43 shlokas
- 1
सूत उवाच
वामं विदार्य निष्क्रान्तः सुतो देव्याः पुनः शिशुः
स्कन्दाच्च वदने वह्नेः शुक्रात्सुवदनोऽरिहा
sūta uvāca
vāmaṃ vidārya niṣkrāntaḥ suto devyāḥ punaḥ śiśuḥ
skandācca vadane vahneḥ śukrātsuvadano'rihā
- 2
कृत्तिकामेलनादेव शाखाभिः सविशेषतः
शाखाभिधाः समाख्याताः षट्सु वक्त्रेषु विस्तृताः
kṛttikāmelanādeva śākhābhiḥ saviśeṣataḥ
śākhābhidhāḥ samākhyātāḥ ṣaṭsu vaktreṣu vistṛtāḥ
- 3
यतस्ततो विशाखोऽसौ ख्यातो लोकेषु षण्मुखः
स्कन्दो विशाखः षड्वक्त्रः कार्तिकेयश्च विश्रुतः
yatastato viśākho'sau khyāto lokeṣu ṣaṇmukhaḥ
skando viśākhaḥ ṣaḍvaktraḥ kārtikeyaśca viśrutaḥ
- 4
चैत्रस्य बहुले पक्षे पञ्चदश्यां महाबलौ
सम्भूतावर्कसदृशौ विशाले शरकानने
caitrasya bahule pakṣe pañcadaśyāṃ mahābalau
sambhūtāvarkasadṛśau viśāle śarakānane
- 5
चैत्रस्यैव सिते पक्षे पञ्चम्यां पाकशासनः
बालकाभ्यां चकारैकं मत्वा चामरभूतये
caitrasyaiva site pakṣe pañcamyāṃ pākaśāsanaḥ
bālakābhyāṃ cakāraikaṃ matvā cāmarabhūtaye
- 6
तस्यामेव ततः षष्ठ्यामभिषिक्तो गुहः प्रभुः
सर्वैरमरसंघातैर्ब्रह्मेन्द्रोपेन्द्रभास्करैः
tasyāmeva tataḥ ṣaṣṭhyāmabhiṣikto guhaḥ prabhuḥ
sarvairamarasaṃghātairbrahmendropendrabhāskaraiḥ
- 7
गन्धमाल्यैः शुभैर्धूपैस्तथा क्रीडनकैरपि
छत्रैश्चामरजालैश्च भूषणैश्च विलेपनैः
gandhamālyaiḥ śubhairdhūpaistathā krīḍanakairapi
chatraiścāmarajālaiśca bhūṣaṇaiśca vilepanaiḥ
- 8
अभिषिक्तो विधानेन यथावत्षण्मुखः प्रभुः
सुतामस्मै ददौ शक्रो देवसेनेति विश्रुताम्
abhiṣikto vidhānena yathāvatṣaṇmukhaḥ prabhuḥ
sutāmasmai dadau śakro devaseneti viśrutām
- 9
पत्न्यर्थं देवदेवस्य ददौ विष्णुस्तदायुधम्
यक्षाणां दशलक्षाणि ददावस्मै धनाधिपः
patnyarthaṃ devadevasya dadau viṣṇustadāyudham
yakṣāṇāṃ daśalakṣāṇi dadāvasmai dhanādhipaḥ
- 10
ददौ हुताशनस्तेजो ददौ वायुश्च वाहनम्
ददौ क्रीडनकं त्वष्टा कुक्कुटं कामरूपिणम्
एवं सुरास्तु ते सर्वे परिवारमनुत्तमम्
dadau hutāśanastejo dadau vāyuśca vāhanam
dadau krīḍanakaṃ tvaṣṭā kukkuṭaṃ kāmarūpiṇam
evaṃ surāstu te sarve parivāramanuttamam
- 11
ददुर्मुदितचेतस्काः स्कन्दायादित्यवर्चसे
dadurmuditacetaskāḥ skandāyādityavarcase
- 12
जानुभ्यामवनौ स्थित्वा सुरसंघास्तमस्तुवन्
स्तोत्रेणानेन वरदं षण्मुखं मुख्यशः सुराः
jānubhyāmavanau sthitvā surasaṃghāstamastuvan
stotreṇānena varadaṃ ṣaṇmukhaṃ mukhyaśaḥ surāḥ
- 13
देवा ऊचुः
नमः कुमाराय महाप्रभाय स्कन्दाय च स्कन्दितदानवाय
नवार्कविद्युद्द्युतये नमोऽस्तु ते नमोऽस्तु ते षण्मुख कामरूप
devā ūcuḥ
namaḥ kumārāya mahāprabhāya skandāya ca skanditadānavāya
navārkavidyuddyutaye namo'stu te namo'stu te ṣaṇmukha kāmarūpa
- 14
पिनद्धनानाभरणाय भर्त्रे नमो रणे दानवदारणाय
नमोऽस्तु तेऽर्कप्रतिमप्रभाय नमोऽस्तु गुह्याय गुहाय तुभ्यम्
pinaddhanānābharaṇāya bhartre namo raṇe dānavadāraṇāya
namo'stu te'rkapratimaprabhāya namo'stu guhyāya guhāya tubhyam
- 15
नमोऽस्तु त्रैलोक्यभयापहाय नमोऽस्तु ते बाल कृपापराय
नमो विशालामललोचनाय नमो विशाखाय महाव्रताय
namo'stu trailokyabhayāpahāya namo'stu te bāla kṛpāparāya
namo viśālāmalalocanāya namo viśākhāya mahāvratāya
- 16
नमो नमस्ते ऽस्तु मनोहराय नमो नमस्तेऽस्तु रणोत्कटाय
नमो मयूरोज्ज्वलवाहनाय नमोऽस्तु केयूरधराय तुभ्यम्
namo namaste 'stu manoharāya namo namaste'stu raṇotkaṭāya
namo mayūrojjvalavāhanāya namo'stu keyūradharāya tubhyam
- 17
नमो धृतोदग्रपताकिने नमस्ते नमः प्रभावप्रणताय तेऽस्तु
नमस्ते नमस्ते वरवीर्यशालिने कृपापरो नो भव भव्यमूर्ते
namo dhṛtodagrapatākine namaste namaḥ prabhāvapraṇatāya te'stu
namaste namaste varavīryaśāline kṛpāparo no bhava bhavyamūrte
- 18
क्रियापरा यज्ञपतिं च स्तुत्वा विनेमुरेवं त्वमराधिपाद्याः
एवं तदा षड्वदनस्तु सेन्द्रानुवाच तुष्टश्च गुहस्ततस्तान्
निरीक्ष्य नेत्रैरमलैः सुरेशाञ्शत्रून्हनिष्यामि गतज्वराः स्थ
kriyāparā yajñapatiṃ ca stutvā vinemurevaṃ tvamarādhipādyāḥ
evaṃ tadā ṣaḍvadanastu sendrānuvāca tuṣṭaśca guhastatastān
nirīkṣya netrairamalaiḥ sureśāñśatrūnhaniṣyāmi gatajvarāḥ stha
- 19
कुमार उवाच
कं वः कामं प्रयच्छामि देवता ब्रूत निर्वृताः
यद्यप्यसाध्यं हृद्यं वो हृदये चिन्तितं परम्
kumāra uvāca
kaṃ vaḥ kāmaṃ prayacchāmi devatā brūta nirvṛtāḥ
yadyapyasādhyaṃ hṛdyaṃ vo hṛdaye cintitaṃ param
- 20
इत्युक्तास्तु सुरास्तेन प्रोचुः प्रणतमौलयः
सर्व एव महात्मानं गुहं तद्गतमानसाः
ityuktāstu surāstena procuḥ praṇatamaulayaḥ
sarva eva mahātmānaṃ guhaṃ tadgatamānasāḥ
- 21
दैत्येन्द्रस्तारको नाम सर्वामरकुलान्तकृत्
बलवान्दुर्जयो दुष्टो दुराचारोऽतिकोपनः
तमेव जहि हृद्योऽर्थ एषोऽस्माकं भयापह
daityendrastārako nāma sarvāmarakulāntakṛt
balavāndurjayo duṣṭo durācāro'tikopanaḥ
tameva jahi hṛdyo'rtha eṣo'smākaṃ bhayāpaha
- 22
एवमुक्तस्तथेत्युक्त्वा सर्वामरपदानुगः
जगाम जगतां नाथः स्तूयमानोऽमरेश्वरैः
evamuktastathetyuktvā sarvāmarapadānugaḥ
jagāma jagatāṃ nāthaḥ stūyamāno'mareśvaraiḥ
- 23
तारकस्य वधार्थाय जगतः कण्टकस्य वै
ततश्च प्रेषयामास शक्रो लब्धसमाश्रयः
tārakasya vadhārthāya jagataḥ kaṇṭakasya vai
tataśca preṣayāmāsa śakro labdhasamāśrayaḥ
- 24
दूतं दानवसिंहस्य परुषाक्षरवादिनम्
स तु गत्वाब्रवीद्दैत्यं निर्भयो भीमदर्शनः
dūtaṃ dānavasiṃhasya paruṣākṣaravādinam
sa tu gatvābravīddaityaṃ nirbhayo bhīmadarśanaḥ
- 25
दूत उवाच
शक्रस्त्वामाह देवेशो दैत्यकेतो दिवस्पतिः
तारकासुर तच्छ्रुत्वा घटशक्त्या यथेच्छया
dūta uvāca
śakrastvāmāha deveśo daityaketo divaspatiḥ
tārakāsura tacchrutvā ghaṭaśaktyā yathecchayā
- 26
यज्जगद्दलनादाप्तं किल्बिषं दानव त्वया
तस्याहं शासकस्तेऽद्य राजास्मि भुवनत्रये
yajjagaddalanādāptaṃ kilbiṣaṃ dānava tvayā
tasyāhaṃ śāsakaste'dya rājāsmi bhuvanatraye
- 27
श्रुत्वैतद्दूतवचनं कोपसंरक्तलोचनः
उवाच दूतं दुष्टात्मा नष्टप्रायविभूतिकः
śrutvaitaddūtavacanaṃ kopasaṃraktalocanaḥ
uvāca dūtaṃ duṣṭātmā naṣṭaprāyavibhūtikaḥ
- 28
तारक उवाच
दृष्टं ते पौरुषं शक्र रणेषु शतशो मया
निस्त्रपत्वान्न ते लज्जा विद्यते शक्र दुर्मते
tāraka uvāca
dṛṣṭaṃ te pauruṣaṃ śakra raṇeṣu śataśo mayā
nistrapatvānna te lajjā vidyate śakra durmate
- 29
एवमुक्ते गते दूते चिन्तयामास दानवः
नालब्धसंश्रयः शक्रो वक्तुमेवं हि चार्हति
evamukte gate dūte cintayāmāsa dānavaḥ
nālabdhasaṃśrayaḥ śakro vaktumevaṃ hi cārhati
- 30
जितः स शक्रो नाकस्माज्जायते संश्रयाश्रयः
निमित्तानि च दुष्टानि सोऽपश्यद्दुष्टचेष्टितः
jitaḥ sa śakro nākasmājjāyate saṃśrayāśrayaḥ
nimittāni ca duṣṭāni so'paśyadduṣṭaceṣṭitaḥ

