31 shlokas
- 1
शौनक उवाच
जरां प्राप्य ययातिस्तु स्वपुरं प्राप्य चैव हि
पुत्रं ज्येष्ठं वरिष्ठं च यदुमित्यब्रवीद्द्विजः
śaunaka uvāca
jarāṃ prāpya yayātistu svapuraṃ prāpya caiva hi
putraṃ jyeṣṭhaṃ variṣṭhaṃ ca yadumityabravīddvijaḥ
- 2
ययातिरुवाच
जरा वली च मां तात पलितानि च पर्यगुः
काव्यस्योशनसः शापान्न च तृप्तोऽस्मि यौवने
yayātiruvāca
jarā valī ca māṃ tāta palitāni ca paryaguḥ
kāvyasyośanasaḥ śāpānna ca tṛpto'smi yauvane
- 3
त्वं यदो प्रतिपद्यस्व पाप्मानं जरया सह
यौवनेन त्वदीयेन चरेयं विषयानहम्
tvaṃ yado pratipadyasva pāpmānaṃ jarayā saha
yauvanena tvadīyena careyaṃ viṣayānaham
- 4
पूर्णे वर्षसहस्रे तु त्वदीयं यौवनं त्व् अहम्
दत्त्वा सम्प्रतिपत्स्यामि पाप्मानं जरया सह
pūrṇe varṣasahasre tu tvadīyaṃ yauvanaṃ tv aham
dattvā sampratipatsyāmi pāpmānaṃ jarayā saha
- 5
यदुरुवाच
सितश्मश्रुधरो दीनो जरसा शिथिलीकृतः
वलीसंततगात्रश्च दुदर्शो दुर्बलः कृशः
yaduruvāca
sitaśmaśrudharo dīno jarasā śithilīkṛtaḥ
valīsaṃtatagātraśca dudarśo durbalaḥ kṛśaḥ
- 6
अशक्तः कार्यकरणे परिभूतः स यौवने
सहोपजीविभिश्चैव तज्जरां नाभिकामये
aśaktaḥ kāryakaraṇe paribhūtaḥ sa yauvane
sahopajīvibhiścaiva tajjarāṃ nābhikāmaye
- 7
सन्ति ते बहवः पुत्रा मत्तः प्रियतरा नृप
जरां ग्रहीतुं धर्मज्ञ पुत्रमन्यं वृणीष्व वै
santi te bahavaḥ putrā mattaḥ priyatarā nṛpa
jarāṃ grahītuṃ dharmajña putramanyaṃ vṛṇīṣva vai
- 8
ययातिरुवाच
यस्त्वं मे हृदयाज्जातो वयः स्वं न प्रयच्छसि
पापान्मातुलसम्बन्धाद्दुष्प्रजा ते भविष्यति
yayātiruvāca
yastvaṃ me hṛdayājjāto vayaḥ svaṃ na prayacchasi
pāpānmātulasambandhādduṣprajā te bhaviṣyati
- 9
तुर्वसो प्रतिपद्यस्व पाप्मानं जरया सह
यौवनेन चरेयं वै विषयांस्तव पुत्रक
turvaso pratipadyasva pāpmānaṃ jarayā saha
yauvanena careyaṃ vai viṣayāṃstava putraka
- 10
पूर्णे वर्षसहस्रे नु पुनर्दास्यामि यौवनम्
तथैव प्रतिपत्स्यामि पाप्मानं जरया सह
pūrṇe varṣasahasre nu punardāsyāmi yauvanam
tathaiva pratipatsyāmi pāpmānaṃ jarayā saha
- 11
तुर्वसुरुवाच
न कामये जरां तात कामभोगप्रणाशिनीम्
बलरूपान्तकरणीं बुद्धिमानविनाशिनीम्
turvasuruvāca
na kāmaye jarāṃ tāta kāmabhogapraṇāśinīm
balarūpāntakaraṇīṃ buddhimānavināśinīm
- 12
ययातिरुवाच
यस्त्वं मे हृदयाज्जातो वयः स्वं न प्रयच्छसि
तस्मात्प्रजा समुच्छेदं तुर्वसो तव यास्यति
yayātiruvāca
yastvaṃ me hṛdayājjāto vayaḥ svaṃ na prayacchasi
tasmātprajā samucchedaṃ turvaso tava yāsyati
- 13
संकीर्णाश्चोरधर्मेषु प्रतिलोमचरेषु च
पिशिताशिषु लोकेषु नूनं राजा भविष्यसि
saṃkīrṇāścoradharmeṣu pratilomacareṣu ca
piśitāśiṣu lokeṣu nūnaṃ rājā bhaviṣyasi
- 14
गुरुदारप्रसक्तेषु तिर्यग्योनिरतेषु च
पशुधर्मिषु म्लेच्छेषु पापेषु प्रभविष्यसि
gurudāraprasakteṣu tiryagyonirateṣu ca
paśudharmiṣu mleccheṣu pāpeṣu prabhaviṣyasi
- 15
शौनक उवाच
एवं स तुर्वसुं शप्त्वा ययातिः सुतमात्मनः
शर्मिष्ठायाः सुतं ज्येष्ठं द्रुह्युं वचनमब्रवीत्
śaunaka uvāca
evaṃ sa turvasuṃ śaptvā yayātiḥ sutamātmanaḥ
śarmiṣṭhāyāḥ sutaṃ jyeṣṭhaṃ druhyuṃ vacanamabravīt
- 16
ययातिरुवाच
द्रुह्यो त्वं प्रतिपद्यस्व वर्णरूपविनाशिनीम्
जरां वर्षसहस्रं मे यौवनं स्वं प्रयच्छताम्
yayātiruvāca
druhyo tvaṃ pratipadyasva varṇarūpavināśinīm
jarāṃ varṣasahasraṃ me yauvanaṃ svaṃ prayacchatām
- 17
पूर्णे वर्षसहस्रे तु ते प्रदास्यामि यौवनम्
स्वं चादास्यामि भूयो ऽहं पाप्मानं जरया सह
pūrṇe varṣasahasre tu te pradāsyāmi yauvanam
svaṃ cādāsyāmi bhūyo 'haṃ pāpmānaṃ jarayā saha
- 18
द्रुह्युरुवाच
न राज्यं न रथं नाश्वं जीर्णो भुङ्क्ते न च स्त्रियम्
न रागश्चास्य भवति तज्जरां ते न कामये
druhyuruvāca
na rājyaṃ na rathaṃ nāśvaṃ jīrṇo bhuṅkte na ca striyam
na rāgaścāsya bhavati tajjarāṃ te na kāmaye
- 19
ययातिरुवाच
यस्त्वं मे हृदयाज्जातो वयः स्वं न प्रयच्छसि
तद्द्रुह्यो वै प्रियः कामो न ते सम्पत्स्यते क्वचित्
yayātiruvāca
yastvaṃ me hṛdayājjāto vayaḥ svaṃ na prayacchasi
taddruhyo vai priyaḥ kāmo na te sampatsyate kvacit
- 20
नौर् उपप्लवसंचारो यत्र नित्यं भविष्यति
अराज्यभोजशब्दं त्वं तत्र प्राप्स्यसि सान्वयः
naur upaplavasaṃcāro yatra nityaṃ bhaviṣyati
arājyabhojaśabdaṃ tvaṃ tatra prāpsyasi sānvayaḥ
- 21
ययातिरुवाच
अनो त्वं प्रतिपद्यस्व पाप्मानं जरया सह
एकं वर्षसहस्रं तु चरेयं यौवनेन ते
yayātiruvāca
ano tvaṃ pratipadyasva pāpmānaṃ jarayā saha
ekaṃ varṣasahasraṃ tu careyaṃ yauvanena te
- 22
अनुर् उवाच
जीर्णः शिशुरिवादत्ते कालेऽन्नमशुचिर्यथा
न जुहोति च कालेऽग्निं तां जरां नाभिकामये
anur uvāca
jīrṇaḥ śiśurivādatte kāle'nnamaśuciryathā
na juhoti ca kāle'gniṃ tāṃ jarāṃ nābhikāmaye
- 23
ययातिरुवाच
यस्त्वं मे हृदयाज्जातो वयः स्वं न प्रयच्छसि
जरादोषस्त्वयोक्तो यस्तस्मात्त्वं प्रतिपद्यसे
yayātiruvāca
yastvaṃ me hṛdayājjāto vayaḥ svaṃ na prayacchasi
jarādoṣastvayokto yastasmāttvaṃ pratipadyase
- 24
प्रजाश्च यौवनं प्राप्ता विनश्यन्ति ह्य् अनो तव
अग्निप्रस्कन्दनगतस्त्वं चाप्येवं भविष्यसि
prajāśca yauvanaṃ prāptā vinaśyanti hy ano tava
agnipraskandanagatastvaṃ cāpyevaṃ bhaviṣyasi
- 25
ययातिरुवाच
पूरो त्वं प्रतिपद्यस्व पाप्मानं जरया सह
त्वं मे प्रियतरः पुत्रस्त्वं वरीयान्भविष्यसि
yayātiruvāca
pūro tvaṃ pratipadyasva pāpmānaṃ jarayā saha
tvaṃ me priyataraḥ putrastvaṃ varīyānbhaviṣyasi
- 26
जरा वली च मां तात पलितानि च पर्यगुः
काव्यस्योशनसः शापान्न च तृप्तोऽस्मि यौवने
jarā valī ca māṃ tāta palitāni ca paryaguḥ
kāvyasyośanasaḥ śāpānna ca tṛpto'smi yauvane
- 27
किंचित्कालं चरेयं वै विषयान्वयसा तव
पूर्णे वर्षसहस्रे तु प्रतिदास्यामि यौवनम्
स्वं चैव प्रतिपत्स्येऽहं पाप्मानं जरया सह
kiṃcitkālaṃ careyaṃ vai viṣayānvayasā tava
pūrṇe varṣasahasre tu pratidāsyāmi yauvanam
svaṃ caiva pratipatsye'haṃ pāpmānaṃ jarayā saha
- 28
शौनक उवाच
एवमुक्तः प्रत्युवाच पूरुः पितरमञ्जसा
यथात्थ त्वं महाराज तत्करिष्यामि ते वचः
śaunaka uvāca
evamuktaḥ pratyuvāca pūruḥ pitaramañjasā
yathāttha tvaṃ mahārāja tatkariṣyāmi te vacaḥ
- 29
प्रतिपत्स्यामि ते राजन्पाप्मानं जरया सह
गृहाण यौवनं मत्तश्चर कामान्यथेप्सितान्
pratipatsyāmi te rājanpāpmānaṃ jarayā saha
gṛhāṇa yauvanaṃ mattaścara kāmānyathepsitān
- 30
जरयाहं प्रतिच्छन्नो वयोरूपधरस्तव
यौवनं भवते दत्त्वा चरिष्यामि यथेच्छया
jarayāhaṃ praticchanno vayorūpadharastava
yauvanaṃ bhavate dattvā cariṣyāmi yathecchayā

