13 shlokas
- 1
ईश्वर उवाच
विशोकसप्तमीं तद्वद्वक्ष्यामि मुनिपुंगव
यामुपोष्य नरः शोकं न कदाचिदिहाश्नुते
īśvara uvāca
viśokasaptamīṃ tadvadvakṣyāmi munipuṃgava
yāmupoṣya naraḥ śokaṃ na kadācidihāśnute
- 2
माघे कृष्णतिलैः स्नात्वा षष्ठ्यां वै शुक्लपक्षतः
कृताहारः कृसरया दन्तधावनपूर्वकम्
उपवासव्रतं कृत्वा ब्रह्मचारी भवेन्निशि
māghe kṛṣṇatilaiḥ snātvā ṣaṣṭhyāṃ vai śuklapakṣataḥ
kṛtāhāraḥ kṛsarayā dantadhāvanapūrvakam
upavāsavrataṃ kṛtvā brahmacārī bhavenniśi
- 3
ततः प्रभात उत्थाय कृतस्नानजपः शुचिः
कृत्वा तु काञ्चनं पद्ममर्कायेति च पूजयेत्
करवीरेण रक्तेन रक्तवस्त्रयुगेन च
tataḥ prabhāta utthāya kṛtasnānajapaḥ śuciḥ
kṛtvā tu kāñcanaṃ padmamarkāyeti ca pūjayet
karavīreṇa raktena raktavastrayugena ca
- 4
यथा विशोकं भुवनं त्वयैवादित्य सर्वदा
तथा विशोकता मेऽस्तु त्वद्भक्तिः प्रतिजन्म च
yathā viśokaṃ bhuvanaṃ tvayaivāditya sarvadā
tathā viśokatā me'stu tvadbhaktiḥ pratijanma ca
- 5
एवं सम्पूज्य षष्ठ्यां तु भक्त्या सम्पूजयेद्द्विजान्
सुप्त्वा संप्राश्य गोमूत्रमुत्थाय कृतनैत्यकः
evaṃ sampūjya ṣaṣṭhyāṃ tu bhaktyā sampūjayeddvijān
suptvā saṃprāśya gomūtramutthāya kṛtanaityakaḥ
- 6
सम्पूज्य विप्रानन्नेन गुडपात्रसमन्वितम्
तद्वस्त्रयुग्मं पद्मं च ब्राह्मणाय निवेदयेत्
sampūjya viprānannena guḍapātrasamanvitam
tadvastrayugmaṃ padmaṃ ca brāhmaṇāya nivedayet
- 7
अतैललवणं भुक्त्वा सप्तम्यां मौनसंयुतः
ततः पुराणश्रवणं कर्तव्यं भूतिमिच्छता
atailalavaṇaṃ bhuktvā saptamyāṃ maunasaṃyutaḥ
tataḥ purāṇaśravaṇaṃ kartavyaṃ bhūtimicchatā
- 8
अनेन विधिना सर्वमुभयोरपि पक्षयोः
कृत्वा यावत्पुनर्माघशुक्लपक्षस्य सप्तमी
anena vidhinā sarvamubhayorapi pakṣayoḥ
kṛtvā yāvatpunarmāghaśuklapakṣasya saptamī
- 9
व्रतान्ते कलशं दद्यात्सुवर्णकमलान्वितम्
शय्यां सोपस्करां दद्यात्कपिलां च पयस्विनीम्
vratānte kalaśaṃ dadyātsuvarṇakamalānvitam
śayyāṃ sopaskarāṃ dadyātkapilāṃ ca payasvinīm
- 10
अनेन विधिना यस्तु वित्तशाठ्यविवर्जितः
विशोकसप्तमीं कुर्यात्स याति परमां गतिम्
anena vidhinā yastu vittaśāṭhyavivarjitaḥ
viśokasaptamīṃ kuryātsa yāti paramāṃ gatim
- 11
यावज्जन्मसहस्राणां साग्रं कोटिशतं भवेत्
तावन्न शोकमभ्येति रोगदौर्गत्यवर्जितः
yāvajjanmasahasrāṇāṃ sāgraṃ koṭiśataṃ bhavet
tāvanna śokamabhyeti rogadaurgatyavarjitaḥ
- 12
यं यं प्रार्थयते कामं तं तमाप्नोति पुष्कलम्
निष्कामः कुरुते यस्तु स परं ब्रह्म गच्छति
yaṃ yaṃ prārthayate kāmaṃ taṃ tamāpnoti puṣkalam
niṣkāmaḥ kurute yastu sa paraṃ brahma gacchati
- 13
यः पठेच्छृणुयाद्वापि विशोकाख्यां च सप्तमीम्
सोऽपीन्द्रलोकमाप्नोति न दुःखी जायते क्वचित्
yaḥ paṭhecchṛṇuyādvāpi viśokākhyāṃ ca saptamīm
so'pīndralokamāpnoti na duḥkhī jāyate kvacit

