11 shlokas
- 1
ईश्वर उवाच
अतः परं प्रवक्ष्यामि रत्नाचलमनुत्तमम्
मुक्ताफलसहस्रेण पर्वतः स्यादनुत्तमः
īśvara uvāca
ataḥ paraṃ pravakṣyāmi ratnācalamanuttamam
muktāphalasahasreṇa parvataḥ syādanuttamaḥ
- 2
मध्यमः पञ्चशतिकस्त्रिशतेनाधमः स्मृतः
चतुर्थांशेन विष्कम्भपर्वताः स्युः समन्ततः
madhyamaḥ pañcaśatikastriśatenādhamaḥ smṛtaḥ
caturthāṃśena viṣkambhaparvatāḥ syuḥ samantataḥ
- 3
पूर्वेण वज्रगोमेदैर्दक्षिणेनेन्द्रनीलकैः
पद्मरागयुतः कार्यो विद्वद्भिर्गन्धमादनः
pūrveṇa vajragomedairdakṣiṇenendranīlakaiḥ
padmarāgayutaḥ kāryo vidvadbhirgandhamādanaḥ
- 4
वैदूर्यविद्रुमैः पश्चात्सम्मिश्रो विमलाचलः
पद्मरागैः ससौवर्णैर् उत्तरेण च विन्यसेत्
vaidūryavidrumaiḥ paścātsammiśro vimalācalaḥ
padmarāgaiḥ sasauvarṇair uttareṇa ca vinyaset
- 5
धान्यपर्वतवत्सर्वमत्रापि परिकल्पयेत्
तद्वदावाहनं कुर्याद्वृक्षान्देवांश्च काञ्चनान्
dhānyaparvatavatsarvamatrāpi parikalpayet
tadvadāvāhanaṃ kuryādvṛkṣāndevāṃśca kāñcanān
- 6
पूजयेत्पुष्पगन्धाद्यैः प्रभाते च विमत्सरः
पूर्ववद्गुरुऋत्विग्भ्य इमान्मन्त्रानुदीरयेत्
pūjayetpuṣpagandhādyaiḥ prabhāte ca vimatsaraḥ
pūrvavadguruṛtvigbhya imānmantrānudīrayet
- 7
यदा देवगणाः सर्वे सर्वरत्नेष्ववस्थिताः
त्वं च रत्नमयो नित्यं नमस्तेऽस्तु सदाचल
yadā devagaṇāḥ sarve sarvaratneṣvavasthitāḥ
tvaṃ ca ratnamayo nityaṃ namaste'stu sadācala
- 8
यस्माद्रत्नप्रदानेन तुष्टिं प्रकुरुते हरिः
सदा रत्नप्रदानेन तस्मान्नः पाहि पर्वत
yasmādratnapradānena tuṣṭiṃ prakurute hariḥ
sadā ratnapradānena tasmānnaḥ pāhi parvata
- 9
अनेन विधिना यस्तु दद्याद्रत्नमयं गिरिम्
स याति विष्णुसालोक्यममरेश्वरपूजितः
anena vidhinā yastu dadyādratnamayaṃ girim
sa yāti viṣṇusālokyamamareśvarapūjitaḥ
- 10
यावत्कल्पशतं साग्रं वसेच्चेह नराधिप
रूपारोग्यगुणोपेतः सप्तद्वीपाधिपो भवेत्
yāvatkalpaśataṃ sāgraṃ vasecceha narādhipa
rūpārogyaguṇopetaḥ saptadvīpādhipo bhavet
- 11
ब्रह्महत्यादिकं किंचिद्यदत्रामुत्र वा कृतम्
तत्सर्वं नाशमायाति गिरिर्वज्रहतो यथा
brahmahatyādikaṃ kiṃcidyadatrāmutra vā kṛtam
tatsarvaṃ nāśamāyāti girirvajrahato yathā

