50 shlokas
- 1
सूत उवाच
निर्मिते त्रिपुरे दुर्गे मयेनासुरशिल्पिना
तद्दुर्गं दुर्गतां प्राप बद्धवैरैः सुरासुरैः
sūta uvāca
nirmite tripure durge mayenāsuraśilpinā
taddurgaṃ durgatāṃ prāpa baddhavairaiḥ surāsuraiḥ
- 2
सकलत्राः सपुत्राश्च शस्त्रवन्तोऽन्तकोपमाः
मयादिष्टानि विविशुर्गृहाणि हृषिताश्च ते
sakalatrāḥ saputrāśca śastravanto'ntakopamāḥ
mayādiṣṭāni viviśurgṛhāṇi hṛṣitāśca te
- 3
सिंहा वनमिवानेके मकरा इव सागरम्
रोषैश्चैवातिपारुष्यैः शरीरमिव संहतैः
siṃhā vanamivāneke makarā iva sāgaram
roṣaiścaivātipāruṣyaiḥ śarīramiva saṃhataiḥ
- 4
तद्वद्बलिभिरध्यस्तं तत्पुरं देवतारिभिः
त्रिपुरं संकुलं जातं दैत्यकोटिशताकुलम्
tadvadbalibhiradhyastaṃ tatpuraṃ devatāribhiḥ
tripuraṃ saṃkulaṃ jātaṃ daityakoṭiśatākulam
- 5
सुतलादपि निष्पत्य पातालाद्दानवालयात्
उपतस्थुः पयोदाभा ये च गिर्युपजीविनः
sutalādapi niṣpatya pātālāddānavālayāt
upatasthuḥ payodābhā ye ca giryupajīvinaḥ
- 6
यो यं प्रार्थयते कामं सम्प्राप्तस्त्रिपुराश्रयात्
तस्य तस्य मयस्तत्र मायया विदधाति सः
yo yaṃ prārthayate kāmaṃ samprāptastripurāśrayāt
tasya tasya mayastatra māyayā vidadhāti saḥ
- 7
सचन्द्रेषु प्रदोषेषु साम्बुजेषु सरःसु च
आरामेषु सचूतेषु तपोधनवनेषु च
sacandreṣu pradoṣeṣu sāmbujeṣu saraḥsu ca
ārāmeṣu sacūteṣu tapodhanavaneṣu ca
- 8
स्वङ्गाश्चन्दनदिग्धाङ्गां मातंगाः समदा इव
मृष्टाभरणवस्त्राश्च मृष्टस्रगनुलेपनाः
svaṅgāścandanadigdhāṅgāṃ mātaṃgāḥ samadā iva
mṛṣṭābharaṇavastrāśca mṛṣṭasraganulepanāḥ
- 9
प्रियाभिः प्रियक्रामाभिर्हावभावप्रसूतिभिः
नारीभिः सततं रेमुर्मुदिताश्चैव दानवाः
priyābhiḥ priyakrāmābhirhāvabhāvaprasūtibhiḥ
nārībhiḥ satataṃ remurmuditāścaiva dānavāḥ
- 10
मयेन निर्मिते स्थाने मोदमाना महासुराः
अर्थे धर्मे च कामे च निदधुस्ते मतीः स्वयम्
mayena nirmite sthāne modamānā mahāsurāḥ
arthe dharme ca kāme ca nidadhuste matīḥ svayam
- 11
तेषां त्रिपुरयुक्तानां त्रिपुरे त्रिदशारिणाम्
व्रजति स्म सुखं कालः स्वर्गस्थानां यथा तथा
teṣāṃ tripurayuktānāṃ tripure tridaśāriṇām
vrajati sma sukhaṃ kālaḥ svargasthānāṃ yathā tathā
- 12
शुश्रूषन्ते पितॄन्पुत्राः पत्न्यश्चापि पतींस्तथा
विमुक्तकलहाश्चापि प्रीतयः प्रचुराभवन्
śuśrūṣante pitṝnputrāḥ patnyaścāpi patīṃstathā
vimuktakalahāścāpi prītayaḥ pracurābhavan
- 13
नाधर्मस्त्रिपुरस्थान् आबाधते वीर्यवानपि
अर्चयन्तो दितेः पुत्रास्त्रिपुरायतने हरम्
nādharmastripurasthān ābādhate vīryavānapi
arcayanto diteḥ putrāstripurāyatane haram
- 14
पुण्याहशब्दानुच्चेरुर् आशीर्वादांश्च वेदगान्
स्वनूपुररवोन्मिश्रान्वेणुवीणारवानपि
puṇyāhaśabdānuccerur āśīrvādāṃśca vedagān
svanūpuraravonmiśrānveṇuvīṇāravānapi
- 15
हासश्च वरनारीणां चित्तव्याकुलकारकः
त्रिपुरे दानवेन्द्राणां रमतां श्रूयते सदा
hāsaśca varanārīṇāṃ cittavyākulakārakaḥ
tripure dānavendrāṇāṃ ramatāṃ śrūyate sadā
- 16
तेषामर्चयतां देवान्ब्राह्मणांश्च नमस्यताम्
धर्मार्थकाममन्त्राणां महान्कालोऽभ्यवर्तत
teṣāmarcayatāṃ devānbrāhmaṇāṃśca namasyatām
dharmārthakāmamantrāṇāṃ mahānkālo'bhyavartata
- 17
अथालक्ष्मीरसूया च तृड्बुभुक्षे तथैव च
कलिश्च कलहश्चैव त्रिपुरं विविशुः सह
athālakṣmīrasūyā ca tṛḍbubhukṣe tathaiva ca
kaliśca kalahaścaiva tripuraṃ viviśuḥ saha
- 18
संध्याकालं प्रविष्टास्ते त्रिपुरं च भयावहाः
समध्यासुः समं घोराः शरीराणि यथामयाः
saṃdhyākālaṃ praviṣṭāste tripuraṃ ca bhayāvahāḥ
samadhyāsuḥ samaṃ ghorāḥ śarīrāṇi yathāmayāḥ
- 19
सर्व एते विशन्तस्तु मयेन त्रिपुरान्तरम्
स्वप्ने भयावहा दृष्टा आविशन्तस्तु दानवान्
sarva ete viśantastu mayena tripurāntaram
svapne bhayāvahā dṛṣṭā āviśantastu dānavān
- 20
उदिते च सहस्रांशौ शुभभासाकरे रवौ
मयः सभामाविवेश भास्कराभ्यामिवाम्बुदः
udite ca sahasrāṃśau śubhabhāsākare ravau
mayaḥ sabhāmāviveśa bhāskarābhyāmivāmbudaḥ
- 21
मेरुकूटनिभे रम्य आसने स्वर्णमण्डिते
आसीनाः काञ्चनगिरेः शृङ्गे तोयमुचो यथा
merukūṭanibhe ramya āsane svarṇamaṇḍite
āsīnāḥ kāñcanagireḥ śṛṅge toyamuco yathā
- 22
पार्श्वयोस्तारकाख्यश्च विद्युन्माली च दानवः
उपविष्टौ मयस्यान्ते हस्तिनः कलभाविव
pārśvayostārakākhyaśca vidyunmālī ca dānavaḥ
upaviṣṭau mayasyānte hastinaḥ kalabhāviva
- 23
ततः सुरारयः सर्वेऽशेषकोपा रणाजिरे
उपविष्टा दृढं विद्धा दानवा देवशत्रवः
tataḥ surārayaḥ sarve'śeṣakopā raṇājire
upaviṣṭā dṛḍhaṃ viddhā dānavā devaśatravaḥ
- 24
तेष्वासीनेषु सर्वेषु सुखासनगतेषु च
मयो मायाविजनक इत्युवाच स दानवान्
teṣvāsīneṣu sarveṣu sukhāsanagateṣu ca
mayo māyāvijanaka ityuvāca sa dānavān
- 25
खेचराः खेचरारावा भो भो दाक्षायणीसुताः
निशामयध्वं स्वप्नोऽयं मया दृष्टो भयावहः
khecarāḥ khecarārāvā bho bho dākṣāyaṇīsutāḥ
niśāmayadhvaṃ svapno'yaṃ mayā dṛṣṭo bhayāvahaḥ
- 26
चतस्रः प्रमदास्तत्र त्रयो मर्त्या भयावहाः
कोपानलादीप्तमुखाः प्रविष्टास्त्रिपुरार्दिनः
catasraḥ pramadāstatra trayo martyā bhayāvahāḥ
kopānalādīptamukhāḥ praviṣṭāstripurārdinaḥ
- 27
प्रविश्य रुषितास्ते च पुराण्यतुलविक्रमाः
प्रविष्टाः स्म शरीराणि भूत्वा बहुशरीरिणः
praviśya ruṣitāste ca purāṇyatulavikramāḥ
praviṣṭāḥ sma śarīrāṇi bhūtvā bahuśarīriṇaḥ
- 28
नगरं त्रिपुरं चेदं तमसा समवस्थितम्
सगृहं सह युष्माभिः सागराम्भसि मज्जितम्
nagaraṃ tripuraṃ cedaṃ tamasā samavasthitam
sagṛhaṃ saha yuṣmābhiḥ sāgarāmbhasi majjitam
- 29
उलूकं रुचिरा नारी नग्नारूढा खरं तथा
सह स्त्रीभिर्हसन्ती च चुम्बने प्रमदा यथा
पुरुषः सिन्दुतिलकश्चतुरङ्घ्रिस्त्रिलोचनः
ulūkaṃ rucirā nārī nagnārūḍhā kharaṃ tathā
saha strībhirhasantī ca cumbane pramadā yathā
puruṣaḥ sindutilakaścaturaṅghristrilocanaḥ
- 30
येन सा प्रमदा नुन्ना अहं चैव विबोधितः
ईदृशी प्रमदा दृष्टा मया चातिभयावहा
yena sā pramadā nunnā ahaṃ caiva vibodhitaḥ
īdṛśī pramadā dṛṣṭā mayā cātibhayāvahā

