10 shlokas
- 1
ईश्वर उवाच
अतः परं प्रवक्ष्यामि घृताचलमनुत्तमम्
तेजोऽमृतमयं दिव्यं महापातकनाशनम्
īśvara uvāca
ataḥ paraṃ pravakṣyāmi ghṛtācalamanuttamam
tejo'mṛtamayaṃ divyaṃ mahāpātakanāśanam
- 2
विंशत्या घृतकुम्भानामुत्तमः स्याद्घृताचलः
दशभिर्मध्यमः प्रोक्तः पञ्चभिस्त्वधमः स्मृतः
viṃśatyā ghṛtakumbhānāmuttamaḥ syādghṛtācalaḥ
daśabhirmadhyamaḥ proktaḥ pañcabhistvadhamaḥ smṛtaḥ
- 3
अल्पवित्तोऽपि यः कुर्याद्द्वाभ्यामिह विधानतः
विष्कम्भपर्वतांस्तद्वच्चतुर्भागेण कल्पयेत्
alpavitto'pi yaḥ kuryāddvābhyāmiha vidhānataḥ
viṣkambhaparvatāṃstadvaccaturbhāgeṇa kalpayet
- 4
शालितण्डुलपात्राणि कुम्भोपरि निवेशयेत्
कारयेत्संहतानुच्चान्यथाशोभं विधानतः
śālitaṇḍulapātrāṇi kumbhopari niveśayet
kārayetsaṃhatānuccānyathāśobhaṃ vidhānataḥ
- 5
वेष्टयेच्छुक्लवासोभिर् इक्षुदण्डफलादिकैः
धान्यपर्वतवच्छेषं विधानमिह पठ्यते
veṣṭayecchuklavāsobhir ikṣudaṇḍaphalādikaiḥ
dhānyaparvatavaccheṣaṃ vidhānamiha paṭhyate
- 6
अधिवासनपूर्वं च तद्वद्धोमसुरार्चनम्
प्रभातायां तु शर्वर्यां गुरवे तं निवेदयेत्
विष्कम्भपर्वतांस्तद्वदृत्विग्भ्यः शान्तमानसः
adhivāsanapūrvaṃ ca tadvaddhomasurārcanam
prabhātāyāṃ tu śarvaryāṃ gurave taṃ nivedayet
viṣkambhaparvatāṃstadvadṛtvigbhyaḥ śāntamānasaḥ
- 7
संयोगाद्घृतमुत्पन्नं यस्मादमृततेजसोः
तस्माद्धृतार्चिर्विश्वात्मा प्रीयतामत्र शंकरः
saṃyogādghṛtamutpannaṃ yasmādamṛtatejasoḥ
tasmāddhṛtārcirviśvātmā prīyatāmatra śaṃkaraḥ
- 8
यस्मात्तेजोमयं ब्रह्म घृते तद्विद्ध्यवस्थितम्
घृतपर्वतरूपेण तस्मात्त्वं पाहि नोऽनिशम्
yasmāttejomayaṃ brahma ghṛte tadviddhyavasthitam
ghṛtaparvatarūpeṇa tasmāttvaṃ pāhi no'niśam
- 9
अनेन विधिना दद्याद्घृताचलमनुत्तमम्
महापातकयुक्तोऽपि लोकमाप्नोति शांकरम्
anena vidhinā dadyādghṛtācalamanuttamam
mahāpātakayukto'pi lokamāpnoti śāṃkaram
- 10
हंससारसयुक्तेन किङ्किणीजालमालिना
विमानेनाप्सरोभिश्च सिद्धविद्याधरैर्वृतः
विहरेत्पितृभिः सार्धं यावदाभूतसंप्लवम्
haṃsasārasayuktena kiṅkiṇījālamālinā
vimānenāpsarobhiśca siddhavidyādharairvṛtaḥ
viharetpitṛbhiḥ sārdhaṃ yāvadābhūtasaṃplavam

