधुना देवीं तथैवेक्षुरसेन च
गन्धोदकेन तु पुनर्लेपयेत्कुङ्कुमेन तु
दक्षिणाङ्गानि सम्पूज्य ततो वामानि पूजयेत्
snāpayenmadhunā devīṃ tathaivekṣurasena ca
gandhodakena tu punarlepayetkuṅkumena tu
dakṣiṇāṅgāni sampūjya tato vāmāni pūjayet
- 4
ललितायै नमो देव्याः पादौ गुल्फौ ततो ऽर्चयेत्
जङ्घां जानुं तथा शान्त्यै तथैवोरुं श्रियै नमः
lalitāyai namo devyāḥ pādau gulphau tato 'rcayet
jaṅghāṃ jānuṃ tathā śāntyai tathaivoruṃ śriyai namaḥ
- 5
मदालसायै तु कटिममलायै तथोदरम्
स्तनौ मदनवासिन्यै कुमुदायै च कन्दराम्
madālasāyai tu kaṭimamalāyai tathodaram
stanau madanavāsinyai kumudāyai ca kandarām
- 6
भुजं भुजाग्रं माधव्यै कमलायै मुखस्मिते
भूललाटं च रुद्राण्यै शंकरायै तथालकान्
bhujaṃ bhujāgraṃ mādhavyai kamalāyai mukhasmite
bhūlalāṭaṃ ca rudrāṇyai śaṃkarāyai tathālakān
- 7
मुकुटं विश्ववासिन्यै शिरः कान्त्यै तथार्चयेत्
मदनायै ललाटं तु मोहनायै पुनर्भ्रुवौ
mukuṭaṃ viśvavāsinyai śiraḥ kāntyai tathārcayet
madanāyai lalāṭaṃ tu mohanāyai punarbhruvau
- 8
नेत्रे चन्द्रार्धधारिण्यै तुष्ट्यै च वदनं पुनः
उत्कण्ठिन्यै नमः कण्ठममृतायै नमः स्तनौ
netre candrārdhadhāriṇyai tuṣṭyai ca vadanaṃ punaḥ
utkaṇṭhinyai namaḥ kaṇṭhamamṛtāyai namaḥ stanau
- 9
रम्भायै वामकुक्षिं च विशोकायै नमः कटिम्
हृदयं मन्मथाधिष्ण्यै पाटलायै तथोदरम्
rambhāyai vāmakukṣiṃ ca viśokāyai namaḥ kaṭim
hṛdayaṃ manmathādhiṣṇyai pāṭalāyai tathodaram
- 10
कटिं सुरतवासिन्यै तथोरुं चम्पकप्रिये
जानुजङ्घे नमो गौर्यै गायत्र्यै घुटिके नमः
kaṭiṃ suratavāsinyai tathoruṃ campakapriye
jānujaṅghe namo gauryai gāyatryai ghuṭike namaḥ
- 11
धराधरायै पादौ तु विश्वकायै नमः शिरः
नमो भवान्यै कामिन्यै कामदेव्यै जगत्प्रिये
dharādharāyai pādau tu viśvakāyai namaḥ śiraḥ
namo bhavānyai kāminyai kāmadevyai jagatpriye
- 12
आनन्दायै सुनन्दायै सुभद्रायै नमो नमः
एवं सम्पूज्य विधिवद्द्विजदाम्पत्यम् अर्चयेत्
भोजयित्वान्नपानेन मधुरेण विमत्सरः
ānandāyai sunandāyai subhadrāyai namo namaḥ
evaṃ sampūjya vidhivaddvijadāmpatyam arcayet
bhojayitvānnapānena madhureṇa vimatsaraḥ
- 13
जलपूरितं तथा कुम्भं शुक्लाम्बरयुगद्वयम्
दत्त्वा सुवर्णकमलं गन्धमाल्यैः समर्चयेत्
jalapūritaṃ tathā kumbhaṃ śuklāmbarayugadvayam
dattvā suvarṇakamalaṃ gandhamālyaiḥ samarcayet
- 14
प्रीयतामत्र कुमुदा गृह्णीयाल्लवणव्रतम्
अनेन विधिना देवी मासि मासि सदार्चयेत्
prīyatāmatra kumudā gṛhṇīyāllavaṇavratam
anena vidhinā devī māsi māsi sadārcayet
- 15
लवणं वर्जयेन्माघे फाल्गुने च गुडं पुनः
तैलं राजिं तथा चैत्रे वर्ज्यं च मधु माधवे
lavaṇaṃ varjayenmāghe phālgune ca guḍaṃ punaḥ
tailaṃ rājiṃ tathā caitre varjyaṃ ca madhu mādhave
- 16
पानकं ज्येष्ठमासे तु आषाढे चाथ जीरकम्
श्रावणे वर्जयेत्क्षीरं दधि भाद्रपदे तथा
pānakaṃ jyeṣṭhamāse tu āṣāḍhe cātha jīrakam
śrāvaṇe varjayetkṣīraṃ dadhi bhādrapade tathā
- 17
घृतमाश्वयुजे तद्वदूर्जे वर्ज्यं च माक्षिकम्
धान्यकं मार्गशीर्षे तु पौषे वर्ज्या च शर्करा
ghṛtamāśvayuje tadvadūrje varjyaṃ ca mākṣikam
dhānyakaṃ mārgaśīrṣe tu pauṣe varjyā ca śarkarā
- 18
व्रतान्ते करकं पूर्णमेतेषां मासि मासि च
दद्याद्द्विकालवेलायां पूर्णपात्रेण संयुतम्
vratānte karakaṃ pūrṇameteṣāṃ māsi māsi ca
dadyāddvikālavelāyāṃ pūrṇapātreṇa saṃyutam
- 19
लड्डुकाञ्छ्वेतवर्णांश्च संयावमथ पूरिकाः
घारिकान् अप्यपूपांश्च पिष्टापूपांश्च मण्डकान्
laḍḍukāñchvetavarṇāṃśca saṃyāvamatha pūrikāḥ
ghārikān apyapūpāṃśca piṣṭāpūpāṃśca maṇḍakān
- 20
क्षीरं शाकं च दध्यन्नमिण्डर्यो ऽशोकवर्तिकाः
माघादिक्रमशो दद्यादेतानि करकोपरि
kṣīraṃ śākaṃ ca dadhyannamiṇḍaryo 'śokavartikāḥ
māghādikramaśo dadyādetāni karakopari
- 21
कुमुदा माधवी गौरी रम्भा भद्रा जया शिवा
उमा रतिः सती तद्वन्मङ्गला रतिलालसा
kumudā mādhavī gaurī rambhā bhadrā jayā śivā
umā ratiḥ satī tadvanmaṅgalā ratilālasā
- 22
क्रमान्माघादि सर्वत्र प्रीयतामिति कीर्तयेत्
सर्वत्र पञ्चगव्येन प्राशनं समुदाहृतम्
उपवासी भवेन्नित्यमशक्ते नक्तमिष्यते
kramānmāghādi sarvatra prīyatāmiti kīrtayet
sarvatra pañcagavyena prāśanaṃ samudāhṛtam
upavāsī bhavennityamaśakte naktamiṣyate
- 23
पुनर्माघे तु सम्प्राप्ते शर्करां करकोपरि
कृत्वा तु काञ्चनीं गौरीं पञ्चरत्नसमन्विताम्
punarmāghe tu samprāpte śarkarāṃ karakopari
kṛtvā tu kāñcanīṃ gaurīṃ pañcaratnasamanvitām
- 24
हैमीमङ्गुष्ठमात्रां च साक्षसूत्रकमण्डलुम्
चतुर्भुजामिन्दुयुतां सितनेत्रपटावृताम्
haimīmaṅguṣṭhamātrāṃ ca sākṣasūtrakamaṇḍalum
caturbhujāminduyutāṃ sitanetrapaṭāvṛtām
- 25
तद्वद्गोमिथुनं शुक्लं सुवर्णास्यं सिताम्बरम्
सवस्त्रभाजनं दद्याद्भवानी प्रीयतामिति
tadvadgomithunaṃ śuklaṃ suvarṇāsyaṃ sitāmbaram
savastrabhājanaṃ dadyādbhavānī prīyatāmiti
- 26
अनेन विधिना यस्तु रसकल्याणिनीव्रतम्
कुर्यात्स सर्वपापेभ्यस्तत्क्षणादेव मुच्यते
anena vidhinā yastu rasakalyāṇinīvratam
kuryātsa sarvapāpebhyastatkṣaṇādeva mucyate
- 27
नवार्बुदसहस्रं तु न दुःखी जायते नरः
सुवर्णकमलं गौरि मासि मासि ददन्नरः
अग्निष्टोमसहस्रस्य यत्फलं तदवाप्नुयात्
navārbudasahasraṃ tu na duḥkhī jāyate naraḥ
suvarṇakamalaṃ gauri māsi māsi dadannaraḥ
agniṣṭomasahasrasya yatphalaṃ tadavāpnuyāt
- 28
नारी वा कुरुते या तु कुमारी वा वरानने
विधवा या तथा नारी सापि तत्फलमाप्नुयात्
सौभाग्यारोग्यसम्पन्ना गौरीलोके महीयते
nārī vā kurute yā tu kumārī vā varānane
vidhavā yā tathā nārī sāpi tatphalamāpnuyāt
saubhāgyārogyasampannā gaurīloke mahīyate
- 29
इति पठति शृणोति श्रावयेद्यः प्रसङ्गात्कलिकलुषविमुक्तः पार्वतीलोकमेति
मतिमपि च नराणां यो ददाति प्रियार्थं विबुधपतिविमाने नायकः स्यादमोघः
iti paṭhati śṛṇoti śrāvayedyaḥ prasaṅgātkalikaluṣavimuktaḥ pārvatīlokameti
matimapi ca narāṇāṃ yo dadāti priyārthaṃ vibudhapativimāne nāyakaḥ syādamoghaḥ

