108 shlokas
- 1
सूत उवाच
तुर्वसोस्तु सुतो गर्भो गोभानुस्तस्य चात्मजः
गोभानोस्तु सुतो वीरस्त्रिसारिरपराजितः
sūta uvāca
turvasostu suto garbho gobhānustasya cātmajaḥ
gobhānostu suto vīrastrisāriraparājitaḥ
- 2
करंधमस्तु त्रैसारिर्भरतस्तस्य चात्मजः
दुष्यन्तः पौरवस्यापि तस्य पुत्रो ह्य् अकल्मषः
karaṃdhamastu traisārirbharatastasya cātmajaḥ
duṣyantaḥ pauravasyāpi tasya putro hy akalmaṣaḥ
- 3
एवं ययातिशापेन जरासंक्रमणे पुरा
तुर्वसोः पौरवं वंशं प्रविवेश पुरा किल
evaṃ yayātiśāpena jarāsaṃkramaṇe purā
turvasoḥ pauravaṃ vaṃśaṃ praviveśa purā kila
- 4
दुष्यन्तस्य तु दायादो वरूथो नाम पार्थिवः
वरूथात्तु तथाण्डीरः संधानस्तस्य चात्मजः
duṣyantasya tu dāyādo varūtho nāma pārthivaḥ
varūthāttu tathāṇḍīraḥ saṃdhānastasya cātmajaḥ
- 5
पाण्ड्यश्च केरलश्चैव चोलः कर्णस्तथैव च
तेषां जनपदाः स्फीताः पाण्ड्याश्चोलाः सकेरलाः
pāṇḍyaśca keralaścaiva colaḥ karṇastathaiva ca
teṣāṃ janapadāḥ sphītāḥ pāṇḍyāścolāḥ sakeralāḥ
- 6
द्रुह्योस्तु तनयौ शूरौ सेतुः केतुस्तथैव च
सेतुपुत्रः शरद्वांस्तु गन्धारस्तस्य चात्मजः
druhyostu tanayau śūrau setuḥ ketustathaiva ca
setuputraḥ śaradvāṃstu gandhārastasya cātmajaḥ
- 7
ख्यायते यस्य नाम्नासौ गन्धारविषयो महान्
आरट्टदेशजास्तस्य तुरगा वाजिनां वराः
khyāyate yasya nāmnāsau gandhāraviṣayo mahān
āraṭṭadeśajāstasya turagā vājināṃ varāḥ
- 8
गन्धारपुत्रो धर्मस्तु घृतस्तस्यात्मजो ऽभवत्
घृताच्च विदुषो जज्ञे प्रचेतास्तस्य चात्मजः
gandhāraputro dharmastu ghṛtastasyātmajo 'bhavat
ghṛtācca viduṣo jajñe pracetāstasya cātmajaḥ
- 9
प्रचेतसः पुत्रशतं राजानः सर्व एव ते
म्लेच्छराष्ट्राधिपाः सर्वे उदीचीं दिशम् आश्रिताः
pracetasaḥ putraśataṃ rājānaḥ sarva eva te
mleccharāṣṭrādhipāḥ sarve udīcīṃ diśam āśritāḥ
- 10
अनोश्चैव सुता वीरास्त्रयः परमधार्मिकाः
सभानरश्चाक्षुषश्च परमेषुस्तथैव च
anoścaiva sutā vīrāstrayaḥ paramadhārmikāḥ
sabhānaraścākṣuṣaśca parameṣustathaiva ca
- 11
सभानरस्य पुत्रस्तु विद्वान्कोलाहलो नृपः
कोलाहलस्य धर्मात्मा संजयो नाम विश्रुतः
sabhānarasya putrastu vidvānkolāhalo nṛpaḥ
kolāhalasya dharmātmā saṃjayo nāma viśrutaḥ
- 12
संजयस्याभवत्पुत्रो वीरो नाम पुरंजयः
जनमेजयो महाराज पुरंजयसुतो ऽभवत्
saṃjayasyābhavatputro vīro nāma puraṃjayaḥ
janamejayo mahārāja puraṃjayasuto 'bhavat
- 13
जनमेजयस्य राजर्षेर्महाशालो ऽभवत्सुतः
आसीद् इन्द्रसमो राजा प्रतिष्ठितयशाभवत्
janamejayasya rājarṣermahāśālo 'bhavatsutaḥ
āsīd indrasamo rājā pratiṣṭhitayaśābhavat
- 14
महामनाः सुतस्तस्य महाशालस्य धार्मिकः
सप्तद्वीपेश्वरो जज्ञे चक्रवर्ती महामनाः
mahāmanāḥ sutastasya mahāśālasya dhārmikaḥ
saptadvīpeśvaro jajñe cakravartī mahāmanāḥ
- 15
महामनास्तु द्वौ पुत्रौ जनयामास विश्रुतौ
उशीनरं च धर्मज्ञं तितिक्षुं चैव ताव् उभौ
mahāmanāstu dvau putrau janayāmāsa viśrutau
uśīnaraṃ ca dharmajñaṃ titikṣuṃ caiva tāv ubhau
- 16
उशीनरस्य पत्न्यस्तु पञ्च राजर्षिसम्भवाः
भृशा कृशा नवा दर्शा या च देवी दृषद्वती
uśīnarasya patnyastu pañca rājarṣisambhavāḥ
bhṛśā kṛśā navā darśā yā ca devī dṛṣadvatī
- 17
उशीनरस्य पुत्रास्तु तासु जाताः कुलोद्वहाः
तपसा ते तु महता जाता वृद्धस्य धार्मिकाः
uśīnarasya putrāstu tāsu jātāḥ kulodvahāḥ
tapasā te tu mahatā jātā vṛddhasya dhārmikāḥ
- 18
भृशायास्तु नृगः पुत्रो नवाया नव एव च
कृशायास्तु कृशो जज्ञे दर्शायाः सुव्रतोऽभवत्
दृषद्वत्याः सुतश्चापि शिबिर् औशीनरो नृपः
bhṛśāyāstu nṛgaḥ putro navāyā nava eva ca
kṛśāyāstu kṛśo jajñe darśāyāḥ suvrato'bhavat
dṛṣadvatyāḥ sutaścāpi śibir auśīnaro nṛpaḥ
- 19
शिबेस्तु शिबयः पुत्राश्चत्वारो लोकविश्रुताः
पृथुदर्भः सुवीरश्च केकयो भद्रकस्तथा
śibestu śibayaḥ putrāścatvāro lokaviśrutāḥ
pṛthudarbhaḥ suvīraśca kekayo bhadrakastathā
- 20
तेषां जनपदाः स्फीताः केकया भद्रकास्तथा
सौवीराश्चैव पौराश्च नृगस्य केकयास्तथा
teṣāṃ janapadāḥ sphītāḥ kekayā bhadrakāstathā
sauvīrāścaiva paurāśca nṛgasya kekayāstathā
- 21
सुव्रतस्य तथाम्बष्ठा कृशस्य वृषला पुरी
नवस्य नवराष्ट्रं तु तितिक्षोस्तु प्रजां शृणु
suvratasya tathāmbaṣṭhā kṛśasya vṛṣalā purī
navasya navarāṣṭraṃ tu titikṣostu prajāṃ śṛṇu
- 22
तितिक्षुरभवद्राजा पूर्वस्यां दिशि विश्रुतः
बृहद्रथः सुतस्तस्य तस्य सेनोऽभवत्सुतः
titikṣurabhavadrājā pūrvasyāṃ diśi viśrutaḥ
bṛhadrathaḥ sutastasya tasya seno'bhavatsutaḥ
- 23
सेनस्य सुतपा जज्ञे सुतपस्तनयो बलिः
जातो मानुषयोन्यां तु क्षीणे वंशे प्रजेच्छया
senasya sutapā jajñe sutapastanayo baliḥ
jāto mānuṣayonyāṃ tu kṣīṇe vaṃśe prajecchayā
- 24
महायोगी तु स बलिर्बद्धो बन्धैर्महात्मना
पुत्रानुत्पादयामास क्षेत्रजान्पञ्च पार्थिवान्
mahāyogī tu sa balirbaddho bandhairmahātmanā
putrānutpādayāmāsa kṣetrajānpañca pārthivān
- 25
अङ्गं स जनयामास वङ्गं सुह्मं तथैव च
पुण्ड्रं कलिङ्गं च तथा बालेयं क्षेत्रमुच्यते
बालेया ब्राह्मणाश्चैव तस्य वंशकराः प्रभो
aṅgaṃ sa janayāmāsa vaṅgaṃ suhmaṃ tathaiva ca
puṇḍraṃ kaliṅgaṃ ca tathā bāleyaṃ kṣetramucyate
bāleyā brāhmaṇāścaiva tasya vaṃśakarāḥ prabho
- 26
बलेश्च ब्रह्मणा दत्तो वरः प्रीतेन धीमतः
महायोगित्वमायुश्च कल्पस्य परिमाणकम्
baleśca brahmaṇā datto varaḥ prītena dhīmataḥ
mahāyogitvamāyuśca kalpasya parimāṇakam
- 27
संग्रामे चाप्यजेयत्वं धर्मे चैवोत्तमा मतिः
त्रैकाल्यदर्शनं चैव प्राधान्यं प्रसवे तथा
saṃgrāme cāpyajeyatvaṃ dharme caivottamā matiḥ
traikālyadarśanaṃ caiva prādhānyaṃ prasave tathā
- 28
जयं चाप्रतिमं युद्धे धर्मे तत्त्वार्थदर्शनम्
चतुरो नियतान्वर्णान्स वै स्थापयिता प्रभुः
jayaṃ cāpratimaṃ yuddhe dharme tattvārthadarśanam
caturo niyatānvarṇānsa vai sthāpayitā prabhuḥ
- 29
तेषां च पञ्च दायादा वङ्गाङ्गाः सुह्मकास्तथा
पुण्ड्राः कलिङ्गाश्च तथा अङ्गस्य तु निबोधत
teṣāṃ ca pañca dāyādā vaṅgāṅgāḥ suhmakāstathā
puṇḍrāḥ kaliṅgāśca tathā aṅgasya tu nibodhata
- 30
मुनय ऊचुः
कथं बलेः सुता जाताः पञ्च तस्य महात्मनः
किंनाम्नी महिषी तस्य जनिता कतम ऋषिः
munaya ūcuḥ
kathaṃ baleḥ sutā jātāḥ pañca tasya mahātmanaḥ
kiṃnāmnī mahiṣī tasya janitā katama ṛṣiḥ

