11 shlokas
- 1
पिप्पलाद उवाच
अथातः शृणु भूपाल प्रतिशुक्रं प्रशान्तये
यात्रारम्भेऽवसाने च तथा शुक्रोदये त्विह
pippalāda uvāca
athātaḥ śṛṇu bhūpāla pratiśukraṃ praśāntaye
yātrārambhe'vasāne ca tathā śukrodaye tviha
- 2
राजते वाथ सौवर्णे कांस्यपात्रेऽथवा पुनः
शुक्लपुष्पाम्बरयुते सिततण्डुलपूरिते
rājate vātha sauvarṇe kāṃsyapātre'thavā punaḥ
śuklapuṣpāmbarayute sitataṇḍulapūrite
- 3
विधाय राजतं शुक्रं शुचिमुक्ताफलान्वितम्
मन्त्रेणानेन तत्सर्वं सामगाय निवेदयेत्
vidhāya rājataṃ śukraṃ śucimuktāphalānvitam
mantreṇānena tatsarvaṃ sāmagāya nivedayet
- 4
नमस्ते सर्वलोकेश नमस्ते भृगुनन्दन
कवे सर्वार्थसिद्ध्यर्थं गृहाणार्घ्यं नमोऽस्तु ते
namaste sarvalokeśa namaste bhṛgunandana
kave sarvārthasiddhyarthaṃ gṛhāṇārghyaṃ namo'stu te
- 5
एवमस्योदये कुर्वन्यात्रादिषु च भारत
सर्वान्कामानवाप्नोति विष्णुलोके महीयते
evamasyodaye kurvanyātrādiṣu ca bhārata
sarvānkāmānavāpnoti viṣṇuloke mahīyate
- 6
यावच्छुक्रस्य न हृता पूजा सा माल्यकैः शुभैः
वटकैः पूरिकाभिश्च गोधूमैश्चणकैरपि
तावदन्नं न चाश्नीयात्त्रिभिः कामार्थसिद्धये
yāvacchukrasya na hṛtā pūjā sā mālyakaiḥ śubhaiḥ
vaṭakaiḥ pūrikābhiśca godhūmaiścaṇakairapi
tāvadannaṃ na cāśnīyāttribhiḥ kāmārthasiddhaye
- 7
तद्वद्वाचस्पतेः पूजां प्रवक्ष्यामि युधिष्ठिर
सुवर्णपात्रे सौवर्णममरेशपुरोहितम्
tadvadvācaspateḥ pūjāṃ pravakṣyāmi yudhiṣṭhira
suvarṇapātre sauvarṇamamareśapurohitam
- 8
पीतपुष्पाम्बरयुतं कृत्वा स्नात्वाथ सर्षपैः
पलाशाश्वत्थयोगेन पञ्चगव्यजलेन च
pītapuṣpāmbarayutaṃ kṛtvā snātvātha sarṣapaiḥ
palāśāśvatthayogena pañcagavyajalena ca
- 9
पीताङ्गरागवसनो घृतहोमं तु कारयेत्
प्रणम्य च गवा सार्धं ब्राह्मणाय निवेदयेत्
pītāṅgarāgavasano ghṛtahomaṃ tu kārayet
praṇamya ca gavā sārdhaṃ brāhmaṇāya nivedayet
- 10
नमस्तेऽङ्गिरसां नाथ वाक्पते च बृहस्पते
क्रूरग्रहैः पीडितानाममृताय नमो नमः
namaste'ṅgirasāṃ nātha vākpate ca bṛhaspate
krūragrahaiḥ pīḍitānāmamṛtāya namo namaḥ
- 11
संक्रान्तावस्य कौन्तेय यात्रास्वभ्युदयेषु च
कुर्वन्बृहस्पतेः पूजां सर्वान्कामान्समश्नुते
saṃkrāntāvasya kaunteya yātrāsvabhyudayeṣu ca
kurvanbṛhaspateḥ pūjāṃ sarvānkāmānsamaśnute

