16 shlokas
- 1
सूत उवाच
सुरासुराणां सम्मर्दस्तस्मिन्नत्यन्तदारुणे
तुमुलोऽतिमहानासीत्सेनयोरुभयोरपि
sūta uvāca
surāsurāṇāṃ sammardastasminnatyantadāruṇe
tumulo'timahānāsītsenayorubhayorapi
- 2
गर्जतां देवदैत्यानां शङ्खभेरीरवेण च
तूर्याणां चैव निर्घोषैर्मातंगानां च बृंहितैः
garjatāṃ devadaityānāṃ śaṅkhabherīraveṇa ca
tūryāṇāṃ caiva nirghoṣairmātaṃgānāṃ ca bṛṃhitaiḥ
- 3
ह्वेषतां हयवृन्दानां रथनेमिस्वनेन च
ज्याघोषेण च शूराणां तुमुलोऽतिमहानभूत्
hveṣatāṃ hayavṛndānāṃ rathanemisvanena ca
jyāghoṣeṇa ca śūrāṇāṃ tumulo'timahānabhūt
- 4
समासाद्योभये सेने परस्परजयैषिणाम्
रोषेणातिपरीतानां त्यक्तजीवितचेतसाम्
samāsādyobhaye sene parasparajayaiṣiṇām
roṣeṇātiparītānāṃ tyaktajīvitacetasām
- 5
समासाद्य तु तेऽन्योन्यं प्रक्रमेण विलोमतः
रथेनासक्तपादातो रथेन च तुरंगमः
samāsādya tu te'nyonyaṃ prakrameṇa vilomataḥ
rathenāsaktapādāto rathena ca turaṃgamaḥ
- 6
हस्ती पदातिसंयुक्तो रथिना च क्वचिद्रथी
मातंगेनापरो हस्ती तुरंगैर्बहुभिर्गजः
hastī padātisaṃyukto rathinā ca kvacidrathī
mātaṃgenāparo hastī turaṃgairbahubhirgajaḥ
- 7
पदातिरेको बहुभिर्गजैर्मत्तैश्च युज्यते
ततः प्रासाशनिगदाभिन्दिपालपरश्वधैः
padātireko bahubhirgajairmattaiśca yujyate
tataḥ prāsāśanigadābhindipālaparaśvadhaiḥ
- 8
शक्तिभिः पट्टिशैः शूलैर्मुद्गरैः कुणपैर्गडैः
चक्रैश्च शङ्कुभिश्चैव तोमरैरङ्कुशैः सितैः
śaktibhiḥ paṭṭiśaiḥ śūlairmudgaraiḥ kuṇapairgaḍaiḥ
cakraiśca śaṅkubhiścaiva tomarairaṅkuśaiḥ sitaiḥ
- 9
भल्लैश्च शतपत्त्रैश्च शुकतुण्डैश्च निर्मलैः
bhallaiśca śatapattraiśca śukatuṇḍaiśca nirmalaiḥ
- 10
वृष्टिरत्यद्भुताकारा गगने समदृश्यत
संप्रच्छाद्य दिशः सर्वास्तमोमयमिवाकरोत्
vṛṣṭiratyadbhutākārā gagane samadṛśyata
saṃpracchādya diśaḥ sarvāstamomayamivākarot
- 11
न प्राज्ञायत तेऽन्योन्यं तस्मिंस्तमसि संकुले
अलक्ष्यं विसृजन्तस्ते हेतिसंघातमुद्धतम्
na prājñāyata te'nyonyaṃ tasmiṃstamasi saṃkule
alakṣyaṃ visṛjantaste hetisaṃghātamuddhatam
- 12
पतितं सेनयोर्मध्ये निरीक्षन्ते परस्परम्
ततो ध्वजैर्भुजैश्छत्त्रैः शिरोभिश्च सकुण्डलैः
patitaṃ senayormadhye nirīkṣante parasparam
tato dhvajairbhujaiśchattraiḥ śirobhiśca sakuṇḍalaiḥ
- 13
गजैस्तुरंगैः पादातैः पतद्भिः पतितैरपि
आकाशसरसो भ्रष्टैः पङ्कजैरिव भूः स्तृता
gajaisturaṃgaiḥ pādātaiḥ patadbhiḥ patitairapi
ākāśasaraso bhraṣṭaiḥ paṅkajairiva bhūḥ stṛtā
- 14
भग्नदन्ता भिन्नकुम्भाश्छिन्नदीर्घमहाकराः
गजाः शलनिभाः पेतुर्धरण्यां रुधिरस्रवाः
bhagnadantā bhinnakumbhāśchinnadīrghamahākarāḥ
gajāḥ śalanibhāḥ peturdharaṇyāṃ rudhirasravāḥ
- 15
भग्नेषादण्डचक्राक्षा रथाश्च शकलीकृताः
पेतुः शकलतां यातास्तुरंगाश्च सहस्रशः
bhagneṣādaṇḍacakrākṣā rathāśca śakalīkṛtāḥ
petuḥ śakalatāṃ yātāsturaṃgāśca sahasraśaḥ
- 16
ततो ऽसृघ्रददुस्तारा पृथिवी समजायत
नद्यश्च रुधिरावर्ता हर्षदाः पिशिताशिनाम्
वेतालाक्रीडमभवत्तत्संकुलरणाजिरम्
tato 'sṛghradadustārā pṛthivī samajāyata
nadyaśca rudhirāvartā harṣadāḥ piśitāśinām
vetālākrīḍamabhavattatsaṃkularaṇājiram

