28 shlokas
- 1
सूत उवाच
इति चिन्तायुतो दैत्यो दिव्योपायप्रभावजम्
चकार त्रिपुरं दुर्गं मनःसंचारचारितम्
sūta uvāca
iti cintāyuto daityo divyopāyaprabhāvajam
cakāra tripuraṃ durgaṃ manaḥsaṃcāracāritam
- 2
प्राकारोऽनेन मार्गेण इह वामुत्र गोपुरम्
इह चाट्टालकद्वारमिह चाट्टालगोपुरम्
prākāro'nena mārgeṇa iha vāmutra gopuram
iha cāṭṭālakadvāramiha cāṭṭālagopuram
- 3
राजमार्ग इतश्चापि विपुलो भवतामिति
रथ्योपरथ्याः सत्त्रिका इह चत्वर एव च
rājamārga itaścāpi vipulo bhavatāmiti
rathyoparathyāḥ sattrikā iha catvara eva ca
- 4
इदमन्तःपुरस्थानं रुद्रायतनमत्र च
सवटानि तडागानि ह्यत्र वाप्यः सरांसि च
idamantaḥpurasthānaṃ rudrāyatanamatra ca
savaṭāni taḍāgāni hyatra vāpyaḥ sarāṃsi ca
- 5
आरामाश्च सभाश्चात्र उद्यानान्यत्र वा तथा
उपनिर्गमो दानवानां भवत्यत्र मनोहरः
ārāmāśca sabhāścātra udyānānyatra vā tathā
upanirgamo dānavānāṃ bhavatyatra manoharaḥ
- 6
इत्येवं मानसं तत्राकल्पयत्पुरकल्पवित्
मयेन तत्पुरं सृष्टं त्रिपुरं त्विति नः श्रुतम्
ityevaṃ mānasaṃ tatrākalpayatpurakalpavit
mayena tatpuraṃ sṛṣṭaṃ tripuraṃ tviti naḥ śrutam
- 7
कार्ष्णायसमयं यत्तु मयेन विहितं पुरम्
तारकाख्योऽधिपस्तत्र कृतस्थानाधिपोऽवसत्
kārṣṇāyasamayaṃ yattu mayena vihitaṃ puram
tārakākhyo'dhipastatra kṛtasthānādhipo'vasat
- 8
यत्तु पूर्णेन्दुसंकाशं राजतं निर्मितं पुरम्
विद्युन्माली प्रभुस्तत्र विद्युन्माली त्विवाम्बुदः
yattu pūrṇendusaṃkāśaṃ rājataṃ nirmitaṃ puram
vidyunmālī prabhustatra vidyunmālī tvivāmbudaḥ
- 9
सुवर्णाधिकृतं यच्च मयेन विहितं पुरम्
स्वयमेव मयस्तत्र गतस्तदधिपः प्रभुः
suvarṇādhikṛtaṃ yacca mayena vihitaṃ puram
svayameva mayastatra gatastadadhipaḥ prabhuḥ
- 10
तारकस्य पुरं तत्र शतयोजनमन्तरम्
विद्युन्मालिपुरं चापि शतयोजनकेऽन्तरे
tārakasya puraṃ tatra śatayojanamantaram
vidyunmālipuraṃ cāpi śatayojanake'ntare
- 11
मेरुपर्वतसंकाशं मयस्यापि पुरं महत्
पुष्यसंयोगमात्रेण कालेन स मयः पुरा
meruparvatasaṃkāśaṃ mayasyāpi puraṃ mahat
puṣyasaṃyogamātreṇa kālena sa mayaḥ purā
- 12
कृतवांस्त्रिपुरं दैत्यस्त्रिनेत्रः पुष्पकं यथा
येन येन मयो याति प्रकुर्वाणः पुरं पुरात्
kṛtavāṃstripuraṃ daityastrinetraḥ puṣpakaṃ yathā
yena yena mayo yāti prakurvāṇaḥ puraṃ purāt
- 13
प्रशस्तास्तत्र तत्रैव वारुण्यामालयाः स्वयम्
रुक्मरूप्यायसानां च शतशोऽथ सहस्रशः
praśastāstatra tatraiva vāruṇyāmālayāḥ svayam
rukmarūpyāyasānāṃ ca śataśo'tha sahasraśaḥ
- 14
रत्नाचितानि शोभन्ते पुराण्यमरविद्विषाम्
प्रासादशतजुष्टानि कूटागारोत्कटानि च
ratnācitāni śobhante purāṇyamaravidviṣām
prāsādaśatajuṣṭāni kūṭāgārotkaṭāni ca
- 15
सर्वेषां कामगानि स्युः सर्वलोकातिगानि च
सोद्यानवापीकूपानि सपद्मसरवन्ति च
sarveṣāṃ kāmagāni syuḥ sarvalokātigāni ca
sodyānavāpīkūpāni sapadmasaravanti ca
- 16
अशोकवनभूतानि कोकिलारुतवन्ति च
चित्रशालाविशालानि चतुःशालोत्तमानि च
aśokavanabhūtāni kokilārutavanti ca
citraśālāviśālāni catuḥśālottamāni ca
- 17
सप्ताष्टदशभौमानि सत्कृतानि मयेन च
बहुध्वजपताकानि स्रग्दामालंकृतानि च
saptāṣṭadaśabhaumāni satkṛtāni mayena ca
bahudhvajapatākāni sragdāmālaṃkṛtāni ca
- 18
किङ्किणीजालशब्दानि गन्धवन्ति महान्ति च
सुसंयुक्तोपलिप्तानि पुष्पनैवेद्यवन्ति च
kiṅkiṇījālaśabdāni gandhavanti mahānti ca
susaṃyuktopaliptāni puṣpanaivedyavanti ca
- 19
यज्ञधूमान्धकाराणि सम्पूर्णकलशानि च
गगनावरणाभानि हंसपङ्क्तिनिभानि च
yajñadhūmāndhakārāṇi sampūrṇakalaśāni ca
gaganāvaraṇābhāni haṃsapaṅktinibhāni ca
- 20
पङ्क्तीकृतानि राजन्ते गृहाणि त्रिपुरे पुरे
मुक्ताकलापैर्लम्बद्भिर्हसन्तीव शशिश्रियम्
paṅktīkṛtāni rājante gṛhāṇi tripure pure
muktākalāpairlambadbhirhasantīva śaśiśriyam
- 21
मल्लिकाजातिपुष्पाद्यैर्गन्धधूपाधिवासितैः
पञ्चेन्द्रियसुखैर्नित्यं समैः सत्पुरुषैरिव
mallikājātipuṣpādyairgandhadhūpādhivāsitaiḥ
pañcendriyasukhairnityaṃ samaiḥ satpuruṣairiva
- 22
हेमराजतलोहाद्यमणिरत्नाञ्जनाङ्किताः
प्राकारास्त्रिपुरे तस्मिन्गिरिप्राकारसंनिभाः
hemarājatalohādyamaṇiratnāñjanāṅkitāḥ
prākārāstripure tasmingiriprākārasaṃnibhāḥ
- 23
एकैकस्मिन्पुरे तस्मिन्गोपुराणां शतं शतम्
सपताकाध्वजवतां दृश्यन्ते गिरिशृङ्गवत्
ekaikasminpure tasmingopurāṇāṃ śataṃ śatam
sapatākādhvajavatāṃ dṛśyante giriśṛṅgavat
- 24
नूपुरारावरम्याणि त्रिपुरे तत्पुराण्यपि
स्वर्गातिरिक्तश्रीकाणि तत्र कन्यापुराणि च
nūpurārāvaramyāṇi tripure tatpurāṇyapi
svargātiriktaśrīkāṇi tatra kanyāpurāṇi ca
- 25
आरामैश्च विहारैश्च तडागवटचत्वरैः
सरोभिश्च सरिद्भिश्च वनैश्चोपवनैरपि
ārāmaiśca vihāraiśca taḍāgavaṭacatvaraiḥ
sarobhiśca saridbhiśca vanaiścopavanairapi
- 26
दिव्यभोगोपभोगानि नानारत्नयुतानि च
पुष्पोत्करैश्च सुभगास्त्रिपुरस्योपनिर्गमाः
परिखाशतगम्भीराः कृता मायानिवारणैः
divyabhogopabhogāni nānāratnayutāni ca
puṣpotkaraiśca subhagāstripurasyopanirgamāḥ
parikhāśatagambhīrāḥ kṛtā māyānivāraṇaiḥ
- 27
निशम्य तद्दुर्गविधानमुत्तमं कृतं मयेनाद्भुतवीर्यकर्मणा
दितेः सुता दैवतराजवैरिणः सहस्रशः प्रापुरनन्तविक्रमाः
niśamya taddurgavidhānamuttamaṃ kṛtaṃ mayenādbhutavīryakarmaṇā
diteḥ sutā daivatarājavairiṇaḥ sahasraśaḥ prāpuranantavikramāḥ
- 28
तदासुरैर्दर्पितवैरिमर्दनैर्जनार्दनैः शैलकरीन्द्रसंनिभैः
बभूव पूर्णं त्रिपुरं तथा पुरा यथाम्बरं भूरिजलैर्जलप्रदैः
tadāsurairdarpitavairimardanairjanārdanaiḥ śailakarīndrasaṃnibhaiḥ
babhūva pūrṇaṃ tripuraṃ tathā purā yathāmbaraṃ bhūrijalairjalapradaiḥ

